ಹಮ್ಮು-ಬಿಮ್ಮು ಏನೂ, ಗೌತಮ್ ಗಂಭೀರ್ ಹೇಳಿದ್ದನ್ನು ಚಾಚೂ ತಪ್ಪದೇ ಪಾಲಿಸ್ತಾರೆ ವಿರಾಟ್ ಕೊಹ್ಲಿ

ಕೊಲೊಂಬೊ: ಟೀಂ ಇಂಡಿಯಾ ಕೋಚ್ ಆಗಿ ಗೌತಮ್ ಗಂಭೀರ್ ಆಯ್ಕೆಯಾದ ಬಳಿಕ ವಿರಾಟ್ ಕೊಹ್ಲಿ ಜೊತೆಗೆ ಅವರ ಹೊಂದಾಣಿಕೆ ಹೇಗಿರಬಹುದೋ ಎಂಬ ಆತಂಕ ಈಗ ದೂರವಾಗಿದೆ. ಮೊದಲ ದಿನವೇ ಗಂಭೀರ್-ಕೊಹ್ಲಿ ಆತ್ಮೀಯ ಕ್ಷಣಗಳ ಫೋಟೋ, ವಿಡಿಯೋ ವೈರಲ್ ಆಗುತ್ತಿದ್ದಂತೇ ಫ್ಯಾನ್ಸ್ ನಿಟ್ಟುಸಿರು ಬಿಟ್ಟಿದ್ದಾರೆ.

ಗಂಭೀರ್-ಕೊಹ್ಲಿ ನಡುವೆ ಐಪಿಎಲ್ ವೇಳೆ ಹಲವು ಬಾರಿ ಸಂಘರ್ಷಗಳಾಗಿವೆ. ಹಲವು ಬಾರಿ ಗಂಭೀರ್ ಕಾಮೆಂಟೇಟರ್ ಆಗಿ ಕೊಹ್ಲಿಯನ್ನು ಟೀಕಿಸಿದ್ದು ಇದೆ. ಆದರೆ ಇದೆಲ್ಲವೂ ಕೋಚ್ ಆದ ಮೇಲೆ ಗಂಭೀರ್ ಮರೆತು ಮುನ್ನಡೆಯಲು ತೀರ್ಮಾನಿಸಿದ್ದಾರೆ. ಕೊಹ್ಲಿ ಕೂಡಾ ಇದನ್ನು ಮನಸ್ಸಿನಲ್ಲಿಟ್ಟುಕೊಳ್ಳದೇ ಗಂಭೀರ್ ಜೊತೆ ಕೆಲಸ ಮಾಡಲು ಮುಂದಾಗಿದ್ದಾರೆ.

ಇದೀಗ ಶ್ರೀಲಂಕಾ ವಿರುದ್ಧದ ಏಕದಿನ ಸರಣಿಗೆ ಸಜ್ಜಾಗಲು ಕೊಹ್ಲಿ-ಗಂಭೀರ್ ಜೊತೆಯಾಗಿದ್ದಾರೆ. ಟೀಂ ಇಂಡಿಯಾ ನೆಟ್ ಸೆಷನ್ ವೇಳೆ ಗಂಭೀರ್ ಮತ್ತು ಕೊಹ್ಲಿ ಜೊತೆಯಾಗಿ ಮಾತುಕತೆ ನಡೆಸುತ್ತಾ ಸಾಕಷ್ಟು ಸಮಯ ಕಳೆದಿದ್ದಾರೆ. ಈ ನಡುವೆ ಕೊಹ್ಲಿ ಜೋಕ್ ಮಾಡಿದ್ದು ಗಂಭೀರ್ ಮನಃಪೂರ್ವಕವಾಗಿ ನಗುತ್ತಾ ನಿಂತಿರುವ ಫೋಟೋಗಳು ವೈರಲ್ ಆಗಿದೆ.

ಅದರ ಜೊತೆಗೆ ಗಂಭೀರ್ ನೀಡಿರುವ ಸಲಹೆ ಸೂಚನೆಗಳನ್ನು ಗಂಭೀರವಾಗಿಯೇ ಪರಿಗಣಿಸಿರುವ ಕೊಹ್ಲಿ ಅಭ್ಯಾಸ ನಡೆಸುತ್ತಿದ್ದುದು ಕಂಡುಬಂದಿದೆ. ಈ ಮೂಲಕ ತಮ್ಮಿಬ್ಬರ ನಡುವೆ ಏನಿಲ್ಲಾ ಏನಿಲ್ಲಾ ಎಂದು ಈ ಜೋಡಿ ಮತ್ತೊಮ್ಮೆ ಸಾಬೀತಪಡಿಸಿದ್ದಾರೆ.