ಕೊಲಂಬೊ: ಟೀಂ ಇಂಡಿಯಾ ಕೋಚ್ ಆಗಿ ಈ ಹಿಂದೆ ರಾಹುಲ್ ದ್ರಾವಿಡ್ ಇದ್ದಾಗಲೂ ಅಷ್ಟೇ ಈಗ ಗೌತಮ್ ಗಂಭೀರ್ ಇದ್ದಾಗಲೂ ಅಷ್ಟೇ. ನಾಯಕ ರೋಹಿತ್ ಶರ್ಮಾ ತಾವು ಇರೋದೇ ಹೀಗೆ ಅಂತಿದ್ದಾರೆ. ಗಂಭಿರ್ ಮತ್ತು ರೋಹಿತ್ ಲೇಟೆಸ್ಟ್ ವಿಡಿಯೋ ಒಂದು ಈಗ ವೈರಲ್ ಆಗಿದೆ.
ಈ ಹಿಂದಿನ ಕೋಚ್ ರಾಹುಲ್ ದ್ರಾವಿಡ್ ತುಂಬಾ ಕೂಲ್ ವ್ಯಕ್ತಿತ್ವದವರಾಗಿದ್ದರು. ವಿವಾದಾತೀತ ವ್ಯಕ್ತಿಯಾಗಿದ್ದ ದ್ರಾವಿಡ್ ಎಲ್ಲರ ಜೊತೆ ಸರಳವಾಗಿರುತ್ತಾರೆ. ಆದರೆ ಈಗ ಕೋಚ್ ಆಗಿ ಬಂದಿರುವ ಗಂಭೀರ್ ಕೋಪ-ತಾಪಗಳು ವಿವಾದಗಳ ಬಗ್ಗೆ ಎಲ್ಲರಿಗೂ ಗೊತ್ತೇ ಇದೆ. ಹೀಗಾಗಿ ಅವರ ಜೊತೆ ರೋಹಿತ್ ಹೇಗೆ ಹೊಂದಿಕೊಳ್ಳಬಹುದೋ ಎಂಬ ಆತಂಕ ಅಭಿಮಾನಿಗಳಲ್ಲಿತ್ತು.
ಆದರೆ ಇತ್ತೀಚೆಗೆ ಸೋಷಿಯಲ್ ಮೀಡಿಯಾದಲ್ಲಿ ಹರಿದಾಡುತ್ತಿರುವ ಒಂದು ವಿಡಿಯೋ ನೋಡಿದರೆ ರೋಹಿತ್ ಕೋಚ್ ಆಗಿ ದ್ರಾವಿಡ್ ಇದ್ದರೂ ಅಷ್ಟೇ ಗಂಭೀರ್ ಇದ್ದರೂ ಅಷ್ಟೇ ಎಲ್ಲರ ಜೊತೆ ಸುಲಭವಾಗಿ ಹೊಂದಿಕೊಂಡು ಹೋಗುವ ವ್ಯಕ್ತಿ ಎನ್ನುವುದು ಪಕ್ಕಾ ಆಗುತ್ತದೆ.
ಗಂಭೀರ್ ಟೀಂ ಇಂಡಿಯಾ ಕೋಚ್ ಆದ ಬಳಿಕ ಎಲ್ಲರ ಜೊತೆ ಹೊಂದಿಕೊಳ್ಳಲು ಪ್ರಯತ್ನಿಸುತ್ತಿದ್ದಾರೆ. ಕೊಹ್ಲಿ, ರೋಹಿತ್ ಜೊತೆಗೆ ಉತ್ತಮ ಕ್ಷಣಗಳನ್ನು ಕಳೆದಿದ್ದಾರೆ. ಇದೀಗ ಟೀಂ ಇಂಡಿಯಾ ಮೈದಾನಕ್ಕೆ ತೆರಳಲು ಬಸ್ ಏರುವಾಗ ಎಲ್ಲರ ಕಾಲೆಳೆಯುವ ರೋಹಿತ್ ಕೋಚ್ ಗಂಭೀರ್ ರನ್ನೂ ಬಿಡುವುದಿಲ್ಲ. ಗಂಭೀರ್ ರನ್ನೂ ತಮ್ಮ ಶೈಲಿಯಲ್ಲಿ ಕಾಲೆಳೆಯುತ್ತಾ ನಗಿಸುತ್ತಾ ಇರುವುದನ್ನು ನೋಡಿ ನೆಟ್ಟಿಗರು ಇದು ರೋಹಿತ್ ಎಂದರೆ ಎಂದು ಮೆಚ್ಚುಗೆ ವ್ಯಕ್ತಪಡಿಸಿದ್ದಾರೆ.
