ಬಿಪಿಎಲ್ ಕಾರ್ಡ್ ನಂತೆ ಮೀಸಲಾತಿಯೂ ಉಳ್ಳವರಿಗೆ ಸಿಗಬಾರದು ಎಂಬ ಎಚ್ ವಿಶ್ವನಾಥ್ ಸಲಹೆಗೆ ನೀವೇನಂತೀರಿ

ಬೆಂಗಳೂರು: ಇದೀಗ ರಾಜ್ಯ ಸರ್ಕಾರ ಕೇಂದ್ರ ಸರ್ಕಾರದ ಸೂಚನೆಯಂತೆ ಬಿಪಿಎಲ್ ಕಾರ್ಡ್ ನಲ್ಲಿ ಉಳ್ಳವರನ್ನು ಕಿತ್ತು ಹಾಕಿ ಬಡವರಿಗೆ ಮಾತ್ರ ಸಿಗುವಂತೆ ಕ್ರಮ ಕೈಗೊಳ್ಳುತ್ತಿದೆ. ಇದೇ ರೀತಿ ಮೀಸಲಾತಿಯಲ್ಲೂ ಉಳ್ಳವರಿಗೆ ಸಿಗಬಾರದು ಎಂದು ವಿಧಾನ ಪರಿಷತ್ ಸದಸ್ಯ ಎಚ್ ವಿಶ್ವನಾಥ್ ಆಗ್ರಹಿಸಿದ್ದಾರೆ. ಇದಕ್ಕೆ ನೀವೆನಂತೀರಿ?

ಬಿಪಿಎಲ್ ಕಾರ್ಡ್ ನಲ್ಲಿ ಎಷ್ಟೋ ಮಂದಿ ಶ್ರೀಮಂತರೂ ತಪ್ಪು ಮಾಹಿತಿ ನೀಡಿ ಲಾಭ ಪಡೆಯುತ್ತಿದ್ದಾರೆ ಎನ್ನುವುದು ಬೆಳಕಿಗೆ ಬಂದಿದೆ. ಹೀಗಾಗಿ ರಾಜ್ಯ ಸರ್ಕಾರ ಬಡವರಿಗೆ ಇದರ ಅನುಕೂಲ ಸಿಗುವಂತಾಗಬೇಕು ಎಂಬ ಉದ್ದೇಶದಿಂದ ಕೆಲವು ಮಾನದಂಡಗಳನ್ನು ವಿಧಿಸಿ ಶ್ರೀಮಂತರನ್ನು ಬಿಪಿಎಲ್ ಪಟ್ಟಿಯಿಂದ ಕೈ ಬಿಡುತ್ತಿದೆ. ಇದು ನಿಜಕ್ಕೂ ಶ್ಲಾಘನೀಯ ಕೆಲಸ.

ಅದೇ ರೀತಿ ಮೀಸಲಾತಿಯಲ್ಲೂ ಇಂತಹದ್ದೊಂದು ಕ್ರಮವಾಗಬೇಕು ಎಂದು ವಿಶ್ವನಾಥ್ ಸಲಹೆ ನೀಡಿದ್ದಾರೆ. ಮೀಸಲಾತಿಯಲ್ಲೂ ಉಳ್ಳವರು ಮೀಸಲಾತಿ ಬಿಟ್ಟು ಕೊಡಬೇಕು. ಉಳ್ಳವರಿಗೆ ಮೀಸಲಾತಿ ತೆಗೆದು ಹಾಕುವ ಕಾಯ್ದೆಯನ್ನು ಸರ್ಕಾರ ಜಾರಿಗೆ ತರಬೇಕು ಎಂದು ಅವರು ಆಗ್ರಹಿಸಿದ್ದಾರೆ.

ಈಗಿರುವ ಪ್ರಕಾರ ನೀವು ಎಷ್ಟೇ ಶ್ರೀಮಂತರಾಗಿದ್ದರೂ ಪರಿಶಿಷ್ಟ ಜಾತಿ/ ಪಂಗಡ ಎಂಬಂತೆ ಮೀಸಲಾತಿ ಅನ್ವಯವಾಗುವ ಸಮುದಾಯದವರಾಗಿದ್ದರೆ ನಿಮಗೆ ಎಲ್ಲಾ ಕ್ಷೇತ್ರದಲ್ಲೂ ಮೀಸಲಾತಿ ಸಿಗುತ್ತದೆ. ಆದರೆ ಮೀಸಲಾತಿ ಇಲ್ಲದ ಒಂದು ಜಾತಿಗೆ ಸೇರಿದ ಬಡ ವ್ಯಕ್ತಿಯೂ ಅವಕಾಶ ವಂಚಿತನಾಗುತ್ತಿದ್ದಾನೆ. ಇಂತಹ ಅಸಮಾನತೆ ಹೋಗಲಾಡಿಸಲು ಮೀಸಲಾತಿಯಲ್ಲೂ ಉಳ್ಳವರು ಬಿಟ್ಟುಕೊಡುವ ಪದ್ಧತಿ ಬಂದರೆ ಹೇಗಿರುತ್ತದೆ? ನಿಮ್ಮ ಅಭಿಪ್ರಾಯ ಹಂಚಿಕೊಳ್ಳಿ.