ನವದೆಹಲಿ: ಜಿಂಬಾಬ್ವೆ ಮತ್ತು ವೆಸ್ಟ್ ಇಂಡೀಸ್ ಪ್ರವಾಸಗಳಿಗೆ ಭಾರತ ತಂಡವನ್ನು ಪ್ರಕಟಿಸಿದ್ದು, ಕೆಲವು ಹೊಸ ಮುಖಗಳನ್ನು ಆರಿಸಲಾಗಿದೆ. ಕೆ.ಎಲ್. ರಾಹುಲ್, ಯಜುವೇಂದ್ರ ಚಹಲ್, ಫೈಜ್ ಫಜಲ್ ಅವರಿಗೆ ಸೀಮಿತ ಓವರುಗಳ ಸ್ವರೂಪದಲ್ಲಿ ಸಾಮರ್ಥ್ಯ ಸಾಬೀತಿಗೆ ಅವಕಾಶ ನೀಡಲಾಗಿದ್ದು, ಶಾರ್ಜುಲ್ ಥಾಕುಲ್ ಅವರನ್ನು ಟೆಸ್ಟ್ ಪಂದ್ಯಗಳಲ್ಲಿ ಪೇಸ್ ಲೈನ್‌ ಅಪ್‌ಗೆ ಬಲ ತುಂಬಲು ಸೇರ್ಪಡೆ ಮಾಡಲಾಗಿದೆ. ಅಂತಾರಾಷ್ಟ್ರೀಯ ಪಂದ್ಯಗಳ ಚೊಚ್ಚಲ ಪ್ರವೇಶಕ್ಕೆ ಈ ಆಟಗಾರರ ಸಾಧನೆ ಕೆಳಗೆ ನೀಡಲಾಗಿದೆ.
ಕೆ.ಎಲ್. ರಾಹುಲ್: ರಾಯಲ್ ಚಾಲೆಂಜರ್ಸ್ ಪರ 2016ರ ಐಪಿಎಲ್‌ನಲ್ಲಿ ಮನೋಜ್ಞ ಫಾರಂನಲ್ಲಿದ್ದಾರೆ. 12 ಪಂದ್ಯಗಳಲ್ಲಿ ಆಕರ್ಷಕ ಶೈಲಿಯ ಬಲಗೈ ಆಟಗಾರ 386 ರನ್ ಸ್ಕೋರ್ ಮಾಡಿದ್ದಾರೆ. ಅವುಗಳಲ್ಲಿ ನಾಲ್ಕು ಅರ್ಧಶತಕಗಳು ಸೇರಿವೆ.
ರಾಹುಲ್ ಡೇರ್ ಡೆವಿಲ್ಸ್ ವಿರುದ್ಧ 23 ಎಸೆತಗಳಿಗೆ 38 ರನ್ ಸಿಡಿಸಿ ಆರ್‌ಸಿಬಿ ಪ್ಲೇ ಆಫ್ ಅರ್ಹತೆ ಪಡೆಯಲು ನೆರವಾಗಿದ್ದರು. ಟೆಸ್ಟ್ ಸ್ಪೆಷಲಿಸ್ಟ್ ಎನಿಸಿದ್ದ ರಾಹುಲ್ ಉತ್ತಮ ಪ್ರದರ್ಶನಗಳಿಂದ ಏಕದಿನ ತಂಡದಲ್ಲಿ ಕಾಯಂ ಸ್ಥಾನ ಗಳಿಸುವ ನಿರೀಕ್ಷೆಯಲ್ಲಿದ್ದಾರೆ.
ಮಂದೀಪ್ ಸಿಂಗ್: ಕಳೆದ ವರ್ಷದ ವಿಜಯ್ ಹಜಾರೆ ಟ್ರೋಫಿಯಲ್ಲಿ ಅತ್ಯಧಿಕ ರನ್ ಸ್ಕೋರ್ ಮಾಡಿದ ಪಂಜಾಬ್ ಆಟಗಾರ.ಏಳು ಪಂದ್ಯಗಳಲ್ಲಿ 394 ರನ್ 65. 66 ಸರಾಸರಿಯಲ್ಲಿ ಸಿಡಿಸಿದ್ದಾರೆ. 2015-16 ರಣಜಿ ಸೀಸನ್‌ನಲ್ಲಿ ಕೂಡ ಮಂದೀಪ್ ಎರಡನೇ ಅತ್ಯಧಿಕ ರನ್ ಸ್ಕೋರರ್ ಎನಿಸಿದ್ದಾರೆ. 9 ಪಂದ್ಯಗಳಲ್ಲಿ ಅವರು 498 ರನ್ ಸ್ಕೋರ್ ಮಾಡಿದ್ದು ಎರಡು ಶತಕಗಳನ್ನು ಮತ್ತು 2 ಅರ್ಧಶತಕಗಳನ್ನು ಸಿಡಿಸಿದ್ದಾರೆ.
ಯಜುವೇಂದ್ರ ಚಹಲ್: ರಾಯಲ್ ಚಾಲೆಂಜರ್ಸ್ ಲೆಗ್ ಸ್ಪಿನ್ ಬೌಲರ್ 2016ರ ಐಪಿಎಲ್‌ನಲ್ಲಿ ಅತೀ ಹೆಚ್ಚು ವಿಕೆಟ್ ಗಳಿಸಿದ್ದಾರೆ. 11 ಪಂದ್ಯಗಳಲ್ಲಿ 19 ವಿಕೆಟ್‌ಗಳೊಂದಿಗೆ 17.05 ಸರಾಸರಿ ಮತ್ತು 7.87 ಎಕಾನಮಿ ರೇಟ್ ಹೊಂದಿದ್ದಾರೆ. 2015ರ ಐಪಿಎಲ್‌ನಲ್ಲಿ ಕೂಡ 15 ಪಂದ್ಯಗಳಲ್ಲಿ 23 ವಿಕೆಟ್‌ಗಳನ್ನು ಚಹಲ್ ಕಬಳಿಸಿದ್ದರು.
ಶಾರ್ದುಲ್ ಥಾಕುರ್-2014-15ರ ರಣಜಿ ಟ್ರೋಫಿಯಲ್ಲಿ ವಿನಯ್ ಕುಮಾರ್ ಜತೆಗೆ ಪ್ರಮುಖ ವೇಗದ ಬೌಲರ್ ಆಗಿ ಹೊರಹೊಮ್ಮಿದ್ದು 10 ಪಂದ್ಯಗಳಲ್ಲಿ 48 ವಿಕೆಟ್ ಕಬಳಿಸಿದ್ದಾರೆ. 2015-16ರ ಸೀಸನ್‌ನಲ್ಲಿ ಅತ್ಯಧಿಕ ವಿಕೆಟ್ ಕಬಳಿಸಿದ್ದು 11 ಪಂದ್ಯಗಳಲ್ಲಿ 41 ವಿಕೆಟ್ ಕಬಳಿಸಿದ್ದಾರೆ.
ಫೈಜ್ ಫಜಲ್: 30 ವರ್ಷದ ಫೈಜ್ ಫಜಲ್ ಮೊದಲ ನಾಲ್ಕು ಐಪಿಎಲ್ ಆವೃತ್ತಿಗಳಲ್ಲಿ ರಾಜಸ್ಥಾನ್ ರಾಯಲ್ಸ್ ಪರ ಆಡಿದ್ದರು. ಕಳೆದ ವರ್ಷದ ವಿಜಯ್ ಹಜಾರೆ ಟ್ರೋಫಿಯಲ್ಲಿ, ವಿದರ್ಭ ಬ್ಯಾಟ್ಸ್‌ಮನ್ 7 ಪಂದ್ಯಗಳಲ್ಲಿ 312 ರನ್ ಗಳಿಸಿದ್ದು, ಸರಾಸರಿ 52.00 ರಷ್ಟಿತ್ತು. ಸೈಯದ್ ಮುಸ್ತಕ್ ಅಲಿ ಟ್ರೋಫಿಯಲ್ಲಿ ಫಜಲ್ 9 ಪಂದ್ಯಗಳಿಂದ 205 ರನ್ ಸಿಡಿಸಿದ್ದರು. ಅವರ ಆಯ್ಕೆಯು ಆಟದ ಮೇಲೆ ಚೆನ್ನಾಗಿ ಗಮನಹರಿಸಿದರೆ ಉಳಿದವೆಲ್ಲಾ ಸುಸೂತ್ರವಾಗಿರುತ್ತದೆ ಎಂಬ ಸಂದೇಶವನ್ನು ಹಿರಿಯ ಆಟಗಾರರಿಗೆ ನೀಡುತ್ತದೆ.
ವೆಬ್‌ದುನಿಯಾ
ಮೊಬೈಲ್ ಆಪ್ (ಡೌನ್‌ಲೋಡ್) ಮಾಡಿಕೊಂಡು ತಾಜಾ ಸುದ್ದಿಗಳನ್ನು ಪಡೆಯಿರಿ.
