ಮತ್ತೇ ಗಾಜಾದ ಮೇಲೆ ಎರಗಿದ ಇಸ್ರೇಲ್ ಸೇನೆ, ಹೆಚ್ಚುತ್ತಲೇ ಸಾವಿನ ಸಂಖ್ಯೆ

Photo Courtesy X

ಇಸ್ರೇಲ್ : ಕಳೆದ 24 ಗಂಟೆಗಳಿಂದ ಪ್ಯಾಲೆಸ್ಟೀನ್ ಮೇಲೆ ಇಸ್ರೇಲ್ ಸೇನೆ ದಾಳಿ ನಡೆಸುತ್ತಿದ್ದು, ಗಾಜಾದಾದ್ಯಂತ ಕನಿಷ್ಠ 25 ಸಾವನ್ನಪ್ಪಿದ್ದಾರೆ ಎಂದು ಮೂಲಗಳಿಂದ ತಿಳಿದುಬಂದಿದೆ.

ಗಾಜಾ ಪಟ್ಟಿಯ ದಕ್ಷಿಣ ಭಾಗದಲ್ಲಿರುವ ಖಾನ್ ಯೂನಿಸ್ ನಗರದ ಮೇಲೆ ಸೋಮವಾರ ಇಸ್ರೇಲ್ ದಾಳಿ ನಡೆಸಿದೆ.

ಇನ್ನೂ ಇಸ್ರೇಲ್ ಪಡೆಗಳ ಆದೇಶದಂತೆ ಹತ್ತಾರು ಪ್ಯಾಲೆಸ್ಟೀನಿಯರು ಖಾನ್ ಯೂನಿಸ್‌ನಿಂದ ಪಲಾಯನ ಮಾಡುತ್ತಿದ್ದಾರೆ. ಗಾಜಾದಲ್ಲಿ ಕದನ ವಿರಾಮಕ್ಕೆ ಹಲವು ರಾಷ್ಟ್ರಗಳು ಒತ್ತಾಯಿಸುತ್ತಿದ್ದರೂ, ಇಸ್ರೇಲ್ ಮಾತ್ರ ತಮ್ಮ ಪ್ರತೀಕಾರವನ್ನು ಮುಂದುವರೆಸಿದೆ.

ಗಾಜಾ ನಗರದ ಶೇಖ್ ರಾದ್ವಾನ್ ಜಿಲ್ಲೆಯಲ್ಲಿ ಇಸ್ರೇಲಿ ದಾಳಿಯಲ್ಲಿ ಕಟ್ಟಡವೊಂದು ನೆಲಕ್ಕಪ್ಪಳಿಸಿದ ವಿಡಿಯೋ ಭಯಾನಕವಾಗಿದೆ. ಈ ದಾಳಿಯಲ್ಲಿ ಒಬ್ಬ ಪ್ಯಾಲೆಸ್ಟೀನಿಯನ್ನರು ಸಾವನ್ನಪ್ಪಿದರು ಮತ್ತು ಹಲವರು ಗಾಯಗೊಂಡರು ಎಂದು ತಿಳಿದುಬಂದಿದೆ.

ಕಳೆದ ವರ್ಷದ ಅಕ್ಟೋಬರ್‌ನಲ್ಲಿ ಇಸ್ರೇಲ್ ಮೇಲೆ ಏಕಾಏಕಿ ಹಮಾಸ್ ರಾಕೆಟ್ ದಾಳಿ, ಟ್ಯಾಂಕರ್ ದಾಳಿ ಹಾಗೂ ಗಡಿಯಲ್ಲಿ ಒಳನುಗ್ಗಿ ನೂರಾರು ಇಸ್ರೇಲಿಗರನ್ನು ಹತ್ಯೆ ಮಾಡಿದ್ದರು.  ಹಲವು ಮಂದಿಯನ್ನು ಕಿಡ್ನಾಪ್ ಮಾಡಿ ಒತ್ತೆಯಾಳಾಗಿ ಇರಿಸಿಕೊಂಡಿದ್ದಾರೆ.

ಇದಕ್ಕೆ ಪ್ರತೀಕಾರವಾಗಿ ಇಸ್ರೇಲ್ ಶುರು ಮಾಡಿದ ದಾಳಿಯಲ್ಲಿ ಸಾವಿರಾರು ಪ್ಯಾಲೇಸ್ಟೀನಿಯನ್ನರು ಸಾವಿಗೀಡಾಗಿದ್ದಾರೆ.  

ದಾಳಿ ನಡೆದು ಒಂದು ವರ್ಷವಾದರೂ ಇಂದಿಗೂ ಇಸ್ರೇಲ್ ತನ್ನ ಪ್ರತೀಕಾರವನ್ನು ಮುಂದುವರೆಸುತ್ತಲೇ ಇದೆ.