ಆರ್‌ಸಿಬಿಯನ್ನು ಹುರಿದುಂಬಿಸಿದಲು ಮೊದಲ ಬಾರಿ ಸ್ಟೇಡಿಯಂಗೆ ಕಾಲಿಟ್ಟ ರಿಷಭ್ ಶೆಟ್ಟಿ

Photo Courtesy X

ಬೆಂಗಳೂರು:  ನಿನ್ನೆ ಚಿನ್ನಸ್ವಾಮಿ ಕ್ರೀಡಾಂಗಣನದಲ್ಲಿ ನಡೆದ ಆರ್‌ಸಿಬಿ ಹಾಗೂ ಚೆನ್ನೈ ನಡುವಿನ ಐಪಿಎಲ್‌ ನಿರ್ಣಾಯಕ ಪಂದ್ಯಾಟವನ್ನು ನೋಡಲು ಕಾಂತಾರ ಪ್ರೀಕ್ವೇಲ್ ಶೂಟಿಂಗ್ ಮಧ್ಯೆಯೂ ರಿಷಭ್ ಶೆಟ್ಟಿ ಹಾಜರಾದರು.

ತಮ್ಮ ನೆಚ್ಚಿನ ತಂಡ ರಾಯಲ್ ಚಾಲೆಂಜರ್ಸ್ ಬೆಂಗಳೂರು ತಂಡವನ್ನು ಹುರಿದುಂಬಿಸಲು ಡಿವೈನ್ ಸ್ಟಾರ್ ರಿಷಭ್ ಶೆಟ್ಟಿ ಮೊದಲ ಬಾರಿ ಚಿನ್ನಸ್ವಾಮಿ ಕ್ರೀಡಾಂಗಣಕ್ಕೆ ಆಗಮಿಸಿದ್ದರು. ಈ ವೇಳೆ ಆರ್‌ಸಿಬಿ ತಂಡದ ಮಾಜಿ ಆಟಗಾರ, ಯೂನಿವರ್ಸಲ್ ಬಾಸ್ ಕ್ರಿಸ್ ಗೇಲ್ ಹಾಜರಾಗಿದ್ದು, ಅವರ ಜತೆಗೆ ರಿಷಭ್ ಶೆಟ್ಟಿ ಕಾಣಿಸಿಕೊಂಡರು.

 ಈ ಬಗ್ಗೆ ಇನ್‌ಸ್ಟಾಗ್ರಾಂನಲ್ಲಿ ಫೋಟೋ ಹಂಚಿ ಬರೆದುಕೊಂಡಿರುವ ರಿಷಭ್ ಅವರು,  ಜೀವಮಾನದಲ್ಲಿ ಮೊದಲ ಬಾರಿ ಸ್ಟೇಡಿಯಂನಲ್ಲಿ ಪಂದ್ಯ ವೀಕ್ಷಿಸಿದ್ದೇನೆ.  ಆರ್‌ಸಿಬಿ ಎಂದು ಬರೆದು ಅದಕ್ಕೆ ಹಾರ್ಟ್ ಎಮೋಜಿ ಸೇರಿಸಿ ಕ್ರಿಸ್ ಗೇಲ್ ಜತೆಗಿನ ಫೋಟೋ ಹಂಚಿಕೊಂಡಿದ್ದಾರೆ.

ಇನ್ನೂ ಇವರ ಫೋಟೋ ನೋಡಿದ ನೆಟ್ಟಿಗರು ದಿಗ್ಗಜರು ಒಂದೇ ಫ್ರೇಮ್‌ನಲ್ಲಿ ಎಂದು ಹಾರ್ಟ್‌ ಎಮೋಜಿ ಕೊಟ್ಟಿದ್ದಾರೆ. ಎಲ್ಲ ದೈವದ ಇಚ್ಛೆ, ನೆಕ್ಸ್ಟ್‌ ಮ್ಯಾಚ್‌ಗೂ ಬನ್ನಿ ಶೆಟ್ರೆ ಎಂದು ಕಮೆಂಟ್ ಮಾಡಿದ್ದಾರೆ.

ಟೂರ್ನಿಗೂ ಮೊದಲು ಆರ್‌ಸಿಬಿ ತಂಡವನ್ನು ಹೆಸರನ್ನು ಅಧಿಕೃತವಾಗಿ ರಾಯಲ್ ಚಾಲೆಂಜರ್ಸ್ ಬೆಂಗಳೂರು ಎಂದು ಮರುನಾಮಕರಣ ಮಾಡಲಾಯಿತು. ಮರುನಾಮಕರಣದ ಪ್ರೋಮೋ ವಿಡಿಯೋದಲ್ಲಿ ರಿಷಬ್ ಶೆಟ್ಟಿ ಅವರು  ಕಾಣಿಸಿಕೊಂಡಿದ್ದರು.