IND vs ENG: ಪತ್ನಿಗಾಗಿ ಟೆಸ್ಟ್ ಕೈ ಬಿಟ್ಟಿದ್ದಕ್ಕೆ ವಿರಾಟ್ ಕೊಹ್ಲಿಗೆ ಶೇಮ್ ಎಂದ ಜೇಮ್ಸ್ ಆಂಡರ್ಸನ್

Photo Courtesy: Twitter

ಧರ್ಮಶಾಲಾ: ಪತ್ನಿಯ ಹೆರಿಗೆಯ ನಿಮಿತ್ತ ಇಂಗ್ಲೆಂಡ್ ವಿರುದ್ಧದ ಎಲ್ಲಾ ಟೆಸ್ಟ್ ಪಂದ್ಯಗಳಿಂದ ಹೊರುಗಳಿದಿರುವ ಟೀಂ ಇಂಡಿಯಾ ಕ್ರಿಕೆಟಿಗ ವಿರಾಟ್ ಕೊಹ್ಲಿ ಬಗ್ಗೆ ಇಂಗ್ಲೆಂಡ್ ಹಿರಿಯ ವೇಗಿ ಜೇಮ್ಸ್ ಆಂಡರ್ಸನ್ ನಾಚಿಕೆಗೇಡು ಎಂದಿದ್ದಾರೆ.

ಇಂಗ್ಲೆಂಡ್ ವಿರುದ್ಧ ಟೆಸ್ಟ್ ಸರಣಿಯ ಐದೂ ಪಂದ್ಯಗಳಿಂದ ವಿರಾಟ್ ಕೊಹ್ಲಿ ಹೊರಗುಳಿದಿದ್ದಾರೆ. ಪತ್ನಿ ಅನುಷ್ಕಾ ಶರ್ಮಾ ಇತ್ತೀಚೆಗೆ ಲಂಡನ್ ನಲ್ಲಿ ಗಂಡು ಮಗುವಿಗೆ ಜನ್ಮ ನೀಡಿದ್ದಾರೆ. ಹೀಗಾಗಿ ಪತ್ನಿ ಮಕ್ಕಳ ಜೊತೆಗಿರಲು ಕೊಹ್ಲಿ ಟೆಸ್ಟ್ ಸರಣಿಯಿಂದ ಹೊರಗುಳಿಯುವ ನಿರ್ಧಾರ ಮಾಡಿದ್ದರು.

ಆದರೆ ಭಾರತ-ಇಂಗ್ಲೆಂಡ್ ಸರಣಿಯೆಂದರೆ ಕೊಹ್ಲಿ ಮತ್ತು ಆಂಡರ್ಸನ್ ನಡುವಿನ ಮೈದಾನದ ಕದನ ನೋಡಲು ಅಭಿಮಾನಿಗಳು ಉತ್ಸುಹಕರಾಗಿರುತ್ತಾರೆ. ವಿರಾಟ್ ಕೊಹ್ಲಿಗೂ ಟೆಸ್ಟ್ ಮಾದರಿ ಕ್ರಿಕೆಟ್ ಅಚ್ಚುಮೆಚ್ಚು. ಆದರೆ ಕೌಟುಂಬಿಕ ಕಾರಣಕ್ಕೆ ಮಹತ್ವದ ಸರಣಿಯನ್ನೇ ಕೈ ಬಿಟ್ಟಿದ್ದಾರೆ. ಇದರಿಂದ ಆಂಡರ್ಸನ್ ಕೂಡಾ ತಮ್ಮ ಮೈದಾನದ ವೈರಿ ಕೊಹ್ಲಿಯನ್ನು ಮಿಸ್ ಮಾಡಿಕೊಳ್ಳುತ್ತಿದ್ದಾರೆ. ಹೀಗಾಗಿ ಅವರು ತಮ್ಮ ನಿರಾಶೆಯನ್ನು ಈ ರೀತಿ ಹೊರಹಾಕಿದ್ದಾರೆ.

‘ನಾವು ಯಾವತ್ತೂ ನಮ್ಮ ಬೆಸ್ಟ್ ಎದುರಾಳಿಯ ವಿರುದ್ಧ ಆಡಲು ಇಷ್ಟಪಡುತ್ತೇವೆ. ಆದರೆ ಕೊಹ್ಲಿ ಈ ಸರಣಿಯ ಭಾಗವಾಗಿಲ್ಲದೇ ಇರುವುದು ನಾಚಿಕೆಗೇಡಿನ ಸಂಗತಿ. ಕಳೆದ ಕೆಲವು ವರ್ಷಗಳಲ್ಲಿ ನಮ್ಮಿಬ್ಬರ ನಡುವೆ ಅತ್ಯುತ್ತಮ ಹೋರಾಟವಿತ್ತು. ನನಗೆ ಮಾತ್ರವಲ್ಲ, ಒಂದು ತಂಡವಾಗಿ ಒಬ್ಬ ಅತ್ಯುತ್ತಮ ಎದುರಾಳಿಯ ಎದುರು ಆಡಲು ಬಯಸುತ್ತೇವೆ ಮತ್ತು ಆತ ಅಂತಹ ಆಟಗಾರರಲ್ಲೊಬ್ಬ’ ಎಂದಿದ್ದಾರೆ.