Yashasvi Jaiswal: ಐಸಿಸಿ ಪ್ರಶಸ್ತಿ ಗೆದ್ದ ಯಶಸ್ವಿ ಜೈಸ್ವಾಲ್

ಮುಂಬೈ: ಇಂಗ್ಲೆಂಡ್ ವಿರುದ್ಧ ಭರ್ಜರಿ ಬ್ಯಾಟಿಂಗ್ ಮಾಡಿದ ಯಶಸ್ವಿ ಜೈಸ್ವಾಲ್ ಐಸಿಸಿ ಮಾಸಿಕ ಪ್ರಶಸ್ತಿಯನ್ನು ಗೆದ್ದುಕೊಂಡಿದ್ದಾರೆ. ಇದಕ್ಕೆ ಬಿಸಿಸಿಐ, ಫ್ಯಾನ್ಸ್ ಅವರನ್ನು ಅಭಿನಂದಿಸುತ್ತಿದೆ.

ಐಸಿಸಿ ಪ್ರತೀ ತಿಂಗಳೂ ಆಯಾ ತಿಂಗಳು ಅತ್ಯುತ್ತಮ ಪ್ರದರ್ಶನ ನೀಡಿದ ಆಟಗಾರರಿಗೆ ಪ್ರಶಸ್ತಿ ನೀಡುತ್ತದೆ. ಈ ಬಾರಿ ಇಂಗ್ಲೆಂಡ್ ವಿರುದ್ಧ ಟೆಸ್ಟ್ ಸರಣಿಯಲ್ಲಿ ಎರಡು ದ್ವಿಶತಕ ಸಿಡಿಸಿ ಭರ್ಜರಿ ಫಾರ್ಮ್ ಪ್ರದರ್ಶಿಸಿದ ಯಶಸ್ವಿ ಜೈಸ್ವಾಲ್ ಕೂಡಾ ರೇಸ್ ನಲ್ಲಿದ್ದರು. ಅವರ ಜೊತೆಗೆ ನ್ಯೂಜಿಲೆಂಡ್ ನ ಕೇನ್ ವಿಲಿಯಮ್ಸನ್, ಶ್ರೀಲಂಕಾದ ಪತುಮ್ ನಿಸ್ಸಂಕಾ ಕೂಡಾ ರೇಸ್ ನಲ್ಲಿದ್ದರು.

ಜೈಸ್ವಾಲ್ ಇಂಗ್ಲೆಂಡ್ ಸರಣಿಯಲ್ಲಿ 700 ಪ್ಲಸ್ ರನ್ ಗಳಿಸಿದ್ದರು. ಹಲವು ದಾಖಲೆಗಳನ್ನೂ ಮುರಿದಿದ್ದರು. ಇಂಗ್ಲೆಂಡ್ ಬಾಝ್ ಬಾಲ್ ಟೆಕ್ನಿಕ್ ಗೆ ಜೈಸ್ವಾಲ್ ತಮ್ಮದೇ ರೀತಿಯಲ್ಲಿ ಠಕ್ಕರ್ ಕೊಟ್ಟಿದ್ದರು. ಅವರ ಈ ಸಾಧನೆಗೆ ಈಗ ಐಸಿಸಿ ಮಾಸಿಕ ಶ್ರೇಷ್ಠ ಆಟಗಾರ ಪ್ರಶಸ್ತಿ ನೀಡಿ ಗೌರವಿಸಿದೆ.

‘ಈ ಪ್ರಶಸ್ತಿ ಪಡೆಯಲು ನನಗೆ ತೀವ್ರ ಸಂತಸವಾಗುತ್ತಿದೆ. ಭವಿಷ್ಯದಲ್ಲಿ ಇನ್ನಷ್ಟು ಈ ಪ್ರಶಸ್ತಿ ಪಡೆಯಲು ಸಾಧ‍್ಯವಾಗುತ್ತದೆ ಎಂದು ನಂಬಿದ್ದೇನೆ. ಇದು ನನ್ನ ವೃತ್ತಿ ಜೀವನದ ಅಮೂಲ್ಯ ಸರಣಿ. ನಾನು ಆಡಿದ ರೀತಿ ಮತ್ತು ತಂಡ 4-1 ಅಂತರದಿಂದ ಗೆಲ್ಲಲು ಸಾಧ‍್ಯವಾಗಿದ್ದಕ್ಕೆ ಖುಷಿಯಿದೆ’ ಎಂದು ಪ್ರಶಸ್ತಿ ಗೆದ್ದ ಬಳಿಕ ಜೈಸ್ವಾಲ್ ಪ್ರತಿಕ್ರಿಯೆ ನೀಡಿದ್ದಾರೆ.