ಮೈ ನಡುಗಿಸುವ ಸಾಮೂಹಿಕ ಅತ್ಯಾಚಾರ: ಬೆಚ್ಚಿಬಿದ್ದ ಆಂಧ್ರ

ಅನಂತಪುರದಲ್ಲಿ ಅಪ್ರಾಪ್ತ ವಯಸ್ಸಿನ ಯುವತಿಯ ಮೇಲೆ ಅನೇಕ ದಿನಗಳಿಂದ ನಡೆಯುತ್ತಿರುವ ಸಾಮೂಹಿಕ ಅತ್ಯಾಚಾರದ ಕಥೆಯೊಂದು ಮೈ ನಡುಗಿಸುವಂತಿದ್ದು ಘಟನೆಯಿಂದ ಸಂಪೂರ್ಣ ಆಂಧ್ರವೇ ಬೆಚ್ಚಿ ಬಿದ್ದಿದೆ. 

ಕಲ್ಯಾಣದುರ್ಗದ ನಿವಾಸಿಯಾದ 17 ವರ್ಷದ ವಿದ್ಯಾರ್ಥಿ ಅನಂತಪುರದಲ್ಲಿ ಪಿಯುಸಿ ಓದುತ್ತಿದ್ದು ತನ್ನ ಮೇಲೆ ನಡೆದ ಸ್ನೇಹದ ಹೆಸರಲ್ಲಿ ತನ್ನ ಮೇಲೆ ನಡೆಸಿದ ಭಯಂಕರ ಕ್ರೂರ ಕೃತ್ಯವನ್ನು ಕೊನೆಗೂ ಪೊಲೀಸರ ಮುಂದೆ ಹೊರಹಾಕಿದ್ದಾಳೆ. ಪ್ರಕರಣಕ್ಕೆ ಸಂಬಂಧಿಸಿದಂತೆ ಸದ್ಯ ಇಬ್ಬರು ಆರೋಪಿಗಳನ್ನು ಬಂಧಿಸಲಾಗಿದ್ದು ಉಳಿದ ಆರೋಪಿಗಳಿಗಾಗಿ ಪೊಲೀಸರು ಬಲೆ ಬೀಸಿದ್ದಾರೆ. 

ಕಲ್ಯಾಣದುರ್ಗದಿಂದ ಅನಂತಪುರಕ್ಕೆ ಕಾಲೇಜಿಗೆ ಹೋಗುತ್ತಿದ್ದ ಬಾಲಕಿಯ ಸ್ನೇಹ ಸಂಪಾದಿಸಿದ ಅಮರನಾಥ್ ರೆಡ್ಡಿ, ಕಾರ್ತಿಕ್ ರೆಡ್ಡಿ ಎಂಬ ಇಬ್ಬರ ಸ್ನೇಹಿತರು ಸ್ವಲ್ಪ ದಿನಗಳಾದ ಬಳಿಕ ಪಿಕ್‌ನಿಕ್ ನೆಪದಲ್ಲಿ ಆಕೆಯನ್ನು ಅಜ್ಞಾತ ಪ್ರದೇಶಕ್ಕೆ ಕರೆದೊಯ್ದು ಸಾಮೂಹಿಕ ಅತ್ಯಾಚಾರ ಮಾಡಿದ್ದಾರೆ. ಅಷ್ಟೇ ಅಲ್ಲದೇ ತಮ್ಮ ಕೀಚಕ ಕೃತ್ಯದ ವಿಡಿಯೋ ಚಿತ್ರೀಕರಿಸಿಕೊಂಡು ಅದನ್ನು ತೋರಿಸಿ ತಮ್ಮ ಇತರ ಸ್ನೇಹಿತರ ಜತೆ ಸೇರಿಕೊಂಡು ಪದೇ ಪದೇ ಬಾಲಕಿಯ  ಮೇಲೆ ಅತ್ಯಾಚಾರವೆಸಗಿದ್ದಾರೆ. 

ಮಾನಮರ್ಯಾದೆಗೆ ಹೆದರಿ ತನ್ನ ಮೇಲೆ ನಡೆಯುತ್ತಿದ್ದ ಅಸಹನೀಯ ದೌರ್ಜನ್ಯವನ್ನು ಯಾರ ಬಳಿ ಬಾಯ್ಬಿಡದ ಬಾಲಕಿ ಅವರ ಕಾಟ ತಾಳಲಾರದಾದಾಗ ದಾರಿ ಕಾಣದೆ ತನ್ನ ಪೋಷಕರ ಬಳಿ ಎಲ್ಲ ವಿಷಯವನ್ನು ಹೇಳಿಕೊಂಡಿದ್ದಾಳೆ. ಬಳಿಕ ತಂದೆ-ತಾಯಿಗಳ ಜತೆ ಸೇರಿ ಪೊಲೀಸ್ ಠಾಣೆಯಲ್ಲಿ ದೂರು ದಾಖಲಿಸಿದ್ದಾಳೆ. ತಕ್ಷಣ ಕಾರ್ಯಪ್ರವೃತ್ತರಾದ ಪೊಲೀಸರು ಪ್ರಕರಣದ ಪ್ರಮುಖ ಆರೋಪಿಗಳಾದ ಅಮರನಾಥ್ ರೆಡ್ಡಿ, ಕಾರ್ತಿಕ್ ರೆಡ್ಡಿಯನ್ನು ಬಂಧಿಸಿದ್ದಾರೆ. ಇತರ ಆರೋಪಿಗಳಿಗಾಗಿ ಶೋಧ ಕಾರ್ಯ ಮುಂದುವರೆದಿದೆ.

ಈ ಕೃತ್ಯ ಸಂಪೂರ್ಣ ಆಂಧ್ರವನ್ನು ಆಘಾತಕ್ಕೆ ದೂಡಿದ್ದು, ಪ್ರಕರಣವನ್ನು ಗಂಭೀರವಾಗಿ ಪರಿಗಣಿಸಿರುವ ಆಂಧ್ರ ಸರ್ಕಾರ ಬಾಲಕಿಗೆ 1 ಲಕ್ಷ ಪರಿಹಾರವನ್ನು ಘೋಷಿಸಿದೆ. ಆಕೆಯ ಮುಂದಿನ ವಿದ್ಯಾಭ್ಯಾಸಕ್ಕೆ ಸಹಾಯ ಮಾಡುವ ಭರವಸೆ ನೀಡಿರುವ ಸರ್ಕಾರ ಆಕೆ ಬಯಸಿದರೆ ಬೇರೆ ಕಾಲೇಜಿನಲ್ಲಿ ಪ್ರವೇಶ ಕೊಡಿಸುವ ವಾಗ್ದಾನ ಮಾಡಿದೆ. 

ತಾಜಾ ಸುದ್ದಿಗಳಿಗಾಗಿ ವೆಬ್ ದುನಿಯಾ ಮೊಬೈಲ್ ಆ್ಯಪ್ ಡೌನ್‌ಲೋಡ್ ಮಾಡಿಕೊಳ್ಳಿ.