ಬೆಳಗು

ರಜನಿ

ಕೆಂಪು ಆಗಸವಿತ್ತು
ಹಕ್ಕಿಗಳ ಚಿಲಿಪಿಲಿಯಿತ್ತು
ಗಾಳಿಯು ನಯವಾಗಿ ಬೀಸುತ್ತಿತ್ತು

ಹೂವದುವು ಅರಳಿತ್ತು
ಕಂಪನ್ನು ಸೂಸಿತ್ತು
ಇಬ್ಬನಿಯು ಹೂಗಳಿಗೆ ಮುತ್ತಿಡುತಲಿತ್ತು

ಕೋಗಿಲೆಯು ಹಾಡಿತ್ತು
ಚಿಟ್ಟೆಯದು ಹಾರಿತ್ತು
ದುಂಬಿಯದು ಮಕರಂದ ಹೀರುತ್ತಿತ್ತು

ಶಬ್ಧಗಳು ಅಡಗಿತ್ತು
ಮೌನವೆಲ್ಲೆಡೆ ತುಂಬಿತ್ತು
ಪ್ರಾರ್ಥನೆಯ ನಿನಾದ ಕೇಳಿ ಬರುತ್ತಿತ್ತು

ಲೋಕವದು ಏಳುತ್ತಿತ್ತು
ಮುಖದಲ್ಲಿ ನಗುವಿತ್ತು
ಉತ್ಸಾಹದ ಚಿಲುಮೆ ಚಿಮ್ಮುತ್ತಿತ್ತು

ಪದಪುಂಜ ಸಿಗುತ್ತಿಲ್ಲ
ವರ್ಣಿಸಲೆ ಆಗುತ್ತಿಲ್ಲ
ಆ ಬೆಳಗ ಶುಭವಾದ ನೋಟವನ್ನೆಲ್ಲ

ಆ ಬೆಳಗು ಬಲು ಸೊಗಸು
ಅರಳುವುದು ಆಗಲೇ ಮನಸು
ಮೂಡುವುದು ನೂರಾರು ಕನಸು

ಆಸ್ವಾದಿಸಲು ಬನ್ನಿ
ಒಗ್ಗೂಡಿ ಬನ್ನಿ
ಆ ಬೆಳಗ ಸೊಗಸನ್ನು ನೋಡಬನ್ನಿ