IPL 2025: ಉದಯೋನ್ಮುಖ ತಾರೆಗೆ ಕೊಹ್ಲಿ ಹೀಗೆ ಕಿಚಾಯಿಸೋದಾ.. ನೆಟ್ಟಿಗರ ಆಕ್ರೋಶ: ವಿಡಿಯೋ

Photo Credit: X

ಚಂಡೀಘಡ: ಐಪಿಎಲ್ 2025 ರ ನಿನ್ನೆಯ ಕ್ವಾಲಿಫೈಯರ್ ಪಂದ್ಯದಲ್ಲಿ ಪಂಜಾಬ್ ಕಿಂಗ್ಸ್ ನ ಉದಯೋನ್ಮುಖ ಬ್ಯಾಟಿಗನನ್ನು ಆರ್ ಸಿಬಿ ಸ್ಟಾರ್ ಆಟಗಾರ ವಿರಾಟ್ ಕೊಹ್ಲಿ ಕಿಚಾಯಿಸಿದ ರೀತಿ ನೆಟ್ಟಿಗರ ಆಕ್ರೋಶಕ್ಕೆ ಗುರಿಯಾಗಿದೆ. ಈ ವಿಡಿಯೋ ಈಗ ವೈರಲ್ ಆಗಿದೆ.

ನಿನ್ನೆಯ ಪಂದ್ಯವನ್ನು 8 ವಿಕೆಟ್ ಗಳಿಂದ ಭರ್ಜರಿಯಾಗಿ ಗೆದ್ದ ಆರ್ ಸಿಬಿ ಫೈನಲ್ ಗೇರಿದ ಸಾಧನೆ ಮಾಡಿದೆ. ಆರ್ ಸಿಬಿ ನಿನ್ನೆ ಬೌಲಿಂಗ್ ನಲ್ಲಿ ಅದ್ಭುತ ಪ್ರದರ್ಶನ ನೀಡಿತ್ತು. ಇದರಿಂದಾಗಿ ಎದುರಾಳಿಗಳು ಕೇವಲ 101 ರನ್ ಗಳಿಗೆ ಆಲೌಟ್ ಆಗಿದ್ದರು.

ಪಂಜಾಬ್ ಪರ ನಿನ್ನೆ ಉದಯೋನ್ಮುಖ ತಾರೆ ಮುಶೀರ್ ಖಾನ್ ಬ್ಯಾಟಿಂಗ್ ಮಾಡುವಾಗ ಕೊಹ್ಲಿ ಅವರನ್ನು ಸ್ಲೆಡ್ಜ್ ಮಾಡಿದ್ದಾರೆ. ಬ್ಯಾಟ್ ಮಾಡಲು ರೆಡಿಯಾಗುತ್ತಿದ್ದ ಮುಶೀರ್ ಖಾನ್ ಗೆ ವಿಕೆಟ್ ಕೀಪರ್ ಪಕ್ಕ ನಿಂತಿದ್ದ ಕೊಹ್ಲಿ ಕಿಚಾಯಿಸಿದ್ದಾರೆ.

ಈ ಹುಡುಗ ನೀರು ಸರಬರಾಜು ಮಾಡುತ್ತಾನೆ ಎಂದು ಮುಶೀರ್ ಕಡೆಗೆ ಕೈ ತೋರಿಸಿ ಕಿಚಾಯಿಸಿದ್ದಾರೆ. ಇದನ್ನು ಕೇಳಿಸಿಕೊಂಡ ಮುಶೀರ್ ಪೆಚ್ಚಾಗಿದ್ದಾರೆ. ಕೊಹ್ಲಿ ವರ್ತನೆಗೆ ನೆಟ್ಟಿಗರು ಕಿಡಿ ಕಾರಿದ್ದಾರೆ. ಒಬ್ಬ ಹಿರಿಯ ಆಟಗಾರನಾಗಿ ಕೊಹ್ಲಿ ಉದಯೋನ್ಮುಖ ತಾರೆಯನ್ನು ಈ ರೀತಿ ಅವಮಾನಿಸುವುದು ಸರಿಯಲ್ಲ ಎಂದಿದ್ದಾರೆ.