ಹಿಂದೂಗಳು ಪ್ರತ್ಯಕ್ಷ ದೈವವಾಗಿ ಆರಾಧಿಸುವ, ತಾಯಿಯ ಸ್ಥಾನ ಕೊಟ್ಟಿರುವ ಗೋಮೂತ್ರದಲ್ಲಿ ಚಿನ್ನದ ಅಂಶ ಪತ್ತೆಯಾಗಿದೆ. ಜುನಾಘಢದ ಕೃಷಿ ವಿಶ್ವವಿದ್ಯಾಲಯದ ವಿಜ್ಞಾನಿಗಳು ಈ ಆವಿಷ್ಕಾರವನ್ನು ಮಾಡಿದ್ದಾರೆ.
ಗುಜರಾತಿನ್ ಪ್ರಸಿದ್ಧ ಗಿರ್ ಆಕಳ ಮೂತ್ರದಲ್ಲಿ ಚಿನ್ನದ ಅಂಶವಿದೆ ಎಂದು ವಿಜ್ಞಾನಿಗಳ ಸಂಶೋಧನೆಯಿಂದ ಸಾಬೀತಾಗಿದೆ. ನಾಲ್ಕು ವರ್ಷಗಳ ಕಾಲ 400ಕ್ಕೂ ಹೆಚ್ಚು ಗೋವುಗಳ ಪರೀಕ್ಷೆಯನ್ನು ನಡೆಸಲಾಗಿತ್ತು. 1 ಲೀಟರ್ ಮೂತ್ರದಲ್ಲಿ 3 ರಿಂದ 10 ಎಮ್‌ಜಿಯಷ್ಟು ಚಿನ್ನ ಪತ್ತೆಯಾಗಿದೆ ಎಂದು ವಿಜ್ಞಾನಿಗಳು ಹೇಳುತ್ತಿದ್ದಾರೆ.
ಆಯಾನುಗಳ ರೂಪದಲ್ಲಿ ಪತ್ತೆಯಾಗಿರುವ ಈ ಚಿನ್ನದ ಲವಣಗಳು ನೀರಿನಲ್ಲಿ ಕರಗಬಲ್ಲವು.
ಜೆಎಯು ಜೈವಿಕ ತಂತ್ರಜ್ಞಾನ ಇಲಾಖೆಯ ಮುಖ್ಯಸ್ಥರಾದ ಡಾಕ್ಟರ್ ಬಿ.ಎ. ಗೋಲಕಿಯಾ ನೇತೃತ್ವದ ವಿಜ್ಞಾನಿಗಳ ತಂಡ ಈ ಸಂಶೋಧನೆಯನ್ನು ನಡೆಸಿತ್ತು. ಮೂತ್ರದ ಮಾದರಿಗಳನ್ನು ವಿಶ್ಲೇಷಿಸಲು ಗ್ಯಾಸ್ ಕ್ರೊಮ್ಯಾಟೋಗ್ರಫಿ-ಮಾಸ್ ಸ್ಪೆಕ್ಟ್ರೋಮೆಟ್ರಿ(ಜಿಸಿ-ಎಂಎಸ್) ವಿಧಾನವನ್ನು ಬಳಸಲಾಗಿತ್ತು.
ಗೋಮೂತ್ರದಲ್ಲಿ ಚಿನ್ನದ ಅಂಶವಿರುವ ಬಗ್ಗೆ ಮತ್ತು ಔಷಧೀಯ ಗುಣಗಳಿರುವ ಬಗ್ಗೆ ನಮ್ಮ ಪ್ರಾಚೀನ ಗ್ರಂಥಗಳಲ್ಲಿ ಬರೆಯಲಾಗಿದೆ. ಆದರೆ ಇದನ್ನು ಸಾಬೀತು ಪಡಿಸಲು ವಿವರವಾದ ವೈಜ್ಞಾನಿಕ ವಿಶ್ಲೇಶಣೆ ಇರಲಿಲ್ಲ. ನಾವು ಗೋಮೂತ್ರದ ಬಗ್ಗೆ ಸಂಶೋಧನೆ ನಡೆಸಲು ತೀರ್ಮಾನಿಸಿದೆವು. 400 ಗಿರ್ ಹಸುಗಳ ಮೂತ್ರವನ್ನು ಪರೀಕ್ಷೆಗೆ ಬಳಸಲಾಗಿತ್ತು. ಮತ್ತೀಗ 39 ಜಾತಿಯ ದೇಶಿಯ ಗೋತಳಿಗಳ ಮೂತ್ರವನ್ನು ಇದೇ ಸಂಶೋಧನೆಗೆ ಒಳಪಡಿಸಲಾಗುವುದು ಎಂದು ಗೋಲಕಿಯಾ ತಿಳಿಸಿದ್ದಾರೆ.
