ಮುಂಬೈ: ಸೆಲೆಬ್ರಿಟಿಗಳ ವೈಯಕ್ತಿಕ ಜೀವನದ ಬಗ್ಗೆ ಎಲ್ಲರಿಗೂ ಕುತೂಹಲ ಇದ್ದೇ ಇರುತ್ತದೆ. ಆದರೆ ಇದು ಕೆಲವೊಮ್ಮೆ ಎಲ್ಲೆ ಮೀರುತ್ತದೆ. ಇದೇ ಕಾರಣಕ್ಕೆ ಈಗ ಬಾಲಿವುಡ್ ನಟಿ ಅಲಿಯಾ ಭಟ್ ಪೊಲೀಸ್ ಠಾಣೆ ಮೆಟ್ಟಿಲೇರಿದ್ದಾರೆ.
ತಮಗಾದ ಕಹಿ ಅನುಭವವನ್ನು ಅಲಿಯಾ ಭಟ್ ಸೋಷಿಯಲ್ ಮೀಡಿಯಾದಲ್ಲಿ ಹಂಚಿಕೊಂಡಿದ್ದಾರೆ. ಮನೆಯ ಲಿವಿಂಗ್ ರೂಂನಲ್ಲಿ ಕಾಲ ಕಳೆಯುತ್ತಿದ್ದಾಗ ಎದುರು ಬಿಲ್ಡಿಂಗ್ ನ ಟೆರೇಸ್ ಮೇಲಿಂದ ಇಬ್ಬರು ತಮ್ಮ ಮೇಲೆ ಕ್ಯಾಮರಾ ಕೇಂದ್ರೀಕರಿಸಿಕೊಂಡು ಇಟ್ಟಿದ್ದರು.
ನಾನು ನಾರ್ಮಲ್ ಆಗಿ ನನ್ನ ವೈಯಕ್ತಿಕ ಸಮಯ ಕಳೆಯುತ್ತಿದ್ದೆ. ಆದರೆ ಇಬ್ಬರು ನನ್ನ ಮೇಲೆ ಕ್ಯಾಮರಾ ಕಣ್ಣಿರಿಸಿರುವುದು ನೋಡಿ ನಿಜಕ್ಕೂ ಶಾಕ್ ಆಗಿತ್ತು. ಇಂತಹ ಕೆಲಸ ಮಾಡಲು ನಾಚಿಕೆಯಾಗಬೇಕು. ಇದು ನಮ್ಮ ಖಾಸಗಿತನಕ್ಕೆ ತಂದ ಧಕ್ಕೆ. ಇದು ಯಾವ ರೀತಿಯಲ್ಲೂ ಒಪ್ಪುವಂತದ್ದಲ್ಲ’ ಎಂದು ಕದ್ದು ಫೋಟೋ ತೆಗೆದ ಕ್ಯಾಮರಾ ಮ್ಯಾನ್ ಗಳ ವಿರುದ್ಧ ಆಕ್ರೋಶ ಹೊರಹಾಕಿದ್ದರು. ಅಷ್ಟೇ ಅಲ್ಲ, ಅಲಿಯಾ ಈಗ ಈ ವಿಚಾರವನ್ನು ಮುಂಬೈ ಪೊಲೀಸರ ಗಮನಕ್ಕೆ ತಂದಿದ್ದಾರೆ.
ಇದಕ್ಕೆ ನಟಿ ಅನುಷ್ಕಾ ಶರ್ಮಾ ಕೂಡಾ ಬೆಂಬಲ ವ್ಯಕ್ತಪಡಿಸಿದ್ದು, ನಮಗೂ ಈ ರೀತಿ ಅನೇಕ ಬಾರಿ ಆಗಿದೆ. ಇದೇ ಫೋಟೋಗ್ರಾಫರ್ ಗಳು ನಮ್ಮ ಪ್ರೈವೆಸಿಗೂ ಧಕ್ಕೆ ತಂದಿದ್ದರು. ಎಷ್ಟೇ ಹೇಳಿದರೂ ಇವರು ನಮ್ಮ ಮಗಳ ಫೋಟೋವನ್ನು ಕದ್ದು ತೆಗೆದು ಬಹಿರಂಗಪಡಿಸುತ್ತಾರೆ ಎಂದಿದ್ದಾರೆ.