ಹೊಸ ವಾಹನ ಖರೀದಿ ಮಾಡುವವರಿಗೆ ರಾಜ್ಯ ಸರ್ಕಾರದಿಂದ ಶಾಕ್: ಇನ್ನು ಇದೂ ದುಬಾರಿ

ಬೆಂಗಳೂರು: ಹೊಸ ವಾಹನ ಖರೀದಿ ಮಾಡಬೇಕೆಂದು ಪ್ಲ್ಯಾನ್ ಮಾಡಿಕೊಂಡವರಿಗೆ ರಾಜ್ಯ ಸರ್ಕಾರ ಹೊಸ ಶಾಕ್ ಕೊಟ್ಟಿದೆ. ಇನ್ನು ಇದೂ ದುಬಾರಿ ಆಗಲಿದೆ.

ಹೊಸದಾಗಿ ಕಾರು, ಬೈಕ್ ಖರೀದಿಸುವವರಿಗೆ ರಾಜ್ಯ ಸರ್ಕಾರ ಹೆಚ್ಚುವರಿ ಸೆಸ್ ವಿಧಿಸಲು ಮುಂದಾಗಿದೆ. ಇದು ಫೆಬ್ರವರಿ 1 ರಿಂದ ಜಾರಿಗೆ ಬರಲಿದೆ. ಆದರೆ ಒಂದೇ ಒಂದು ಸಮಾಧಾನಕರ ವಿಷಯವೆಂದರೆ ಯೆಲ್ಲೋ ಬೋರ್ಡ್ ವಾಹನಗಳಿಗೆ ಇದು ಅನ್ವಯವಾಗುವುದಿಲ್ಲ.

ಫೆಬ್ರವರಿ 1 ರಿಂದ ಕಾರುಗಳಿಗೆ 1000 ರೂ. ಮತ್ತು ಬೈಕ್ ಗಳಿಗೆ 500 ರೂ.ಗಳಷ್ಟು ಸೆಸ್ ವಿಧಿಸಲಾಗುತ್ತದೆ. ಈಗಾಗಲೇ ಸಾರಿಗೆ ಇಲಾಖೆಗೆ ಕಾರು, ಬೈಕ್ ಖರೀದಿಸುವಾಗ ಸುಮಾರು 10 ಸಾವಿರ ರೂ.ಗಳಷ್ಟು ರೋಡ್ ಟ್ಯಾಕ್ಸ್ ತೆರಬೇಕಾಗುತ್ತದೆ. ಎಲ್ಲಾ ತೆರಿಗೆ ಸೇರಿ ಒಂದು ಬೈಕ್ ಖರೀದಿ ಮಾಡುವಷ್ಟರಲ್ಲೇ ಸಾಮಾನ್ಯ ಜನರಿಗೆ ಉಸ್ಸಪ್ಪಾ ಎನ್ನುವಷ್ಟಾಗುತ್ತದೆ. ಅದರ ಮೇಲಿಂದ ಈಗ ಹೆಚ್ಚುವರಿ ಸೆಸ್ ವಿಧಿಸಲು ಮುಂದಾಗಿದೆ.

ಈ ಹಣವನ್ನು ಕಾರ್ಮಿಕರ ನಿಧಿಗೆ ಬಳಸಲು ಉಪಯೋಗಿಸಲಾಗುತ್ತದೆ ಎಂದು ಸರ್ಕಾರ ಸಮಜಾಯಿಷಿ ನೀಡಿದೆ. ಆದರೆ ಈಗಾಗಲೇ ಸಾಮಾನ್ಯ ಜನರು ದಿನನಿತ್ಯ ಬಳಸುವ ಹಲವು ವಸ್ತುಗಳ ಮೇಲೆ ಒಂದಿಲ್ಲೊಂದು ಕಾರಣ ನೀಡಿ ದರ ಏರಿಕೆ ಮಾಡುತ್ತಿರುವುದು ಜನ ಸಾಮಾನ್ಯರಿಗೆ ದೈನಂದಿನ ಜೀವನೇ ಹೊರೆಯಾಗುತ್ತಿದೆ.