ವ್ಯಕ್ತಿಯೊಬ್ಬ ತನ್ನ ಪತ್ನಿ ಹಾಗೂ ಮೂರು ತಿಂಗಳ ಹಸುಗೂಸನ್ನು ಉಸಿರುಗಟ್ಟಿಸಿ ಕೊಲೆ ಮಾಡಿರುವ ಕರಾಳ ಘಟನೆ ನಗರದ ಹಮಾಲರ ಕಾಲೊನಿಯಲ್ಲಿ ಮಂಗಳವಾರ ನಡೆದಿದೆ.
25 ವರ್ಷದ ಮುನ್ನಿ ಬೇಗಂ ಮತ್ತು ಆಕೆಯ ಪುತ್ರಿ ರಾಹೀನಾ ಕೊಲೆಯಾದ ದುರ್ದೈವಿಗಳಾಗಿದ್ದಾರೆ. ಮುನ್ನಿ ತವರು ಮನೆಯಲ್ಲೇ ಈ ಕೃತ್ಯವನ್ನು ನಡೆಸಲಾಗಿದ್ದು ಘಟನೆ ಬಳಿಕ ಆರೋಪಿ ಸುಲೈಮಾನ್ ಪರಾರಿಯಾಗಿದ್ದಾನೆ. ದಂಪತಿಯ ಇನ್ನೊಂದು ಪುತ್ರಿ ತನ್ನ ಅಜ್ಜಿಯ ಜತೆ ಮಲಗಿದ್ದರಿಂದ ಬದುಕುಳಿದಿದ್ದಾಳೆ.
ಎರಡು ವರ್ಷಗಳ ಹಿಂದೆ ಮುನ್ನಿಯನ್ನು ವಿವಾಹವಾಗಿದ್ದ ಸುಲೈಮಾನ್ ಕುಷ್ಟಗಿಯ ಬ್ಯಾಂಕ್‌ವೊಂದರಲ್ಲಿ ಕಾವಲುಗಾರನಾಗಿದ್ದ. ಮದುವೆ ಸಮಯದಲ್ಲಿ ವರದಕ್ಷಿಣೆ ತೆಗೆದುಕೊಂಡಿದ್ದ ಆತ ಮತ್ತೆ ವರದಕ್ಷಿಣೆ ತರುವಂತೆ ಪತ್ನಿಯನ್ನು ಪೀಡಿಸುತ್ತಿದ್ದ. ಜತೆಗೆ ಆಕೆಯ ಮೇಲೆ ಅನುಮಾನವನ್ನು ಹೊಂದಿದ್ದ. ಕಿರುಕುಳ ಸಂಬಂಧ ಈ ಹಿಂದೆ ಕೂಡ ಕುಷ್ಟಗಿ ಠಾಣೆಯಲ್ಲಿ ಸುಲೈಮಾನ್ ವಿರುದ್ಧ ಪ್ರಕರಣ ದಾಖಲಾಗಿತ್ತು ಎಂದು ಮುನ್ನಿ ಕುಟುಂಬಸ್ಥರು ತಿಳಿಸಿದ್ದಾರೆ.
ಹೆರಿಗೆಗಾಗಿ ತವರು ಮನೆಗೆ ಬಂದಿದ್ದ ಮುನ್ನಿ ತನ್ನ ಸಹೋದರನ ಮದುವೆ ಹಿನ್ನೆಲೆಯಲ್ಲಿ ಅಲ್ಲೇ ಉಳಿದುಕೊಂಡಿದ್ದರು.
ಮೂರು ದಿನಗಳ ಹಿಂದಷ್ಟೇ ಪತ್ನಿ ತವರಿಗೆ ಬಂದಿದ್ದ ಸುಲೈಮಾನ್ ಮಂಗಳವಾರ ನಸುಕಿನ ಜಾವದಲ್ಲಿ ಕೊಲೆ ನಡೆಸಿ ಪರಾರಿಯಾಗಿದ್ದಾನೆ.
ಕೊಪ್ಪಳ ನಗರ ಪೊಲೀಸ್ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದೆ.
