ಐಪಿಎಲ್ 2024: ಅಂಪಾಯರ್ ಚೀಟಿಂಗ್, ಮ್ಯಾಚ್ ಫಿಕ್ಸಿಂಗ್ ಎಂದ ಆರ್ ಸಿಬಿ ಫ್ಯಾನ್ಸ್

ಕೋಲ್ಕೊತ್ತಾ: ಐಪಿಎಲ್ 2024 ರಲ್ಲಿ ನಿನ್ನೆಯ ಕೆಕೆಆರ್ ವಿರುದ್ಧದ ಪಂದ್ಯದಲ್ಲಿ ಯಾಕೋ ರಾಯಲ್ ಚಾಲೆಂಜರ್ಸ್ ಬೆಂಗಳೂರು ತಂಡದ ಅದೃಷ್ಟವೇ ಚೆನ್ನಾಗಿರಲಿಲ್ಲ. ಗೆಲ್ಲಬೇಕಿದ್ದ ಪಂದ್ಯವನ್ನು 1 ರನ್ ನಿಂದ ಸೋತು ಕೂಟದಿಂದಲೇ ನಿರ್ಗಮಿಸಬೇಕಾಯಿತು.

ಈ ಪಂದ್ಯದಲ್ಲಿ ಅಂಪಾಯರ್ ಗಳು ನೀಡಿದ ಕೆಲವೊಂದು ತಪ್ಪು ನಿರ್ಣಯಗಳು ಆರ್ ಸಿಬಿ ಫ್ಯಾನ್ಸ್ ರೊಚ್ಚಿಗೇಳುವಂತೆ ಮಾಡಿದೆ. ಆರ್ ಸಿಬಿ ಬ್ಯಾಟಿಂಗ್ ವೇಳೆ ವಿರಾಟ್ ಕೊಹ್ಲಿಗೆ ಔಟ್ ನೀಡಿದ ಬಾಲ್ ನೋ ಬಾಲ್ ಆಗಿತ್ತು ಎಂಬ ಅನುಮಾನವಿದೆ. ಈ ಬಗ್ಗೆ ಟಿವಿ ಮರುಪರಿಶೀಲನೆ ಮಾಡಿಯೂ ಕೊಹ್ಲಿ ಔಟ್ ತೀರ್ಪು ನೀಡಲಾಗಿತ್ತು. ಇದರ ಬಗ್ಗೆ ಸಿಟ್ಟಿಗೆದ್ದ ಕೊಹ್ಲಿ ಅಂಪಾಯರ್ ಗಳ ಜೊತೆ ವಾಗ್ವಾದಕ್ಕಿಳಿದರು. ಬಳಿಕ ಪೆವಿಲಿಯನ್ ಗೆ ತೆರಳುವಾಗಲೂ ತಮ್ಮ ಬ್ಯಾಟ್ ಗುದ್ದಿ ತಮ್ಮ ನಿರಾಸೆ ಪ್ರದರ್ಶಿಸಿದರು.

ಇನ್ನು, ಆರ್ ಸಿಬಿ ಅಂತಿಮ ಓವರ್ ನಲ್ಲಿ ಗೆಲ್ಲುವ ಎಲ್ಲಾ ಸಾಧ‍್ಯತೆಯಿತ್ತು. ಆದರೆ ಕರ್ಣ್ ಶರ್ಮ ಔಟಾಗಿ ಪಂದ್ಯ ತಿರುವು ಪಡೆಯಿತು. ಆದರೆ ಇದಕ್ಕೆ ಮೊದಲು ತಂಡ 182 ರನ್ ಗಳಿಸಿದ್ದಾಗ ಆರ್ ಸಿಬಿ ಬ್ಯಾಟಿಗ ಹೊಡೆದ ಬಾಲ್ ಬೌಂಡರಿ ಲೈನ್ ಟಚ್ ಆಗಿದ್ದರೂ ಅಂಪಾಯರ್ ಸಿಕ್ಸ್ ನೀಡದೇ ಬೌಂಡರಿ ನೀಡಿದರು. ಇದರ ಬಗ್ಗೆಯೂ ಫ್ಯಾನ್ಸ್ ಆಕ್ರೋಶ ಹೊರಹಾಕಿದ್ದಾರೆ. ಇನ್ನೊಂದು ಬಾಲ್ ನೋ ಬಾಲ್ ಆಗಿದ್ದರೂ ಅಂಪಾಯರ್ ನೋ ಬಾಲ್ ನೀಡಿಲ್ಲ. ಈ ಎಲ್ಲಾ ವಿಚಾರಗಳೂ ಆರ್ ಸಿಬಿ ಫ್ಯಾನ್ಸ್ ಆಕ್ರೋಶಕ್ಕೆ ಕಾರಣವಾಗಿದೆ. ಇದು ಥರ್ಡ್ ಅಂಪಾಯರ್ ಅಲ್ಲ, ಥರ್ಡ್ ಕ್ಲಾಸ್ ಅಂಪಾಯರಿಂಗ್ ಎಂದು ಟೀಕಿಸಿದ್ದಾರೆ.