ಬುರ್ಜ್ ಖಲೀಫಾದಲ್ಲಿ ಇಂದು ಕಿಚ್ಚ ಸುದೀಪ್ ವಿಕ್ರಾಂತ್ ರೋಣ ಅವತಾರ ಬಹಿರಂಗ

ದುಬೈ: ಕನ್ನಡ ಸಿನಿಮಾವೊಂದು ಈಗ ಅಂತಾರಾಷ್ಟ್ರೀಯ ಮಟ್ಟದಲ್ಲಿ ಮಿಂಚುತ್ತಿರುವುದು ನಮಗೆಲ್ಲರಿಗೂ ಹೆಮ್ಮೆಯ ಸಂಗತಿ. ಇಂದು ಅಂತಹದ್ದೇ ಒಂದು ಸಂತಸದ ಕ್ಷಣಕ್ಕೆ ದುಬೈನ ಬುರ್ಜ್ ಖಲೀಫಾ ಸಾಕ್ಷಿಯಾಗಲಿದೆ.

ಕಿಚ್ಚ ಸುದೀಪ್ ಅಭಿನಯದ ವಿಕ್ರಾಂತ್ ರೋಣ ಸಿನಿಮಾದ ಟೈಟಲ್ ಲೋಗೋ ಇಂದು ದುಬೈನ ಅತ್ಯಂತ ಎತ್ತರದ ಕಟ್ಟದ ಬುರ್ಜ್ ಖಲೀಫಾದಲ್ಲಿ ಅನಾವರಣಗೊಳ್ಳಲಿದೆ. ಕಿಚ್ಚ ಸುದೀಪ್ ರ ವಿಕ್ರಾಂತ್ ರೋಣ ಪಾತ್ರದ ಸರಿಸುಮಾರು 2000 ಅಡಿ ಕಟೌಟ್ ಇಂದು ರಾತ್ರಿ 9 ಗಂಟೆಗೆ ಅನಾವರಣಗೊಳ್ಳಲಿದೆ. ಇದು ಕಿಚ್ಚ ಸುದೀಪ್ ಸಾಮಾಜಿಕ ಜಾಲತಾಣದಲ್ಲಿ ಲೈವ್ ಆಗಿ ಪ್ರಸಾರವಾಗಲಿದೆ. ಈ ಕಟೌಟ್ ಕಟ್ಟಡದಲ್ಲಿ ಅನಾವರಣಗೊಳಿಸಲು ಚಿತ್ರತಂಡ ಸಾಕಷ್ಟು ಶ್ರಮಪಟ್ಟಿದೆಯಂತೆ. ಅವರ ಶ್ರಮದ ಪ್ರತಿಫಲ ಇಂದು ತಿಳಿದುಬರಲಿದೆ. ಸುದೀಪ್ ಚಿತ್ರ ಜೀವನಕ್ಕೆ 25 ವರ್ಷ ತುಂಬಿದ ಹಿನ್ನಲೆಯಲ್ಲಿ ವಿಕ್ರಾಂತ್ ರೋಣ ತಂಡ ಈ ವಿಶೇಷ ಗೌರವ ನೀಡುತ್ತಿದೆ.