Publish Date: Thu, 10 Sep 2026 (14:32 IST)
Updated Date: Thu, 10 Sep 2026 (14:37 IST)
ಸಾಮಾನ್ಯವಾಗಿ ಆಪಲ್ ಹೊಸ ಆವೃತ್ತಿಯ ಐಫೋನ್ ಬಿಡುಗಡೆ ಮಾಡಿದ ತಕ್ಷಣ, ಹಳೆಯ ಮಾಡೆಲ್ಗಳ ಬೆಲೆ ಗಣನೀಯವಾಗಿ ಕಡಿಮೆಯಾಗುವುದು ದಶಕಗಳಿಂದ ನಡೆದುಬಂದ ಸಂಪ್ರದಾಯ. ಆದರೆ, ಈ ಬಾರಿ ಆಪಲ್ ಸಂಸ್ಥೆಯು ಐಫೋನ್ 18 ಸರಣಿಯನ್ನು ಬಿಡುಗಡೆ ಮಾಡಿದ ಬೆನ್ನಲ್ಲೇ, ಕಳೆದ ವರ್ಷದ ಐಫೋನ್ 17 ಮತ್ತು ಐಫೋನ್ 16 ಬೆಲೆಗಳನ್ನು ಇಳಿಸುವ ಬದಲು ಭಾರತದಲ್ಲಿ ದಿಢೀರ್ ಆಗಿ ಭಾರಿ ಪ್ರಮಾಣದಲ್ಲಿ ಏರಿಕೆ ಮಾಡಿದೆ!
ಐಫೋನ್ 17 ಬೆಲೆ ಕಡಿತವಾಗಬಹುದು ಎಂದು ಕಾಯುತ್ತಿದ್ದ ಗ್ರಾಹಕರಿಗೆ ಈ ನಿರ್ಧಾರ ದೊಡ್ಡ ಆಘಾತ ನೀಡಿದ್ದು, ಸೋಷಿಯಲ್ ಮೀಡಿಯಾದಲ್ಲಿ ನೆಟ್ಟಿಗರು ಟ್ರೋಲ್ ಹಾಗೂ ಮೀಮ್ಸ್ಗಳ ಮೂಲಕ ಆಪಲ್ ಕಂಪನಿಯ ಕಾಲೆಳೆಯುತ್ತಿದ್ದಾರೆ.
ಹಳೆಯ ಮಾಡೆಲ್ಗಳ ನೂತನ ಬೆಲೆ ಏರಿಕೆ ಹೀಗಿದೆ
ಐಫೋನ್ 17 (256GB): ಆರಂಭಿಕ ಬೆಲೆ 82,900 ರೂ. ಇತ್ತು, ಆದರೆ ಈಗ ನೇರವಾಗಿ 17,000 ರೂ. ಏರಿಕೆಯಾಗಿ 99,900 ರೂ. ತಲುಪಿದೆ.
ಐಫೋನ್ 16: 69,900 ರೂ. ನಿಂದ 89,900 ರೂ. ಗೆ ಏರಿಕೆಯಾಗಿದೆ (20,000 ರೂ. ಹೆಚ್ಚಳ).
ಐಫೋನ್ 17e: 64,900 ರೂ. ನಿಂದ 79,900 ರೂ. ತಲುಪಿದೆ.
ಐಫೋನ್ ಏರ್): 1,19,900 ರೂ. ನಿಂದ ಬರೋಬ್ಬರಿ 30,000 ರೂ. ಹೆಚ್ಚಾಗಿ 1,49,900 ರೂ. ತಲುಪಿದೆ.
ಐಫೋನ್ 17 ಬೆಲೆ ಏರಿಕೆಗೆ ನಿಜವಾದ ಕಾರಣವೇನು?
ಹೊಸ ಫೋನ್ ಬಂದರೂ ಹಳೆಯ ಐಫೋನ್ ಬೆಲೆ ಹೆಚ್ಚಾಗಲು ಮುಖ್ಯ ಕಾರಣ "ಚಿಪ್ಫ್ಲೇಷನ್" ಹಾಗೂ ವಿಶ್ವದಾದ್ಯಂತ ಎದುರಾಗಿರುವ RAM ಮತ್ತು ಮೆಮೊರಿ ಚಿಪ್ಗಳ ತೀವ್ರ ಅಭಾವ (RAM & Memory Shortage).
ಆರ್ಟಿಫಿಶಿಯಲ್ ಇಂಟೆಲಿಜೆನ್ಸ್ ಬೂಮ್: ವಿಶ್ವದಾದ್ಯಂತ ಕೃತಕ ಬುದ್ಧಿಮತ್ತೆ (AI) ತಂತ್ರಜ್ಞಾನವು ಅತ್ಯಂತ ವೇಗವಾಗಿ ಬೆಳೆಯುತ್ತಿದೆ. ಬೃಹತ್ ಡೇಟಾ ಸೆಂಟರ್ಗಳು ಮತ್ತು ಎಐ ಕಂಪನಿಗಳಿಗೆ ತಮ್ಮ ಸಿಸ್ಟಂಗಳನ್ನು ಚಲಾಯಿಸಲು ಭಾರಿ ಪ್ರಮಾಣದ DRAM ಮತ್ತು NAND ಮೆಮೊರಿ ಚಿಪ್ಗಳ ಅಗತ್ಯವಿದೆ.
ಚಿಪ್ಗಳ ಅಭಾವ ಮತ್ತು ಉತ್ಪಾದನಾ ವೆಚ್ಚ: ಮೆಮೊರಿ ತಯಾರಿಕಾ ಕಂಪನಿಗಳು ಸಾಮಾನ್ಯ ಸ್ಮಾರ್ಟ್ಫೋನ್ಗಳಿಗಿಂತ ಎಐ ಡೇಟಾ ಸೆಂಟರ್ಗಳಿಗೆ ಹೆಚ್ಚಿನ ಆದ್ಯತೆ ನೀಡಿ ಚಿಪ್ ಪೂರೈಸುತ್ತಿವೆ. ಇದರಿಂದಾಗಿ ಸ್ಮಾರ್ಟ್ಫೋನ್ ಮಾರುಕಟ್ಟೆಗೆ ಸಿಗುವ ಮೆಮೊರಿ ಚಿಪ್ಗಳ ಪೂರೈಕೆಯಲ್ಲಿ ಕೊರತೆ ಉಂಟಾಗಿ, ಚಿಪ್ಗಳ ಬೆಲೆ ಶೇ. 30 ರಿಂದ 40 ರಷ್ಟು ದುಬಾರಿಯಾಗಿದೆ.
ಆಂಡ್ರಾಯ್ಡ್ ಮಾರುಕಟ್ಟೆಗೂ ತಟ್ಟಿದ ಬಿಸಿ: ಈ ಮೆಮೊರಿ ಕೊರತೆಯು ಕೇವಲ ಆಪಲ್ಗೆ ಮಾತ್ರವಲ್ಲದೆ, ಸ್ಯಾಮ್ಸಂಗ್, ಶವೋಮಿ, ವಿವೋ ಮುಂತಾದ ಪ್ರಮುಖ ಆಂಡ್ರಾಯ್ಡ್ ಸ್ಮಾರ್ಟ್ಫೋನ್ ತಯಾರಕರ ಮೇಲೆಯೂ ತೀವ್ರ ಪರಿಣಾಮ ಬೀರಿದ್ದು, ಆಂಡ್ರಾಯ್ಡ್ ಫೋನ್ಗಳ ಬೆಲೆಯೂ ಸೈಲೆಂಟ್ ಆಗಿ ಏರಿಕೆಯಾಗುತ್ತಿದೆ.
ಸೋಷಿಯಲ್ ಮೀಡಿಯಾದಲ್ಲಿ ಮೀಮ್ಸ್ ಹಬ್ಬ!
"ಐಫೋನ್ 18 ಬಂದ ಮೇಲೆ ಐಫೋನ್ 17 ಕಮ್ಮಿ ಬೆಲೆಗೆ ತಗೋಬಹುದು ಅನ್ಕೊಂಡಿದ್ರೆ, ಈಗ ಐಫೋನ್ 17 ತಗೋಬೇಕಾದ್ರೂ ಕಿಡ್ನಿ ಮಾರಬೇಕಾದ ಪರಿಸ್ಥಿತಿ ಬಂದಿದೆ!" ಎಂದು ನೆಟ್ಟಿಗರು ಎಕ್ಸ್ (ಟ್ವಿಟರ್) ಹಾಗೂ ಇನ್ಸ್ಟಾಗ್ರಾಮ್ನಲ್ಲಿ ತರಾವಳಿ ಮೀಮ್ಸ್ ಪೋಸ್ಟ್ ಮಾಡುತ್ತಿದ್ದಾರೆ.
ಒಟ್ಟಿನಲ್ಲಿ, ಎಐ ಯುಗ ಬೆಳೆದಂತೆ ತಂತ್ರಜ್ಞಾನ ಸುಲಭವಾಗುತ್ತಿದೆಯಾದರೂ, ಗ್ರಾಹಕರ ಜೇಬಿಗೆ ಮಾತ್ರ ಇದು ಸಣ್ಣ ಮಟ್ಟದ ಕತ್ತರಿ ಹಾಕುತ್ತಿಲ್ಲ ಎಂಬುದು ಸ್ಪಷ್ಟ.
About Writer
ಕೃಷ್ಣವೇಣಿ ಕೆ
Completed bachelor degree in Journalism and communication in SDMC Ujire. 15 years of experience as journalist. Worked as sub editor and reporter. Specialties in sports, politics and entertainment.....
ಮತ್ತಷ್ಟು ಓದಿ
