ಕಿರುತೆರೆಗೆ ಬರ್ತಿದ್ದಾರೆ ನಟಿ ಪ್ರೇಮಾ

Photo Courtesy: Instagram

ಬೆಂಗಳೂರು: ಹಿರಿತೆರೆಯಲ್ಲಿ ಕನ್ನಡದ ಘಟಾನುಘಟಿ ಸ್ಟಾರ್ ಗಳಿಗೆ ನಾಯಕಿಯಾಗಿ ಮಿಂಚಿದ್ದ ನಟಿ ಪ್ರೇಮಾ ಈಗ ಕಿರುತೆರೆಗೆ ಬರುತ್ತಿದ್ದಾರೆ. ಅವರು ರಿಯಾಲಿಟಿ ಶೋ ಒಂದರಲ್ಲಿ ತೀರ್ಪುಗಾರರಾಗಲಿದ್ದಾರೆ.

ಜೀ ಕನ್ನಡ ವಾಹಿನಿಯಲ್ಲಿ ಮಹಾನಟಿ ಎಂಬ ರಿಯಾಲಿಟಿ ಶೋ ನಡೆಯಲಿದೆ. ಈ ರಿಯಾಲಿಟಿ ಶೋನಲ್ಲಿ ಪ್ರತಿಭಾವಂತ ನಟಿಯರನ್ನು ಗುರುತಿಸಿ ಅವರಿಗೆ ವೇದಿಕೆ ಕಲ್ಪಿಸಲಾಗುತ್ತದೆ. ಇದೊಂದು ವಿಶಿಷ್ಟ ಪರಿಕಲ್ಪನೆಯೊಂದಿಗೆ ಮೂಡಿಬರುತ್ತಿರುವ ರಿಯಾಲಿಟಿ ಶೋ. ಸರಿಗಮಪ ಶೋ ಮುಗಿದ ಬಳಿಕ ಜೀ ಕನ್ನಡ ಮತ್ತೊಂದು ರಿಯಾಲಿಟಿ ಶೋ ನಡೆಸಿಕೊಡಲು ಮುಂದಾಗಿದೆ.

ಈ ರಿಯಾಲಿಟಿ ಶೋಗೆ ತೀರ್ಪುಗಾರರಾಗಿ ನಟಿ ಪ್ರೇಮಾ ಬರುತ್ತಿದ್ದಾರೆ. ಇದುವರೆಗೆ ಪ್ರೇಮಾ ಹಿರಿತೆರೆಯಲ್ಲಿ ಮಾತ್ರ ಮಿಂಚಿದ್ದರು. ಆದರೆ ಕಿರುತೆರೆಯಲ್ಲಿ ತೀರ್ಪುಗಾರರಾಗುತ್ತಿರುವುದು ಅವರಿಗೆ ಹೊಸ ಅನುಭವ. ಈಗಾಗಲೇ ಅವರ ಸಹೋದರ ಎನ್. ಅಯ್ಯಪ್ಪ ಕಿರುತೆರೆಯಲ್ಲಿ ರಿಯಾಲಿಟಿ ಶೋ, ಧಾರವಾಹಿಗಳಲ್ಲಿ ಸಕ್ರಿಯರಾಗಿದ್ದಾರೆ. ಇದೀಗ ಅಕ್ಕನ ಸರದಿ.

ಒಂದು ಕಾಲದಲ್ಲಿ ಸಾಹಸಸಿಂಹ ವಿಷ್ಣುವರ್ಧನ್ ರಿಂದ ಹಿಡಿದು, ರವಿಚಂದ್ರನ್, ಶಿವರಾಜ್ ಕುಮಾರ್, ರಮೇಶ್ ಸೇರಿದಂತೆ ಹೆಚ್ಚಿನ ಘಟಾನುಘಟಿ ಹೀರೋಗಳಿಗೆ ಹೀರೋಯಿನ್ ಆಗಿದ್ದ ಪ್ರೇಮಾ ನಂ.1 ನಾಯಕಿಯಾಗಿ ಮಿಂಚಿದ್ದವರು. ಈಗ ಮಹಾನಟಿ ರಿಯಾಲಿಟಿ ಶೋಗೆ ಅವರನ್ನು ತೀರ್ಪುಗಾರರನ್ನಾಗಿ ಮಾಡಿರುವುದು ಸರಿಯಾದ ಆಯ್ಕೆಯಾಗಿದೆ. ಸದ್ಯಕ್ಕೆ ವಾಹಿನಿ ಅವರ ಪ್ರೋಮೋ ಶೂಟ್ ಮಾಡಿದ್ದು, ಈ ತೀರ್ಪುಗಾರರು ಯಾರು ಎಂದು ಗೆಸ್ ಮಾಡಲು ವೀಕ್ಷಕರಿಗೆ ಕೇಳಿದೆ. ಸದ್ಯದಲ್ಲೇ ಅಧಿಕೃತವಾಗಿ ಪ್ರೋಮೋ ಹೊರಬಿಡಲಿದೆ.