ರಸ್ತೆ ಮಧ್ಯೆ ಕಾರು ನಿಲ್ಲಿಸಿ ಅಭಿಮಾನಿಗೆ ಸರ್ಪೈಸ್ ಕೊಟ್ಟ ಸಚಿನ್ ತೆಂಡುಲ್ಕರ್

Photo Courtesy: Twitter

ಮುಂಬೈ: ಕ್ರಿಕೆಟಿಗ ಸಚಿನ್ ತೆಂಡುಲ್ಕರ್ ನಿವೃತ್ತಿಯಾಗಿ ಎಷ್ಟು ಸಮಯ ಕಳೆದರೂ ಅಭಿಮಾನಿಗಳಲ್ಲಿ ಮಾತ್ರ ಅವರ ಮೇಲಿನ ಕ್ರೇಜ್ ಕಡಿಮೆಯಾಗಿಲ್ಲ ಎನ್ನುವುದಕ್ಕೆ ಈ ಘಟನೆಯೇ ಸಾಕ್ಷಿ.

ಕಾರಿನಲ್ಲಿ ಸಾಗುವಾಗ ರಸ್ತೆಯಲ್ಲಿ ತಮ್ಮ ಹೆಸರಿನ ಜೆರ್ಸಿ ತೊಟ್ಟು ಸ್ಕೂಟಿಯಲ್ಲಿ ಸಾಗುತ್ತಿದ್ದ ಅಭಿಮಾನಿಯನ್ನು ಕಂಡು ಸ್ವತಃ ಸಚಿನ್ ಕಾರು ನಿಲ್ಲಿಸಿ ಸರ್ಪೈಸ್ ಕೊಟ್ಟಿದ್ದಾರೆ. ರಸ್ತೆ ಮಧ‍್ಯೆ ಅನಿರೀಕ್ಷಿತವಾಗಿ ತನ್ನ ಆರಾಧ‍್ಯ ದೈವವನ್ನು ಕಂಡು ಅಭಿಮಾನಿ ಮಾತು ಹೊರಡದೆ ಅರೆಕ್ಷಣ ಕೈ ಮುಗಿದು ನಿಂತಿದ್ದಾನೆ. ಈ ವಿಡಿಯೋವನ್ನು ಸಚಿನ್ ತಮ್ಮ ಸೋಷಿಯಲ್ ಮೀಡಿಯಾದಲ್ಲಿ ಪ್ರಕಟಿಸಿದ್ದಾರೆ.

ಮುಂಬೈ ಇಂಡಿಯನ್ಸ್ ಜೆರ್ಸಿ ತೊಟ್ಟಿದ್ದ ಅಭಿಮಾನಿ ಅದರ ಹಿಂದೆ ತೆಂಡುಲ್ಕರ್ ಎಂದು ಬರೆದು 10 ಸಂಖ್ಯೆಯನ್ನೂ ಹಾಕಿಸಿಕೊಂಡಿದ್ದರು. ಅವರನ್ನೇ ಹಿಂಬಾಲಿಸುತ್ತಿದ್ದ ಸಚಿನ್ ತನ್ನ ಕಾರು ಚಾಲಕನಿಗೆ ಕಾರು ನಿಲ್ಲಿಸಲು ಸೂಚಿಸಿದ್ದಾರೆ. ಅಭಿಮಾನಿಯನ್ನು ಓವರ್ ಟೇಕ್ ಮಾಡಿ ಕಾರು ನಿಲ್ಲಿಸಿದ ಸಚಿನ್ ತಮಾಷೆಯಾಗಿ ‘ಏರ್ ಪೋರ್ಟ್ ಗೆ ಹೇಗೆ ಹೋಗಬೇಕು’ ಎಂದು ಕೇಳಿದ್ದಾರೆ.

ಯಾರೋ ದಾರಿಹೋಕರು ಎಂದುಕೊಂಡು ಉತ್ತರಕೊಡಲು ಮುಂದಾದ ಅಭಿಮಾನಿ ಸಚಿನ್ ರನ್ನು ನೋಡಿ ಕ್ಷಣ ಕಾಲ ಗರಬಡಿದಂತಾದರು. ಬಳಿಕ ದೇವರನ್ನೇ ನೋಡಿದ ಹಾಗಾಯಿತು ಎಂದು ಕೈ ಮುಗಿದು ನಿಂತಿದ್ದಾರೆ. ವಿಶೇಷವೆಂದರೆ ಆ ಅಭಿಮಾನಿಯ ಸ್ಕೂಟಿಯಲ್ಲಿ ಸಚಿನ್ ಜೊತೆಗಿನ ಹಳೆಯ ಫೋಟೋ, ಆಟೋಗ್ರಾಫ್ ಪುಸ್ತಕ ಎಲ್ಲವೂ ಇತ್ತು. ಅದೆಲ್ಲವನ್ನೂ ತೋರಿಸಿದಾಗ ಸಚಿನ್ ಭಾವುಕರಾದರು. ಜೊತೆಗೆ ಅಭಿಮಾನಿ ಕೈಯಿಂದ ಫೋಟೋ ಪಡೆದು ಈ ಫೋಟೋ ತೆಗೆದಿದ್ದು ನನಗೆ ನೆನಪಿದೆ ಎಂದು ಆ ಫೋಟೋ ಮೇಲೆ ಹಸ್ತಾಕ್ಷರ ನೀಡಿದರು.

ಅಭಿಮಾನಿಯ ಅಭಿಮಾನ ಕಂಡು ಭಾವುಕರಾದ ಸಚಿನ್ ಬಳಿಕ ಆ ವಿಡಿಯೋ ಸೋಷಿಯಲ್ ಮೀಡಿಯಾದಲ್ಲಿ ಪೋಸ್ಟ್ ಮಾಡಿದ್ದಲ್ಲದೆ, ‘ಸಚಿನ್ ಮೀಟ್ಸ್ ತೆಂಡುಲ್ಕರ್’ ಎಂದು ಸಂದೇಶವೊಂದನ್ನು ಬರೆದಿದ್ದಾರೆ. ‘ನನ್ನ ಮೇಲೆ ಇಷ್ಟೊಂದು ಪ್ರೀತಿ ತೋರಿಸುವವರನ್ನು ನೋಡುವಾಗ ಎದೆ ತುಂಬಿ ಬರುತ್ತದೆ. ಜಗತ್ತಿನ ಯಾವುದೋ ಮೂಲೆಯಿಂದ ಈ ರೀತಿ ಅನಿರೀಕ್ಷಿತವಾಗಿ ಸಿಗುವ ಪ್ರೀತಿ ನನ್ನ ಜೀವನವನ್ನು ವಿಶೇಷವಾಗಿಸಿದೆ’ ಎಂದು ಭಾವುಕ ಸಾಲುಗಳನ್ನು ಬರೆದಿದ್ದಾರೆ.