ಶಿರೂರು: ಇತ್ತೀಚೆಗೆ ಶಿರೂರಿನಲ್ಲಿ ಸಂಭವಿಸಿದ್ದ ಗುಡ್ಡ ಕುಸಿತದಲ್ಲಿ ಸಿಲುಕಿದ್ದ ಕೇರಳ ಮೂಲದ ಟ್ರಕ್ ಡ್ರೈವರ್ ಅರ್ಜುನ್ ಸಿಕ್ಕಿಯೇಬಿಟ್ಟ ಎಂದು ಎಲ್ಲರೂ ಅಂದುಕೊಂಡಿದ್ದರು. ಆದರೆ ಪೊಲೀಸರು ಪತ್ತೆ ಮಾಡಿದ್ದ ಮೃತದೇಹ ಅರ್ಜುನ್ ನದ್ದು ಅಲ್ಲ ಎಂದು ತಿಳಿದುಬಂದಿದೆ.
ಶಿರೂರಿನಲ್ಲಿ ಗುಡ್ಡ ಕುಸಿತವಾಗಿ 20 ದಿನಗಳೇ ಆಗಿವೆ. ಇದುವರೆಗೆ ಗುಡ್ಡ ಕುಸಿತದಲ್ಲಿ ಸಿಲುಕಿದ್ದ ಕೇರಳ ಮೂಲದ ಟ್ರಕ್ ಡ್ರೈವರ್ ಅರ್ಜುನ್ ಮೃತದೇಹ ಸಿಕ್ಕಿಲ್ಲ. ಅರ್ಜುನ್ ಮಾತ್ರವಲ್ಲ ಉಳಿದ ಇಬ್ಬರ ಮೃತದೇಹವೂ ಸಿಕ್ಕಿಲ್ಲ. ಮೊನ್ನೆಯಷ್ಟೇ ಹೊನ್ನಾವರ ಸಮೀಪ ಸಮುದ್ರ ದಂಡೆಯಲ್ಲಿ ಕೊಳೆತ ಸ್ಥಿತಿಯಲ್ಲಿ ಮೃತದೇಹವೊಂದು ಪತ್ತೆಯಾಗಿತ್ತು.
ಈ ಮೃತದೇಹ ಅರ್ಜುನ್ ನದ್ದು ಇರಬಹುದು ಎಂದು ಎಲ್ಲರೂ ಅಂದುಕೊಂಡಿದ್ದರು. ಹೀಗಾಗಿ ಅರ್ಜುನ್ ಸಹೋದರನ ಮಾದರಿ ಪಡೆದು ಡಿಎನ್ ಎ ಮ್ಯಾಚ್ ಆಗುತ್ತದೆಯೇ ಎಂದು ಪರೀಕ್ಷೆ ನಡೆಸಲಾಗಿತ್ತು. ಆದರೆ ಪರೀಕ್ಷೆ ಬಳಿಕ ಇದು ಅರ್ಜುನ್ ಮೃತದೇಹವಲ್ಲ ಎಂದು ಪತ್ತೆಯಾಗಿದೆ.
ಬದಲಾಗಿ ಯಾರೋ ಮೀನುಗಾರನ ಶವ ಎಂದು ತಿಳಿದುಬಂದಿದೆ. ಅರ್ಜುನ್ ಮೃತದೇಹಕ್ಕಾಗಿ ಈಗಲೂ ಶೋಧ ಕಾರ್ಯ ನಡೆಯುತ್ತಲೇ ಇದೆ. ಈಗ ಸಿಕ್ಕಿರುವ ಮೃತದೇಹ ಅರ್ಜುನ್ ನದ್ದೇ ಇರಬಹುದು ಎಂದು ಕುಟುಂಬಸ್ಥರೂ ಭರವಸೆಯಲ್ಲಿದ್ದರು. ಆದರೆ ಅದೀಗ ಸುಳ್ಳಾಗಿದೆ.