ಪಾಕಿಸ್ತಾನದ ಲೆಜೆಂಡ್ ಬ್ಯಾಟ್ಸ್‌ಮನ್ ಹನೀಫ್ ಮೊಹ್ಮದ್ ನಿಧನ

ಪಾಕಿಸ್ತಾನದ ಲೆಜೆಂಡರಿ ಬ್ಯಾಟ್ಸ್‌ಮನ್ ಹನೀಫ್ ಮೊಹ್ಮದ್ ಗುರುವಾರ ಶ್ವಾಸಕೋಶದ ಕ್ಯಾನ್ಸರ್‌ನ ಸುದೀರ್ಘ ಬೇನೆಯ ಬಳಿಕ ಮೃತಪಟ್ಟಿದ್ದು ಅವರಿಗೆ 81 ವರ್ಷಗಳಾಗಿತ್ತು. ಅವರನ್ನು ತೀವ್ರ ನಿಗಾ ಘಟಕದಲ್ಲಿ ಇಡಲಾಗಿತ್ತು ಮತ್ತು ಉಸಿರಾಟದ ಸಮಸ್ಯೆಗಳ ನಿವಾರಣೆಗೆ ವೆಂಟಿಲೇಟರ್ ಅಳವಡಿಸಲಾಗಿತ್ತು.

ಆದರೆ ಇಂದು ನಿಧನರಾಗಿದ್ದಾರೆಂದು ಆಗಾ ಖಾನ್ ಆಸ್ಪತ್ರೆ ವಕ್ತಾರ ತಿಳಿಸಿದರು. ಹನೀಫ್ ಅವರು ವೈದ್ಯಕೀಯವಾಗಿ ಮೃತಪಟ್ಟಿದ್ದಾರೆಂದು 6 ನಿಮಿಷಗಳ ಕಾಲ ಘೋಷಿಸಿದ ಬಳಿಕ ಅವರ ಹೃದಯಬಡಿತ ಪುನಃ ಆರಂಭವಾಗಿ ಜೀವಂತ ಉಳಿದಿದ್ದರು. ಆದರೆ ಕೆಲವು ಗಂಟೆಗಳ ಬಳಿಕ ತಮ್ಮ ತಂದೆ ಮೃತಪಟ್ಟಿದ್ದಾರೆಂದು ಶೋಯಬ್ ಘೋಷಿಸಿದ್ದಾರೆ.

ತಮ್ಮ ತಂದೆ ಕಳೆದ ಕೆಲವು ವಾರಗಳಿಂದ ತೀವ್ರ ನೋವಿನಿಂದ ಕೂಡಿದ್ದರೂ, ಅವರ ಹೋರಾಟದ ಮನೋಭಾವದಿಂದ ಮನಸ್ಸು ಬಿಗಿಹಿಡಿದಿದ್ದರು ಎಂದು ಶೋಯಬ್ ಹೇಳಿದರು.

1954/55 ರಲ್ಲಿ ಭಾರತಕ್ಕೆ ತೆರಳಿದ ಮೊದಲ ಪಾಕಿಸ್ತಾನ ಪ್ರವಾಸಿ ಟೆಸ್ಟ್ ತಂಡದಲ್ಲಿ ಹನೀಫ್ ಆಡಿದ್ದರು. ಬಳಿಕ 55 ಟೆಸ್ಟ್‌ಗಳನ್ನು ಆಡಿದ್ದರಲ್ಲದೇ ವೆಸ್ಟ್ ಇಂಡೀಸ್ ವಿರುದ್ಧ 337 ರನ್ ಬೃಹತ್ ಸ್ಕೋರ್ ದಾಖಲಿಸಿದ್ದರು. ಇದು ಟೆಸ್ಟ್ ಇತಿಹಾಸದಲ್ಲಿ ಸುದೀರ್ಘ ಇನ್ನಿಂಗ್ಸ್ ಆಗಿ ಉಳಿದಿದೆ.