ಟೀಮ್ ಇಂಡಿಯಾ ಕೋಚ್ ಹುದ್ದೆಗೆ ಅರ್ಜಿ ಆಹ್ವಾನಿಸಿದ ಬಿಸಿಸಿಐ: ಕುಂಬ್ಳೆ ಮುಂದುವರಿಕೆ ಇಲ್ಲ

ಚಾಂಪಿಯನ್ಸ್ ಟ್ರೋಫಿ ಅಂತ್ಯದ ಬಳಿಕ ಜೂನ್ 18ಕ್ಕೆ ಟೀಮ್ ಇಂಡಿಯಾ ಹೆಡ್ ಕೋಚ್ ಆಗಿ ಅನಿಲ್ ಕುಂಬ್ಳೆ ಅವಧಿ ಮುಗಿಯಲಿದ್ದು, ಅವರ ಸ್ಥಾನಕ್ಕೆ ನೂತನ ಕೋಚ್ ತರಲು ಬಿಸಿಸಿಐ ಪ್ರಕ್ರಿಯೆಗಳನ್ನ ಆರಂಭಿಸಿದೆ.  ಅನಿಲ್ ಕುಂಬ್ಳೆ ಅವರನ್ನ ಮುಂದುವರಿಸುವ ಉದ್ದೇಶ ಬಿಸಿಸಿಐಗೆ ಇಲ್ಲ ಎಂದು ಮೂಲಗಳು ತಿಳಿಸಿವೆ

ಬಿಸಿಸಿಐ ಕೋಚ್ ಸ್ಥಾನಕ್ಕೆ ಅರ್ಜಿಗಳನ್ನ ಆಹ್ವಾನಿಸಿದ್ದು, ಈ ಪ್ರಕ್ರಿಯೆಗೆ ಅನಿಲ್ ಕುಂಭ್ಳೆ ಸಹ ನೇರ ಪ್ರವೇಶ ಪಡೆಯಲಿದ್ದಾರೆ ಎಂದು ಬಿಸಿಸಿಐ ತಿಳಿಸಿದೆ. ಕುಂಬ್ಳೆ ಕೋಚ್ ಹುದ್ದೆಗೆ ಬಂದ ಬಳಿಕ ಟೀಮ್ ಇಂಡಿಯಾ ಎಲ್ಲ ಸರಣಿಗಳನ್ನ ಗೆದ್ದಿದೆ. ಆದರೆ, ಅನಿಲ್ ಕುಂಬ್ಳೆ ನಡವಳಿಕೆ ಬಗ್ಗೆ ಬಿಸಿಸಿಐ ಅಸಮಾಧಾನಗೊಂಡಿದೆ. ಸುಪ್ರೀಂಕೋರ್ಟ್ ನೇಮಿಸಿರುವ ಬಿಸಿಸಿಐ ಆಡಳಿತ ಮಂಡಳಿಯನ್ನ ಕುಂಬ್ಳೆ ಸಂಪರ್ಕಿಸಿರುವುದು ಈ ಅಸಮಾಧಾನಕ್ಕೆ ಕಾರಣ ಎನ್ನಲಾಗಿದೆ.

`ಅನಿಲ್ ಕುಂಬ್ಳೆ ಸರಿಯಾದ ಮಾರ್ಗದಲ್ಲಿ ಹೋಗುತ್ತಿದ್ದಾರೆಂದು ನಮಗೆ ಅನ್ನಿಸುತ್ತಿಲ್ಲ. ಅವರ ಅಭಿಪ್ರಾಯ ಹೇಳುವುದಕ್ಕೆ ನಮ್ಮ ವಿರೋಧವಿಲ್ಲ. ಅದಕ್ಕೊಂದು ಮಾರ್ಗ ಮತ್ತು ಶಿಷ್ಟಾಚಾರವಿದೆ. ಅದನ್ನ ಎಲ್ಲ ಕಡೆ ಪಾಲಿಸಬೇಕು. ನಿಮ್ಮನ್ನ ನಂಬುವ ಜನರ ಜೊತೆ ವಿಶ್ವಾಸದಿಂದಿರಬೇಕೆಂದು ಬಿಸಿಸಿಐ ಅಧಿಕಾರಿಯೊಬ್ಬರು ರಾಷ್ಟ್ರೀಯ ಮಾಧ್ಯಮಕ್ಕೆ ತಿಳಿಸಿದ್ದಾರೆ.

ತಾಜಾ ಸುದ್ದಿಗಳನ್ನು ಓದಲು ವೆಬ್‌ದುನಿಯಾ ಮೊಬೈಲ್ ಆ್ಯಪ್ ಡೌನ್‍ಲೋಡ್ ಮಾಡಿಕೊಳ್ಳಿ