ಸಿಎಂ ಕುರ್ಚಿ ಬಗ್ಗೆ ಕೇಳಿದ್ದಕ್ಕೆ ಸಿದ್ದರಾಮಯ್ಯಗೆ ಕೋಪ

ಬೆಂಗಳೂರು: ಇನ್ನು ಐದು ವರ್ಷ ನೀವೇ ಸಿಎಂ ಅಂತಲ್ವಾ ಎಂದು ಮಾಧ್ಯಮಗಳು ಪ್ರಶ್ನೆ ಕೇಳಿದಾಗಿ ಸಿದ್ದರಾಮಯ್ಯ ಪಿತ್ತ ನೆತ್ತಿಗೇರಿಸಿಕೊಂಡು ರೇಗಾಡಿದ ಘಟನೆ ನಡೆದಿದೆ.

ರಾಜ್ಯದಲ್ಲಿ ಪದೇ ಪದೇ ಸಿಎಂ ಬದಲಾವಣೆ ಬಗ್ಗೆ  ಚರ್ಚೆಯಾಗುತ್ತಿದೆ. ಈ ನಡುವೆ ಇಂದು ಸ್ವತಃ ಸಿಎಂ ಸಿದ್ದರಾಮಯ್ಯ ಪುತ್ರ ಯತೀಂದ್ರ ಸಿಎಂ ಬದಲಾವಣೆಯಿಲ್ಲ, ಐದು ವರ್ಷಕ್ಕೂ ತಮ್ಮ ತಂದೆಯವರೇ ಸಿಎಂ ಎಂದಿದ್ದರು.

ಇದರ ಬೆನ್ನಲ್ಲೇ ಇಂದು ಸಿಎಂ ಸಿದ್ದರಾಮಯ್ಯಗೇ ಮಾಧ್ಯಮಗಳು ಈ ಪ್ರಶ್ನೆ ಕೇಳಿದಾಗ ಅವರು ಸಿಟ್ಟಾದರು. ಯಾರೀ ಹೇಳಿದ್ದು ನಿಮಗೆ?  ಈ ಪ್ರಶ್ನೆ ನನ್ನ ಬಳಿ ಕೇಳಬೇಡಿ ಎಂದು ಎಷ್ಟು ಸಾರಿ ಹೇಳಬೇಕು ಎಂದು ಸಿಟ್ಟಿನಿಂದಲೇ ಕೇಳಿದರು.

ಆದರೆ ಆಗ ಮಾಧ್ಯಮಗಳು ಈ ವಿಚಾರವನ್ನು ನಿಮ್ಮ ಪುತ್ರನೇ ಹೇಳಿದ್ದು ಎಂದಾಗ ಸಿಎಂ ಕೋಪ ಶಾಂತವಾಯಿತು. ಬಳಿಕ ಮಾತನಾಡಿದ ಅವರು ‘ನೋಡ್ರೀ ನಮ್ಮಲ್ಲಿ ಹೈಕಮಾಂಡ್ ತೀರ್ಮಾನವೇ ಅಂತಿಮ. ಅವರು ತೆಗೆದುಕೊಳ್ಳುವ ನಿರ್ಧಾರಗಳಿಗೆ ನಾವು ಬದ್ಧರಾಗಿರುತ್ತೇವೆ’ ಎಂದು ಸಿದ್ದರಾಮಯ್ಯ ಹೇಳಿದ್ದಾರೆ.