Publish Date: Mon, 05 Oct 2026 (12:03 IST)
Updated Date: Mon, 05 Oct 2026 (12:06 IST)
ರಸ್ತೆ ದಾಟುತ್ತಿದ್ದ ಹಸುವೊಂದರ ಮೇಲೆ ಚಿರತೆಯೊಂದು ದಿಢೀರನೆ ಭೀಕರವಾಗಿ ದಾಳಿ ಮಾಡಿ, ಅದರ ಕುತ್ತಿಗೆಯನ್ನು ಕಚ್ಚಿ ಹಿಡಿದು ಪ್ರಾಣ ತೆಗೆಯಲು ಯತ್ನಿಸಿದಾಗ, ಅದೃಷ್ಟವಶಾತ್ ಸಮಯ ಪ್ರಜ್ಞೆ ಮೆರೆದ ಕಾರು ಚಾಲಕ ಹಾಗೂ ಸವಾರರು ಹಸುವಿನ ಜೀವವನ್ನು ರಕ್ಷಿಸಿರುವ ರೋಮಾಂಚನಕಾರಿ ಘಟನೆ ನಡೆದಿದೆ.
ಸಾಮಾನ್ಯ ದಿನದಂತೆ ರಸ್ತೆ ದಾಟುತ್ತಿದ್ದ ಹಸುವಿನ ಮೇಲೆ ಪೊದೆಯಿಂದ ರಭಸವಾಗಿ ಬಂದ ಚಿರತೆ ಒಮ್ಮೆಗೆ ಜಿಗಿದು, ಅದರ ಕತ್ತನ್ನು ತನ್ನ ದವಡೆಗಳ ನಡುವೆ ಬಿಗಿಯಾಗಿ ಹಿಡಿದುಕೊಂಡಿತ್ತು. ಹಸು ಚೀರುತ್ತಾ ತೀವ್ರ ಯಾತನೆಯಿಂದ ಜೀವ ಉಳಿಸಿಕೊಳ್ಳಲು ಹೋರಾಡುತ್ತಿತ್ತು. ಇನ್ನೇನು ಹಸುವಿನ ಪ್ರಾಣ ಪಕ್ಷಿ ಹಾರಿಹೋಗಬೇಕು ಎನ್ನುವಷ್ಟರಲ್ಲಿ, ಅದೇ ರಸ್ತೆಯಲ್ಲಿ ಸಾಗುತ್ತಿದ್ದ ಕಾರಿನಲ್ಲಿದ್ದವರು ಈ ದೃಶ್ಯವನ್ನು ಗಮನಿಸಿದ್ದಾರೆ.
ಪರಿಸ್ಥಿತಿಯ ಗಂಭೀರತೆಯನ್ನು ತಕ್ಷಣವೇ ಅರಿತ ಕಾರಿನಲ್ಲಿದ್ದ ಸವಾರರು, ವಾಹನದ ಹಾರ್ನ್ ಅನ್ನು ಸತತವಾಗಿ ಮತ್ತು ಜೋರಾಗಿ ಬಾರಿಸಲು ಪ್ರಾರಂಭಿಸಿದರು. ನಿರೀಕ್ಷಿಸದ ಈ ಕರ್ಕಶ ಮತ್ತು ಭಾರೀ ಸದ್ದಿನಿಂದ ಬೆದರಿದ ಚಿರತೆ, ತಕ್ಷಣವೇ ಹಸುವಿನ ಕುತ್ತಿಗೆಯನ್ನು ಬಿಟ್ಟು ಕಾಡಿನತ್ತ ಓಡಿ ಪರಾರಿಯಾಗಿದೆ. ಇದರಿಂದಾಗಿ ಸಾವು-ಬದುಕಿನ ನಡುವೆ ಹೋರಾಡುತ್ತಿದ್ದ ಹಸು ಪವಾಡಸದೃಶವಾಗಿ ಪ್ರಾಣಾಪಾಯದಿಂದ ಪಾರಾಗಿದೆ.
ಸಮಯಕ್ಕೆ ಸರಿಯಾಗಿ ಬುದ್ಧಿವಂತಿಕೆ ಮತ್ತು ಸಮಯಪ್ರಜ್ಞೆ ಮೆರೆದು ಹಸುವಿನ ಪ್ರಾಣ ಕಾಪಾಡಿದ ಕಾರಿನಲ್ಲಿದ್ದ ಸವಾರರ ಕಾರ್ಯಕ್ಕೆ ಜಾಲತಾಣಗಳಲ್ಲಿ ಹಾಗೂ ಸಾರ್ವಜನಿಕ ವಲಯದಲ್ಲಿ ವ್ಯಾಪಕ ಪ್ರಶಂಸೆ ವ್ಯಕ್ತವಾಗುತ್ತಿದೆ. ಸಮಯೋಚಿತ ನಿರ್ಧಾರದಿಂದ ಜೀವವೊಂದನ್ನು ಉಳಿಸಿದ ಈ ಚಾಲಕ ಮತ್ತು ಸವಾರರ ನಡೆ ನಿಜಕ್ಕೂ ಶ್ಲಾಘನೀಯ.
About Writer
ಕೃಷ್ಣವೇಣಿ ಕೆ
Completed bachelor degree in Journalism and communication in SDMC Ujire. 15 years of experience as journalist. Worked as sub editor and reporter. Specialties in sports, politics and entertainment.....
ಮತ್ತಷ್ಟು ಓದಿ
