ಸೋಮವಾರ ಎಲ್ಲೆಡೆ ಗಣೇಶ ಚತುರ್ಥಿ ಸಂಭ್ರಮ. ಹಬ್ಬದ ಸಂಭ್ರಮದಲ್ಲಿ ವ್ಯಸ್ತರಾಗಿದ್ದರೂ ಮಾಸ್ಟರ್ ಬ್ಲಾಸ್ಟರ್ ಸಚಿನ್ ತೆಂಡೂಲ್ಕರ್ ತಮ್ಮ ಟ್ವಿಟರ್ ಅನುಯಾಯಿಗಳು ಮತ್ತು ಅಭಿಮಾನಿಗಳ ಜತೆಯಲ್ಲಿ ಒಂದು ಪುಟ್ಟ ಕ್ವಿಜ್ ಆಡಲಿಳಿದಿದ್ದರು.
ತಮ್ಮ ಮನೆಯಲ್ಲಿ ಪೂಜೆಗಿಟ್ಟಿದ್ದ ಗಣೇಶ ಮೂರ್ತಿಯ ಮುಂದೆ ಪ್ರಾರ್ಥನೆಗೆ ಕುಳಿತಿದ್ದ ಒಬ್ಬ ವಿಶೇಷ ಅತಿಥಿಯ ಪೋಟೋವನ್ನು ಟ್ವೀಟ್ ಮಾಡಿದ ಸಚಿನ್, ಗಣಪತಿ ಬಪ್ಪನ ಆಶೀರ್ವಾದ ಪಡೆದುಕೊಳ್ಳಲು ಯಾರು ಬಂದಿದ್ದಾರೆ ನೋಡಿ. ಇವರು ಯಾರೆಂಬುದನ್ನು ಊಹಿಸಿ ನೋಡೋಣ ಎಂದು ಬರೆದಿದ್ದರು.
ಆ ಫೋಟೋದಲ್ಲಿ ವಿಶೇಷ ಅತಿಥಿಯ ಬೆನ್ನು ಮಾತ್ರ ಕಾಣುತ್ತಿತ್ತು. ಹೀಗಾಗಿ ಅಭಿಮಾನಿಗಳ ಊಹೆಯಲ್ಲಿ ರೋಜರ್ ಫೆಡರರ್‌ನಿಂದ ರಿಕ್ಕಿ ಪಾಟಿಂಗ್‌ವರೆಗೆ ಅನೇಕ ಹೆಸರುಗಳು ಬಂದು ಹೋದವು.
ಕೆಲವೇ ಹೊತ್ತಿನಲ್ಲಿ ಸಚಿನ್ ರಹಸ್ಯ ಅತಿಥಿ ಯಾರೆಂದು ಬಹಿರಂಗ ಪಡಿಸಿದರು. ಅವರು ಬೇರೆ ಯಾರೂ ಅಲ್ಲ ವಿಶ್ವ ವಿಖ್ಯಾತ ಕ್ಷೇತ್ರ ರಕ್ಷಣಾಕಾರ, ಭಾರತವನ್ನು ತವರಿನಷ್ಟೇ ಪ್ರೀತಿಸುತ್ತೇನೆ ಎಂದು ಆಗಾಗ ಹೇಳುತ್ತಲೇ ಬರುತ್ತಿರುವ ಜಾಂಟಿ ರೋಡ್ಸ್ ಆಗಿದ್ದರು.
ಆಸಕ್ತಿದಾಯಕ ವಿಚಾರವೆಂದರೆ ಮತ್ತೊಬ್ಬ ವಿಶೇಷ ಅತಿಥಿ ಕೂಡ ಸಚಿನ್ ಮನೆಯಲ್ಲಿದ್ದರು. ಆದರೆ ಸಚಿನ್ ಕ್ವಿಜ್ ಭಾಗವಾಗಿರದ ಆ ಅತಿಥಿ ಯುವರಾಜ್ ಸಿಂಗ್ .
ತಮ್ಮ ಕ್ವಿಜ್‌ಗೆ ಉತ್ತರವಾಗಿ ಸಚಿನ್ ಜಾಂಟಿ ರೋಡ್ಸ್ ಜತೆಗಿರುವ ಮತ್ತು ತಾವು, ಜಾಂಟಿ ಮತ್ತು ಯುವಿ ಜತೆಗೆ ನಿಂತಿರುವ ಫೋಟೋಗಳನ್ನು ಟ್ವಿಟರ್‌ನಲ್ಲಿ ಪ್ರಕಟಿಸಿದ್ದಾರೆ.
ತಾಜಾ ಸುದ್ದಿಗಳನ್ನು ಓದಲು ವೆಬ್‌ದುನಿಯಾ ಮೊಬೈಲ್ ಆ್ಯಪ್ ಡೌನ್‍ಲೋಡ್ ಮಾಡಿಕೊಳ್ಳಿ .
