ತೇಜಸ್ವಿ ಸೂರ್ಯ ಪತ್ನಿ ಶಿವಶ್ರೀ ಬಹಳ ಜಾಣೆ, ಎರಡೇ ತಿಂಗಳಲ್ಲಿ ಕನ್ನಡ ಕಲಿತರಂತೆ

Photo Credit: Instagram

ಬೆಂಗಳೂರು: ಬೆಂಗಳೂರು ದಕ್ಷಿಣ ಸಂಸದ ತೇಜಸ್ವಿ ಸೂರ್ಯ ಪತ್ನಿ, ಗಾಯಕಿ ಶಿವಶ್ರೀ ಸ್ಕಂದಪ್ರಸಾದ್ ಬಹಳ ಜಾಣೆ. ಎರಡೇ ತಿಂಗಳಲ್ಲಿ ಕನ್ನಡ ಕಲಿತರಂತೆ. ಹೀಗಂತ ಸ್ವತಃ ಪತಿ ತೇಜಸ್ವಿ ಸೂರ್ಯ ಮಾಧ್ಯಮ ಸಂದರ್ಶನವೊಂದರಲ್ಲಿ ಹೇಳಿದ್ದಾರೆ.

ಕಳೆದ ಮಾರ್ಚ್ ನಲ್ಲಿ ತೇಜಸ್ವಿ ಸೂರ್ಯ ಮತ್ತು ಗಾಯಕಿ ಶಿವಶ್ರೀ ಮದುವೆ ಸಾಂಪ್ರದಾಯಿಕವಾಗಿ ನೆರವೇರಿತ್ತು. ಬಳಿಕ ಜನರಿಗಾಗಿ ಅರಮನೆ ಮೈದಾನದಲ್ಲಿ ತೇಜಸ್ವಿ ಸೂರ್ಯ ಬೃಹತ್ ಆರತಕ್ಷತೆಯನ್ನೂ ಹಮ್ಮಿಕೊಂಡಿದ್ದರು. ಇಬ್ಬರ ಜೋಡಿ ಮುದ್ದಾಗಿದೆ ಎಂದು ಜನ ಮೆಚ್ಚಿಕೊಂಡಿದ್ದೂ ಆಗಿದೆ.

ಎಲ್ಲರಿಗೂ ಗೊತ್ತಿರುವ ಹಾಗೆ ಗಾಯಕಿ, ನೃತ್ಯಪಟುವಾಗಿರುವ ಶಿವಶ್ರೀ ಮೂಲತಃ ಚೆನ್ನೈಯವರು. ಹೀಗಾಗಿ ಅವರ ಮೂಲ ಭಾಷೆ ತಮಿಳು. ಅವರಿಗೆ ಕನ್ನಡ ಬರುತ್ತಿರಲಿಲ್ಲ. ಆದರೆ ಈಗ ಮದುವೆಯಾದ ಎರಡೇ ತಿಂಗಳಿಗೆ ಕನ್ನಡ ಕಲಿತಿದ್ದಾರಂತೆ. ಹಾಗಿದ್ದರೂ ಮಾಧ್ಯಮ ಸಂದರ್ಶನದಲ್ಲಿ ಕ್ಷಮಿಸಿ ನನಗೆ ತುಂಬಾ ಮಾತನಾಡುವಷ್ಟು ಕನ್ನಡ ಗೊತ್ತಿಲ್ಲ ಎಂದು ಕನ್ನಡದಲ್ಲೇ ನಿರ್ಗಳವಾಗಿ ಮಾತನಾಡಿದ್ದಾರೆ.

ಪತ್ನಿಯ ಕನ್ನಡ ಬಗ್ಗೆ ಮಾತನಾಡಿರುವ ತೇಜಸ್ವಿ ಸೂರ್ಯ ಮದುವೆಗೂ ಮೊದಲು ಆಕೆಗೆ ನಾನು ಕನ್ನಡ ಕಲಿಯಬೇಕು ಎಂದಿದ್ದೆ. ಮದುವೆಯಾದ ಎರಡೇ ತಿಂಗಳಲ್ಲಿ ಕನ್ನಡ ಕಲಿತಿದ್ದಾಳೆ. ನಮ್ಮ ಅಪ್ಪ-ಅಮ್ಮ ಎಲ್ಲರಿಂದಾಗಿ ಕನ್ನಡ ಕಲಿತಿದ್ದಾಳೆ. ಎಲ್ಲಕ್ಕಿಂತ ಮುಖ್ಯವಾಗಿ ಅವಳಿಗೆ ಕನ್ನಡದ ಮೇಲೆ ಗೌರವವಿದೆ, ಕಲಿಯುವ ಉತ್ಸಾಹವಿತ್ತು. ಹಾಗಾಗಿ ಕಲಿತಿದ್ದಾಳೆ ಎಂದಿದ್ದಾರೆ. ಇನ್ನು, ಇದಕ್ಕೆ ಅನೇಕ ನೆಟ್ಟಿಗರು ಕಾಮೆಂಟ್ ಮಾಡಿದ್ದು, ಎರಡೇ ತಿಂಗಳಲ್ಲಿ ಕನ್ನಡ ಕಲಿತು ಇಷ್ಟರಮಟ್ಟಿಗೆ ಮಾತನಾಡುವುದು ನಿಜಕ್ಕೂ ಗ್ರೇಟ್ ಎಂದಿದ್ದಾರೆ.