ಬೆಂಗಳೂರು: ಪುನೀತ್ ರಾಜ್ ಕುಮಾರ್ ತಮ್ಮ ಹೋಂ ಬ್ಯಾನರ್ ನಲ್ಲಿ ನಿರ್ಮಿಸಿರುವ ಮಾಯಾಬಜಾರ್ 2016 ಸಿನಿಮಾದ ಟೀಸರ್ ನಿನ್ನೆ ಸಂಜೆ ಬಿಡುಗಡೆಯಾಗಿದೆ.
ಈ ಟೀಸರ್ ನೋಡಿ ವೀಕ್ಷಕರು ಮೆಚ್ಚುಗೆ ವ್ಯಕ್ತಪಡಿಸಿದ್ದು, ಭಾರೀ ಲೈಕ್ಸ್ ಪಡೆದಿದೆ. ವಸಿಷ್ಠ ಸಿಂಹ, ರಾಜ್ ಬಿ ಶೆಟ್ಟಿ, ಪ್ರಕಾಶ್ ರಾಜ್, ಸುಧಾರಾಣಿ ಮತ್ತು ಚೈತ್ರಾ ರಾವ್ ಮುಂತಾದವರು ಪ್ರಮುಖ ಪಾತ್ರದಲ್ಲಿ ನಟಿಸಿದ್ದಾರೆ. ವಿಶೇಷವೆಂದರೆ ಈ ಸಿನಿಮಾದಲ್ಲಿ ನಾಯಕ-ನಾಯಕಿ ಎಂದೆಲ್ಲಾ ಯಾರೂ ಇಲ್ಲ. ಕತೆಯೇ ಹೀರೋ.
ಈ ಟೀಸರ್ ನೋಡುತ್ತಿದ್ದರೆ ಇದು ನೋಟು ಅಮಾನ್ಯೀಕರಣದ ಸುತ್ತ ಹಣೆಯಲಾದ ಕತೆಯೆಂಬಂತೆ ತೋರುತ್ತಿದೆ. ಟೀಸರ್ ನ ಆರಂಭದಲ್ಲೇ ಪ್ರಧಾನಿ ಮೋದಿ ನೋಟು ನಿಷೇಧ ಮಾಡುತ್ತಿರುವ ಬಗ್ಗೆ ಅಂದು ಮಾಡಿದ್ದ ಭಾಷಣದ ತುಣುಕು ಕೇಳಿಬರುತ್ತದೆ. ಜತೆಗೆ ಪೋಸ್ಟರ್ ನಲ್ಲಿರುವ ಎಟಿಎಂ ಮಿಷನ್ ನೋಡಿದರೆ ಇದು ನೋಟು ಅಮಾನ್ಯೀಕರಣದ ಸುತ್ತ ಹಣೆಯಲಾದ ಕತೆ ಎನಿಸುತ್ತದೆ. ಡಿಸೆಂಬರ್ ನಲ್ಲಿ ಈ ಸಿನಿಮಾ ಬಿಡುಗಡೆಯಾಗುವ ನಿರೀಕ್ಷೆಯಿದೆ.