ಅನಿವಾರ್ಯವೂ, ವಯಸ್ಸಾಗುವುದರ ಮುನ್ಸೂಚನೆಯೂ ಆಗಿರುವ ಕೂದಲ ನರೆತವನ್ನು ತಡೆಯಲು ವಿಜ್ಞಾನಿಗಳು ಸುಲಭ ಸೂತ್ರವೊಂದನ್ನು ಕಂಡು ಹುಡುಕಿದ್ದಾರೆ. ಹಣ್ಣಿನ ರಸದಿಂದ ತಯಾರಿಸಿದ ಒಂದು ಗುಳಿಗೆಯೇ ಬಿಳಿ ಕೂದಲು ಹೆಚ್ಚಾಗುವುದನ್ನು ನಿವಾರಿಸುತ್ತದೆ ಎನ್ನುತ್ತಾರೆ ಈ ವಿಜ್ಞಾನಿಗಳು.
ಜಾಗತಿಕ ಶೃಂಗಾರಸಾಧನಗಳ ದೈತ್ಯ ಕಂಪನಿ ಲೋರಿಯಲ್ ( L'Oreal) ತಂಡವು ಒಂದು ದಶಕಕ್ಕೂ ಹೆಚ್ಚು ಕಾಲ ಪ್ರಯೋಗಗಳ ಮೂಲಕ ಇದನ್ನು ತಯಾರಿಸಿದ್ದು, ನಾಲ್ಕು ವರ್ಷದಲ್ಲಿ ಮಾರುಕಟ್ಟೆಗೆ ಬರುವ ನಿರೀಕ್ಷೆಯಿದೆ ಎಂದು ಪತ್ರಿಕೆ ವರದಿ ಮಾಡಿದೆ.
ಪುರುಷರು ಹಾಗೂ ಮಹಿಳೆಯರೂ ಇದನ್ನು ಮೆಚ್ಚಿಕೊಳ್ಳುತ್ತಾರೆಂಬ ನಂಬಿಕೆ ನಮ್ಮದು. ಪಥ್ಯಾಹಾರದ ರೀತಿಯಲ್ಲೇ ಈ ಗುಳಿಗೆಯನ್ನೂ ಸೇವಿಸಬಹುದಾಗಿದ್ದು, ಇದು ದುಬಾರಿಯೂ ಆಗಿರುವುದಿಲ್ಲ ಎಂದು ಕಂಪನಿಯ ರೋಮ ಜೀವಶಾಸ್ತ್ರ ವಿಭಾಗದ ಮುಖ್ಯಸ್ಥ ಬ್ರೂನೋ ಬರ್ನಾರ್ಡ್ ಹೇಳಿದ್ದಾರೆ.
ಟೈರೋಸಿನೇಸ್ ಸಂಬಂಧಿತ ಪ್ರೊಟೀನ್ 2 ಎಂಬ, ಕೂದಲಿನ ಬಣ್ಣ ಬದಲಾವಣೆಯನ್ನು ತಡೆಯುವ ಕಿಣ್ವದ ಮಾದರಿಯಲ್ಲೇ ಒಂದು ಅಜ್ಞಾತ ಹಣ್ಣಿನಿಂದ ಈ ರಾಸಾಯನಿಕ ಸಂಯುಕ್ತವನ್ನು ಈ ಔಷಧವು ಬಳಸುತ್ತದೆ. ಇದು ಕೂದಲಿನ ಜೀವಕೋಶಗಳು ಹಾನಿಕಾರಕ ಆಂಟಿ-ಆಕ್ಸಿಡೆಂಟ್‌ಗಳಿಂದ ಪ್ರಭಾವಿತವಾಗಿ ಬೆಳ್ಳಗಾಗುವ 'ಆಕ್ಸಿಡೇಟಿವ್ ಒತ್ತಡ'ವನ್ನು ತಡೆಯುವ ಪರಿಣಾಮವನ್ನು ಹೊಂದಿರುತ್ತದೆ.
ಸಾಮಾನ್ಯವಾಗಿ ಇದನ್ನು ಇಡೀ ಜೀವನದಲ್ಲಿ ತೆಗೆದುಕೊಳ್ಳಬೇಕಾಗಬಹುದು. ಆದರೆ ಜನರು ತಮ್ಮ ಕೂದಲು ಬೆಳ್ಳಗಾಗುವ ಮೊದಲೇ ಈ ಔಷಧಿ ಸೇವನೆ ಆರಂಭಿಸುವುದನ್ನು ನಾವು ಪ್ರೋತ್ಸಾಹಿಸುತ್ತೇವೆ. ಏಕೆಂದರೆ, ಒಮ್ಮೆ ಕೂದಲು ಬಿಳಿಯಾಗುವಿಕೆ ಆರಂಭವಾದ ನಂತರ ಅದನ್ನು ಪರಿಪೂರ್ಣವಾಗಿ ತಡೆದು ಹಿಂದಿನ ಸ್ಥಿತಿಗೆ ತರುವುದು ಸಾಧ್ಯವಾಗದು ಎಂದು ಬರ್ನಾರ್ಡ್ ಹೇಳಿದ್ದಾರೆ.
ಈಗಾಗಲೇ ಈ ಔಷಧಿಯು ತಜ್ಞರ ವಲಯದಲ್ಲಿ ಚರ್ಚೆಯ ವಿಷಯವಾಗಿದ್ದು, ಮೇ 2013ರಲ್ಲಿ ನಡೆಯಲಿರುವ ವಿಜ್ಞಾನ ಸಮಾವೇಶವೊಂದರಲ್ಲಿ ಈ ಹೊಸ ಗುಳಿಗೆಯು ಅನಾವರಣಗೊಳ್ಳುವ ನಿರೀಕ್ಷೆಯಿದೆ.