21 ಮೇ 1997ರ ದಿನ ಕ್ರಿಕೆಟ್ ಜಗತ್ತು ಹೊಸದೊಂದು ದಾಖಲೆಯನ್ನು ಕಂಡಿತು. ಸರ್ ವಿವಿಯನ್ ರಿಚರ್ಡ್ಸ್ ಅವರು ಏಕದಿನ ಕ್ರಿಕೆಟ್‌ನಲ್ಲಿ ದಾಖಲಿಸಿದ್ದ ವೈಯಕ್ತಿಕ ದಾಖಲೆಯನ್ನು ಅಳಿಸಿ ಹಾಕಿದ ಪಾಕಿಸ್ತಾನದ ಆರಂಭಿಕ ಬ್ಯಾಟ್ಸ್‌ಮನ್ ಸಯೀದ್ ಅನ್ವರ್ ಸಾಂಪ್ರದಾಯಿಕ ಎದುರಾಳಿ ಭಾರತದ ವಿರುದ್ಧ 194 ರನ್ ಸಿಡಿಸುವುದರೊಂದಿಗೆ ಹೊಸ ಇತಿಹಾಸವನ್ನು ನಿರ್ಮಿಸಿದ್ದರು.
ಇದಾದ 12 ವರ್ಷಗಳ ಬಳಿಕ ಜಿಂಬಾಬ್ವೆ ಆಟಗಾರ ಚಾರ್ಲ್ಸ್ ಕೊವೆಂಟ್ರಿ ಬಾಂಗ್ಲಾ ವಿರುದ್ಧದ ಪಂದ್ಯದಲ್ಲಿ ಸಯೀದ್ ಸಾಧನೆಯನ್ನು ಸರಿಗಟ್ಟಿದ್ದರು. ಅವರು 194 ರನ್ ಗಳಿಸಿ ಅಜೇಯರಾಗಿ ಉಳಿದಿದ್ದರು. ಬಳಿಕ ಮಾಸ್ಟರ್ ಬ್ಲಾಸ್ಟರ್ ಸಚಿನ್ ತೆಂಡೂಲ್ಕರ್ 2010ರಲ್ಲಿ ದಕ್ಷಿಣ ಆಫ್ರಿಕಾ ವಿರುದ್ಧದ ಪಂದ್ಯದಲ್ಲಿ ಈ ಗೆರೆಯನ್ನು ದಾಟಿ ಅಜೇಯ 200 ರನ್ ಸಿಡಿಸಿ ಹೊಸ ದಾಖಲೆಯನ್ನು ಬರೆದರು.
ಅನ್ವರ್ ದಾಖಲೆಯನ್ನು ಮುರಿದವರಲ್ಲಿ ಸಚಿನ್ ಮೊದಲನೆಯವರೆನಿಸಿಕೊಂಡಿದ್ದಷ್ಟೇ ಅಲ್ಲ, 194 ರನ್ ಜತೆ ಸಹ ಅನ್ವರ್ ಅವರಿಗೆ ಸಚಿನ್ ಜತೆ ಕಹಿ ನಂಟಿದೆ. ಅವರ ವಿಶ್ವದಾಖಲೆ ಆಟ 200 ರನ್ ಗಡಿ ದಾಟದಿರುವುದಕ್ಕೂ ಸಚಿನ್ ಅವರೇ ಕಾರಣರಾಗಿದ್ದರು. ಅಂದು ವೆಂಕಟೇಶ್ ಪ್ರಸಾದ್, ಅನಿಲ್ ಕುಂಬ್ಳೆ ಮುಂತಾದವರ ಬೌಲಿಂಗ್ ಹೆಡೆಮುರಿಕಟ್ಟಿ ಸಿಡಿಯುತ್ತಿದ್ದ ಅನ್ವರ್ ಅವರ ಅಬ್ಬರಕ್ಕೆ ಬ್ರೇಕ್ ಹಾಕಿದ್ದು ಇದೇ ಸಚಿನ್ ಅವರೇ ಆಗಿದ್ದರು.
ಸಚಿನ್ ರಮೇಶ್ ತೆಂಡೂಲ್ಕರ್ ಎಂಬ ಪಾರ್ಟ್ ಟೈಂ ಬೌಲರ್, ಅನ್ವರ್‌ನ ಇನ್ನಿಂಗ್ಸ್‌ಗೆ ಮಂಗಳ ಹಾಡಿಸಿ, 'ನೀನು ಮಾಡಿದ್ದು ಸಾಕು, ಒಂದಲ್ಲ ಒಂದು ದಿನ ನಿನ್ನ ದಾಖಲೆ ಮುರಿಯುತ್ತೇನೆ' ಎಂದು ಶಪಥ ಹೊತ್ತಂತೆಯೋ ಎಂಬಂತೆ ಬೌಲಿಂಗ್ ಮಾಡಿ, ಅನ್ವರ್ ವಿಕೆಟ್ ಉರುಳಿಸಿದ್ದರು. ಅನ್ವರ್ ಸಿಡಿಸಿದ ಚೆಂಡು ಸೌರವ್ ಗಂಗೂಲಿಯ ಭದ್ರ ಮುಷ್ಟಿಗಳೊಳಗೆ ಕುಳಿತಿತ್ತು. ವಿಶ್ವ ದಾಖಲೆ ಬರೆದರೂ ದ್ವಿಶತಕದ ಗಡಿಗೆ ಬಂದು ನಿರಾಶರಾಗಿ ಹಿಂತಿರುಗಿದ್ದರು ಅನ್ವರ್.
ಅನ್ವರ್ 194 ರನ್ ದಾಖಲಿಸಿದ ವಿಡಿಯೋ
ಸಚಿನ್ ಏಕದಿನದಿನದಲ್ಲಿ ದ್ವಿಶತಕ ಸಿಡಿಸಿದ ವಿಡಿಯೋ
