ಬೆಂಗಳೂರು: ಮಹಿಳೆಯರ ಮೇಲೆ ಅತ್ಯಾಚಾರ, ಲೈಂಗಿಕ ದೌರ್ಜನ್ಯ ಪ್ರಕರಣದಲ್ಲಿ ನ್ಯಾಯಾಂಗ ಬಂಧನದಲ್ಲಿರುವ ಮಾಜಿ ಸಂಸದ ಪ್ರಜ್ವಲ್ ರೇವಣ್ಣಗೆ ಸ್ಪೆಷಲ್ ಊಟ ಬಂದಿದೆ.
ಪ್ರಜ್ವಲ್ ಬಂಧನವಾಗಿ ಎರಡು ತಿಂಗಳೇ ಆಗಿವೆ. ಈ ನಡುವೆ ಮುಂದಿನ ಒಂದು ತಿಂಗಳು ಮನೆ ಊಟ ಮಾಡುವುದಕ್ಕೆ ಕೋರ್ಟ್ ನಿಂದ ಅನುಮತಿ ಪಡೆದಿದ್ದಾರೆ. ಹೀಗಾಗಿ ಇಂದು ಪ್ರಜ್ವಲ್ ಗಾಗಿ ಎರಡು ಬ್ಯಾಗ್ ಗಳಲ್ಲಿ ಮನೆ ಊಟವನ್ನು ಅವರ ಆಪ್ತರೊಬ್ಬರು ತಂದುಕೊಟ್ಟಿದ್ದಾರೆ.
ಪ್ರಜ್ವಲ್ ಜೊತೆಗೆ ಅಸಹಜ ಲೈಂಗಿಕ ಕ್ರಿಯೆ ಪ್ರಕರಣದಲ್ಲಿ ಅಣ್ಣ ಸೂರಜ್ ರೇವಣ್ಣ ಕೂಡಾ ಇದೇ ಜೈಲಿನಲ್ಲಿ ನ್ಯಾಯಾಂಗ ಬಂಧನದಲ್ಲಿದ್ದಾರೆ. ಪ್ರಜ್ವಲ್ ಪಕ್ಕದ ಕೊಠಡಿಯಲ್ಲೇ ಸೂರಜ್ ಕೂಡಾ ಇದ್ದಾರೆ. ಕೆಲವು ದಿನಗಳ ಹಿಂದೆ ಅಣ್ಣ-ತಮ್ಮ ಇಬ್ಬರೂ ಒಂದೇ ಕೊಠಡಿಯಲ್ಲಿದ್ದರು.
ಇದೀಗ ಅಕ್ಕ ಪಕ್ಕದ ಕೊಠಡಿಯಲ್ಲಿದ್ದರೂ ಸೂರಜ್ ಗೆ ಮನೆ ಊಟ ಮಾಡುವ ಭಾಗ್ಯವಿಲ್ಲ. ಇದೀಗ ಕೋರ್ಟ್ ಪ್ರಜ್ವಲ್ ಗೆ ಮಾತ್ರ ಮನೆ ಊಟಕ್ಕೆ ಅವಕಾಶ ನೀಡಿದೆ. ಹೀಗಾಗಿ ಸೂರಜ್ ಜೈಲೂಟವನ್ನೇ ಮಾಡಬೇಕಾಗುತ್ತದೆ. ಇನ್ನು, ಇಂದು ಸದನದಲ್ಲೂ ಪ್ರಜ್ವಲ್, ಸೂರಜ್ ಪ್ರಕರಣ ಪ್ರತಿಧ್ವನಿಸಿತು. ತಮ್ಮ ಪುತ್ರರ ಬಂಧನದ ಬಗ್ಗೆ ತಂದೆ ಎಚ್ ಡಿ ರೇವಣ್ಣ ಭಾವುಕರಾಗಿ ಮಾತನಾಡಿದ್ದರು.
