ಅಫ್ಗನ್-ಇಂಡಿಯಾ ಫ್ರೆಂಡ್‌ಶಿಪ್ ಡ್ಯಾಮ್ ಉದ್ಘಾಟಿಸಿದ ಪ್ರಧಾನಿ ಮೋದಿ

ಅಫ್ಘಾನಿಸ್ತಾನದ ಪುನರ್‌ನಿರ್ಮಾಣದಲ್ಲಿ ಭಾರತ ಸಹಾಯ ಹಸ್ತ ಚಾಚಿದೆ. ಪ್ರಧಾನಮಂತ್ರಿ ನರೇಂದ್ರ ಮೋದಿ, ಅಫ್ಘಾನಿಸ್ತಾನ್ ಅಧ್ಯಕ್ಷ ಅಶ್ರಫ್ ಘನಿ ಜಂಟಿಯಾಗಿ ಸಲ್ಮಾ ಡ್ಯಾಮ್ ಉದ್ಘಾಟಿಸಿದರು.

ಉದ್ಘಾಟನಾ ಸಮಾರಂಭದಲ್ಲಿ ಮಾತನಾಡಿದ ಘನಿ, ಕಳೆದ 40 ವರ್ಷಗಳ ದೀರ್ಘಾವಧಿಯವರೆಗೆ ಕನಸಾಗಿದ್ದ ಡ್ಯಾಮ್ ನಿರ್ಮಾಣ ಕಾರ್ಯ ಭಾರತದ ನೆರವಿನೊಂದಿಗೆ ನನಸಾಗಿದೆ ಎಂದರು.

ಪ್ರಧಾನಿ ಮೋದಿ ಮಾತನಾಡಿ, ಸಲ್ಮಾ ಡ್ಯಾಮ್ ಕೇವಲ ಇಟ್ಟಿಗೆ ಮತ್ತು ಕಲ್ಲುಗಳಿಂದ ನಿರ್ಮಾಣವಾಗಿಲ್ಲ. ಭಾರತ ಮತ್ತು ಅಫ್ಘಾನಿಸ್ತಾನದ ಗೆಳೆತನದ ನಂಬಿಕೆಯ ಸಂಕೇತವಾಗಿದೆ ಎಂದು ಸಂತಸ ವ್ಯಕ್ತಪಡಿಸಿದರು.

ಅಫ್ಘಾನಿಸ್ತಾನದಲ್ಲಿ ಪ್ರಜಾಪ್ರಭುತ್ವ ಆಳವಾಗಿ ಬೇರೂರಿ, ದೇಶ ಶೀಘ್ರವಾಗಿ ಅಭಿವೃದ್ಧಿ ಹೊಂದಲ್ಲಿ ದೇಶದ ಜನತೆ ಏಕತೆಯ ಮಂತ್ರ ಜಪಿಸಲಿ ಎಂದು ಕರೆ ನೀಡಿದರು. 

ನಮ್ಮ ದೇಶದಲ್ಲಿ ನಡೆಯುತ್ತಿರುವ ರಸ್ತೆ, ಡ್ಯಾಮ್ ಸೇರಿದಂತೆ 200 ಸಣ್ಣ ಯೋಜನೆಗಳಿಗೆ ಭಾರತ ಸಹಾಯ ಹಸ್ತ ಚಾಚಿರುವುದನ್ನು ಅಫ್ಘನ್ ಜನತೆ ಸದಾ ನೆನಪಿಸಿಕೊಳ್ಳುತ್ತದೆ ಎಂದು ತಿಳಿಸಿದ್ದಾರೆ.

ಸಲ್ಮಾ ಡ್ಯಾಮ್ 1976ರಲ್ಲಿಯೇ ನಿರ್ಮಾಣವಾಗಿತ್ತು. ಆದರೆ, ಅಫ್ಘನ್ ನಾಗರಿಕ ಯುದ್ಧದಲ್ಲಿ ಭಾರಿ ಪ್ರಮಾಣದಲ್ಲಿ ನಾಶವಾಗಿತ್ತು. ಇದೀಗ 1700 ಕೋಟಿ ರೂಪಾಯಿ ವೆಚ್ಚದಲ್ಲಿ 1500 ಭಾರತ ಮತ್ತು ಅಫ್ಘನ್ ಇಂಜಿನಿಯರ್‌ಗಳು ಸೇರಿ ಹೊಸ ರೂಪ ನೀಡಿದ್ದಾರೆ.

ತಾಜಾ ಸುದ್ದಿಗಳಿಗಾಗಿ ವೆಬ್ ದುನಿಯಾ ಮೊಬೈಲ್ ಆ್ಯಪ್ ಡೌನ್‌ಲೋಡ್ ಮಾಡಿಕೊಳ್ಳಿ.