ರಶ್ಮಿಕಾಗೆ ಅವಹೇಳನ ಮಾಡಿದವರ ವಿರುದ್ಧ ರಕ್ಷಿತ್ ಶೆಟ್ಟಿ ಗರಂ

ಬೆಂಗಳೂರು: ತಮ್ಮ ಬರ್ತ್ ಡೇ ದಿನವೇ ಚಾರ್ಲಿ 777 ಸಿನಿಮಾ ಟೀಸರ್ ಬಿಡುಗಡೆಯ ಖುಷಿ ಒಂದಾದರೆ, ರಕ್ಷಿತ್ ಶೆಟ್ಟಿಗೆ ಕೆಲವು ನೆಟ್ಟಿಗರು ನೋವು ಕೂಡಾ ನೀಡಿದ್ದಾರೆ.

ಚಾರ್ಲಿ 777 ಸಿನಿಮಾದಲ್ಲಿ ಒಂದೂ ಡೈಲಾಗ್ ಇಲ್ಲದೇ ಕೇವಲ ನಾಯಿಯನ್ನು ಬಳಸಿಕೊಂಡು ಟೀಸರ್ ಮಾಡಲಾಗಿದೆ. ಇದನ್ನು ನೋಡಿ ನೆಟ್ಟಿಗರು ಫಿದಾ ಆಗಿದ್ದಾರೆ. ಕೆಲವರು ರಶ್ಮಿಕಾ-ರಕ್ಷಿತ್ ಶೆಟ್ಟಿ ಬ್ರೇಕ್ ಅಪ್ ವಿಚಾರವನ್ನು ಎಳೆದು ತಂದಿದ್ದು, ‘ಒಂದು ನಾಯಿಯನ್ನು ಫೇಮಸ್ ಮಾಡಿದವರಿಗೆ ಈ ನಾಯಿಯನ್ನು ಫೇಮಸ್ ಮಾಡುವುದು ಕಷ್ಟವಲ್ಲ ಬಿಡಿ’ ಎಂದು ಪೋಸ್ಟ್ ಹರಿಯಬಿಟ್ಟಿದ್ದರು. ನಿನ್ನೆ ಸಂಜೆ ಲೈವ್ ಬಂದಿದ್ದ ರಕ್ಷಿತ್ ಶೆಟ್ಟಿಗೂ ಹಲವರು ರಶ್ಮಿಕಾ ಬಗ್ಗೆ ಕೆಟ್ಟದಾಗಿ ಕಾಮೆಂಟ್ ರವಾನಿಸಿದ್ದರು.

ಈ ಬಗ್ಗೆ ಲೈವ್ ನಲ್ಲಿಯೇ ರಕ್ಷಿತ್ ತಿರುಗೇಟು ಕೊಟ್ಟಿದ್ದಾರೆ. ‘ಸುಮಾರು ಜನ ಕೆಲವೊಂದು ಬೇಸರ ಹುಟ್ಟಿಸುವ ಕಾಮೆಂಟ್ ಮಾಡುತ್ತಿದ್ದಾರೆ. ಇದು ನನ್ನ ಬಗ್ಗೆ ಅಲ್ಲ, ಬೇರೆಯವರ ಬಗ್ಗೆ. ಹಳೆಯದನ್ನು ಅಲ್ಲಿಗೇ ಬಿಡಿ. ಅದರ ಬಗ್ಗೆ ಮಾತನಾಡಿ ಪ್ರಯೋಜನವಿಲ್ಲ. ಯಾವುದೇ ವ್ಯಕ್ತಿಯನ್ನು ಅಗೌರವಯುತವಾಗಿ ಕಾಣುವುದು ಬೇಡ. ಎಲ್ಲರಿಗೂ ಅವರದ್ದೇ ಆದ ಜೀವನವಿದೆ. ಅದನ್ನು ಗೌರವಿಸೋಣ. ನಮ್ಮ ಬಗ್ಗೆ ಅಸಹ್ಯ ಪಡುವ ಹಾಗೆ ಕಾಮೆಂಟ್ ಮಾಡುವುದು ಬೇಡ. ಎಲ್ಲರೂ ಮೊದಲು ಮಾನವರಾಗೋಣ’ ಎಂದು ಖಡಕ್ ಆಗಿ ಹೇಳಿದ್ದಾರೆ.