ಹಳೆಯ ಸಂಸತ್ ಭವನವನ್ನು ಇನ್ನುಮುಂದೆ ಸಂವಿಧಾನ ಭವನ ಎಂದು ಹೆಸರಿಸುವುದಾಗಿ ಪ್ರಧಾನಿ ನರೇಂದ್ರ ಮೋದಿ ಹೇಳಿದ್ದಾರೆ. ಮಂಗಳವಾರ ನೂತನ ಸಂಸತ್ ಕಟ್ಟಡ ಸೆಂಟ್ರಲ್ ವಿಸ್ತಾಗೆ ಪ್ರವೇಶಿಸುವ ಮುನ್ನ ಹಳೆಯ ಕಟ್ಟಡದಲ್ಲಿ ನಡೆದ ವಿಶೇಷ ಸಮಾರಂಭದಲ್ಲಿ ಪಾಲ್ಗೊಂಡು ಮಾತನಾಡಿದ ಅವರು, ಇಷ್ಟು ದಿನ ಈ ಕಟ್ಟಡದಲ್ಲಿ ನಡೆದ ಸಂಸದೀಯ ನಡವಳಿಕೆಗಳ ಗೌರವ, ಘನತೆಗೆ ಕೊಂಚವೂ ಚ್ಯುತಿಯಾಗದಂತೆ ಅವುಗಳನ್ನು ಹೊಸ ಕಟ್ಟಡಕ್ಕೂ ಕೊಂಡೊಯ್ಯೋಣ ಎಂದು ಹೇಳಿದರು.
ಮುಂದಿನ ಜನಾಂಗಕ್ಕೆ ಕೊಡುಗೆಯಾಗಲಿರುವ ಈ ಅವಕಾಶವನ್ನು ನಾವೆಂದು ಕಳೆದುಕೊಳ್ಳಬಾರದು ಎಂದು ನುಡಿದ ಪ್ರಧಾನಿ ಮೋದಿ, ಮುಂಬರುವ ದಿನಗಳಲ್ಲಿಯೂ ನೀವು ಇದೇ ರೀತಿಯ ವಿಶ್ವಾಸವನ್ನು ನೀಡಲಿದ್ದೇರೆಂಬ ಭರವಸೆ ನನಗಿದೆ. ಇದನ್ನು ನಾವು ಕೇವಲ ಹಳೆಯ ಪಾರ್ಲಿಮೆಂಟ್ ಎಂದು ಕರೆಯುವುದು ಬೇಡ. ನಿಮ್ಮಲ್ಲರ ಅನುಮತಿಯೊಂದಿಗೆ ಈ ಕಟ್ಟಡವು ಮುಂದೆ ಸಂವಿಧಾನ ಭವನವೆಂದು ಹೆಸರಾಗಲಿದೆ ಎಂದು ನುಡಿದರು.
ಹಳೆಯ ಕಟ್ಟಡವನ್ನು ನೆಲಸಮ ಮಾಡುವುದಿಲ್ಲ. 1927 ರಲ್ಲಿ ನಿರ್ಮಾಣಗೊಂಡ 96 ವರ್ಷದ ಈ ಪುರಾತನ ಕಟ್ಟಡವನ್ನು ಜೀರ್ಣೋದ್ಧಾರಗೊಳಿಸಿ ಸಂಸದೀಯ ಚಟುವಟಿಕೆಗಳಿಗೆ ಹೆಚ್ಚು ಅನುಕೂಲವಾಗುವಂತೆ ಸುಸಜ್ಜಿತಗೊಳಿಸಲಾಗುವುದು ಎಂದು ಸಂಸತ್ ಭವನದ ಮೂಲಗಳು ತಿಳಿಸಿವೆ.
ಪಾರಂಪರಿಕ ವಿಶೇಷತೆಯ ದೃಷ್ಟಯಿಂದ ಐತಿಹಾಸಿಕ ವಿನ್ಯಾಸವನ್ನು ಯಥಾವತ್ತಾಗಿ ಉಳಿಸಿಕೊಳ್ಳಲು ನಿರ್ಧರಿಸಲಾಗಿದೆ.
