ಸ್ಯಾಂಡಲ್ ವುಡ್ ನಲ್ಲಿ ಇಂದು ಒಂದೇ ದಿನ ಮೂರು ಸಿನಿಮಾ ರಿಲೀಸ್

ಬೆಂಗಳೂರು: ಒಂದೇ ದಿನ ಹಲವು ಸಿನಿಮಾಗಳು ರಿಲೀಸ್ ಆಗುವುದರಿಂದ ಪ್ರೇಕ್ಷಕ ಯಾವ ಸಿನಿಮಾ ನೋಡಬೇಕೆಂಬ ಗೊಂದಲಕ್ಕೆ ಬೀಳುತ್ತಾನೆ. ಕೊನೆಗೆ ಯಾವ ಸಿನಿಮಾವೂ ಗಳಿಕೆಯಲ್ಲಿ ಹೆಚ್ಚು ಸಾಧನೆ ಮಾಡುವುದಿಲ್ಲ.

ಇಂದೂ ಅದೇ ರೀತಿ ಆಗುತ್ತಿದೆ. ನವಂಬರ್ 24 ರಂದು ಬಹುಶಃ ಸ್ಯಾಂಡಲ್ ವುಡ್ ಸಿನಿಮಾಗಳಿಗೆ ಒಳ್ಳೆಯ ಮುಹೂರ್ತವೆನಿಸುತ್ತದೆ. ಇದೇ ಕಾರಣಕ್ಕೆ ಇಂದು ಒಟ್ಟು ಮೂರು ಪ್ರಮುಖ ಸಿನಿಮಾಗಳು ಬಿಡುಗಡೆಯಾಗಿವೆ.

ರಾಜ್ ಬಿ ಶೆಟ್ಟಿ ನಟಿಸಿರುವ, ರಮ್ಯಾ ನಿರ್ಮಾಣದ ಸ್ವಾತಿ ಮುತ್ತಿನ ಮಳೆ ಹನಿಯೇ ಎಂಬ ಭಾವನಾತ್ಮಕ ರೊಮ್ಯಾಂಟಿಕ್ ಸಿನಿಮಾ ಇಂದು ಬಿಡುಗಡೆಯಾಗಿದೆ. ಮೊದಲಿಗೆ ಇದು ಒಟಿಟಿಯಲ್ಲಿ ಬಿಡುಗಡೆಯಾಗುವದೆಂದಿತ್ತು. ಆದರೆ ಇದೀಗ ಥಿಯೇಟರ್ ನಲ್ಲಿ ಬಿಡುಗಡೆ ಮಾಡಲಾಗಿದೆ.

ಇದಲ್ಲದೆ, ಅಭಿಷೇಕ್ ಅಂಬರೀಶ್ ಅಭಿನಯದ ಬ್ಯಾಡ್ ಮ್ಯಾನರ್ಸ್ ಎಂಬ ಪಕ್ಕಾ ಮಾಸ್ ಸಿನಿಮಾ ಇಂದು ಬಿಡುಗಡೆಯಾಗುತ್ತಿದೆ. ಈ ಸಿನಿಮಾಗೆ ಖ್ಯಾತ ನಿರ್ದೇಶಕ ದುನಿಯಾ ಸೂರಿ ನಿರ್ದೇಶನವಿದೆ. ಹೀಗಾಗಿ ಮಾಸ್ ಪ್ರೇಕ್ಷಕರಿಗೆ ಈ ಸಿನಿಮಾ ಖಂಡಿತಾ ಇಷ್ಟವಾಗುತ್ತದೆ.

ಇದಲ್ಲದೆ, ಫ್ಯಾಮಿಲಿ ಅಡಿಯನ್ಸ್ ಸೆಳೆಯುವ ಸಿನಿಮಾಗಳನ್ನು ಮಾಡಿಕೊಂಡು ಬಂದಿರುವ ಡಾರ್ಲಿಂಗ್ ಕೃಷ್ಣ ನಾಯಕರಾಗಿರುವ ಶುಗರ್ ಫ್ಯಾಕ್ಟರಿ ಇಂದು ಬಿಡುಗಡೆಯಾಗಿದೆ. ಇದರ ಜೊತೆಗೆ ಪರಭಾಷಾ ಸಿನಿಮಾಗಳಾದ ಆದಿಕೇಶವ (ತೆಲುಗು), ಬಿಲ್ಡಪ್ (ತಮಿಳು) ಕೂಡಾ ಇಂದೇ ಬಿಡುಗಡೆಯಾಗುತ್ತಿದೆ.