ದೇವರ ಹಾವಿನ ಸಾವಿನ ವಿವಾದ

ಮರಕತ್ತರಿಸುವ ಸಂದರ್ಭದಲ್ಲಿ ನಾಗರಹಾವು ಗರಗಸಕ್ಕೆ ಸಿಕ್ಕಿ ಎರಡು ತುಂಡಾಗಿ ಸಾವನ್ನಪ್ಪಿದ ಘಟನೆ ಯಶವಂತಪುರದ ಸಮೀಪದ ಮುತ್ಯಾಲಮ್ಮ ದೇವಾಲಯದಲ್ಲಿ ಬಳಿ ನಡೆದಿದೆ. ಈ ದುರ್ಘಟನೆ ಈಗ ರಾಜಕೀಯ ಸ್ವರೂಪ ಪಡೆದುಕೊಂಡಿದೆ.

ಘಟನೆಗೆ ಸಂಬಂಧಿಸಿದಂತ ಸ್ಥಳೀಯ ಅರಣ್ಯಾಧಿಕಾರಿಗಳಾದ ಶಿವರಾಮ ಎಂಬುವವರು ಜಾಲಹಳ್ಳಿ ಪೊಲೀಸ್ ಠಾಣೆಗೆ ಈ ಕುರಿತು ದೂರು ನೀಡಿದ್ದು ದೇವಾಲಯದ ಧರ್ಮದರ್ಶಿಗಳ ವಿರುದ್ಧ ಪ್ರಕರಣ ದಾಖಲಾಗಿದೆ.

ಮುತ್ಯಾಲಮ್ಮ ದೇವಾಲಯದ ಮುಂದಿದ್ದ ಪುರಾತನ ಆಲದ ಮರವನ್ನು ಕತ್ತರಿಸುವಾಗ ಮರದಲ್ಲಿದ್ದ  ಹಾವು ಸಾವನ್ನಪ್ಪಿದೆ. ಇದು ದೇವರ ಹಾವು ಎಂಬು ಭಕ್ತರು ನಂಬಿದ್ದು ಘಟನೆ ಆತಂಕಕ್ಕೆ ಕಾರಣವಾಗಿದೆ.

ದೇವಾಲಯದ ಧರ್ಮದರ್ಶಿ ವಾಸುದೇವ ಅವರು ಜೆ.ಪಿ.ಪಾರ್ಕ್ ವಾರ್ಡ್‌ ಬಿಬಿಎಂಪಿ ಸದಸ್ಯೆ (ಕಾಂಗ್ರೆಸ್) ಮಮತಾ ಅವರ ಪತಿಯಾಗಿದ್ದು ಅವರು ಸ್ಥಳೀಯ ಸರ್ಕಾರಿ ಜಾಗವನ್ನು ಒತ್ತುವರಿ ಮಾಡಿಕೊಳ್ಳಲು ಮರ ಕಡಿಸಿದ್ದಾರೆ. ಇದು ದೇವರ ಹಾವಾಗಿದ್ದು ಆಗಾಗಾ ಕಾಣಿಸಿಕೊಳ್ಳುತ್ತಿತ್ತು. ಮರದ ಪೊಟರೆಯಲ್ಲಿ ಆಶ್ರಯ ಪಡೆದಿದ್ದ ಹಾವನ್ನು ತುಂಡರಿಸಿ ಸಾಯಿಸಲಾಗಿದೆ ಎಂದು ಸ್ಥಳೀಯರು ಆರೋಪಿಸುತ್ತಿದ್ದಾರೆ. ಸದ್ಯ ವಾಸುದೇವ್ ನಿರೀಕ್ಷಣಾ ಜಾಮೀನನ್ನು ಪಡೆದುಕೊಂಡಿದ್ದಾರೆ.

ತಮ್ಮ ಪತಿಯ ಮೇಲಿನ ಆರೋಪಕ್ಕೆ ಪ್ರತಿಕ್ರಿಯಿಸಿರುವ ಮಮತಾ ವಾಸುದೇವ್, ಅರಳಿ ಮರದ ಕೊಂಬೆ ಬೀಳುವ ಸಾಧ್ಯತೆ ಇದ್ದು, ತಕ್ಷಣ ಕಡಿಸುವಂತೆ ಸ್ಥಳೀಯರು ಹೇಳಿದ್ದರು. ಹೀಗಾಗಿ ಅರಣ್ಯ ಇಲಾಖೆಗೆ ಪತ್ರ ಬರೆದಿದ್ದೆ. ಪಾಲಿಕೆ ಸಿಬ್ಬಂದಿ ಬಂದು ಕೊಂಬೆ ಕತ್ತರಿಸುವಾಗ ಪೊಟರೆಯಲ್ಲಿದ್ದ ಹಾವು ಆಕಸ್ಮಿಕವಾಗಿ ಸತ್ತಿದೆ. ನನ್ನ ವಿರುದ್ಧ ರಾಜಕೀಯ ಕುತಂತ್ರ ನಡೆಯುತ್ತಿದ್ದು, ಅನಗತ್ಯವಾಗಿ ವಿವಾದವನ್ನು ಸೃಷ್ಟಿಸಲಾಗುತ್ತಿದೆ ಎಂದಿದ್ದಾರೆ

ಗರಗಸಕ್ಕೆ ಸಿಲುಕಿ ಹಾವು 2 ತುಂಡಾಗಿ ಬೀಳುತ್ತಿರುವ ದೃಶ್ಯ ವಾಟ್ಸಪ್  ಮತ್ತು ಸಾಮಾಜಿಕ ಜಾಲತಾಣಗಳಲ್ಲಿ ವ್ಯಾಪಕವಾಗಿ ಹರಿದಾಡತೊಡಗಿದೆ.

ತಾಜಾ ಸುದ್ದಿಗಳಿಗಾಗಿ ವೆಬ್ ದುನಿಯಾ ಮೊಬೈಲ್ ಆ್ಯಪ್ ಡೌನ್‌ಲೋಡ್ ಮಾಡಿಕೊಳ್ಳಿ.