ಹಳೆಯ ಶತ್ರುಗಳ ಹೊಸ ಭೇಟಿ- ಒಂದೇ ವೇದಿಕೆಯಲ್ಲಿ ರೇಖಾ-ಜಯಾ ಬಚ್ಚನ್ !

PR

1970- 80 ರ ದಶಕದಲ್ಲಿ ಬಾಲಿವುಡ್ ನಲ್ಲಿ ರೀಲ್ ಮತ್ತು ರಿಯಲ್ ಲೈಫ್ ನಲ್ಲಿ ಪ್ರೇಮಿಗಳಾಗಿ ರಾರಾಜಿಸಿದ ಜೋಡಿ ಅಮಿತಾಬ್ ಬಚ್ಚನ್ ಮತ್ತು ರೇಖ. ಈ ಜೋಡಿಯ ಗಲಾಟೆ ಅದೆಷ್ಟರ ಮಟ್ಟಿಗೆ ಇತ್ತು ಎಂದರೇ ಇನ್ನೇನು ಅಮಿತಾಬ್ ಜಯಾ ಬಚ್ಚನ್ ಗೆ ಸೋಡಾಚೀಟಿ ನೀಡಿ ರೇಖಾ ಜೊತೆ ಸಂಸಾರ ಹೂಡುವುದು ಖಂಡಿತಾ ಅನ್ನುವಂತಹ ವಾತಾವರಣ ಏರ್ಪಟ್ಟಿತ್ತು.

ಆದರೇ ಬೆಂಗಳೂರಿನಲ್ಲಿ ಕೂಲಿ ಚಿತ್ರೀಕರಣ ನಡೆಯುತ್ತಿದ್ದಾಗ ಬಿಗ್ ಬಿಗೆ ಆದ ಗಾಯದಿಂದ ಆಸ್ಪತ್ರೆಗೆ ಸೇರುವಂತಾಯಿತು. ಅದಾದ ಬಳಿಕ ರೇಖ ಜೊತೆಗಿನ ಬಾಂಧವ್ಯಕ್ಕೆ ಬೈ ಹೇಳಿದರು ಅಮಿತಾಬ್. ಅಷ್ಟೇ ಅಲ್ಲದೇ ಇವರಿಬ್ಬರು ನಟಿಸುವುದಕ್ಕೂ ಆದ್ಯತೆ ನೀಡಲಿಲ್ಲ ನಂತರದ ದಿನಗಳಲ್ಲಿ! ಚಿರಯೌವನೆ ರೇಖ ಮತ್ತು ಅಮಿತಾಬ್ ಸಿನಿಮಾಗಳಲ್ಲೂ ಒಟ್ಟಿಗೆ ನಟಿಸಲಿಲ್ಲ.ಜಯ, ರೇಖ ಮತ್ತು ಅಮಿತಾಬ್ ನಟನೆಯ ಸಿಲ್ಸಿಲಾ ಚಿತ್ರ ರಿಲೀಸ್ ಆಗಿ ಅದಾಗಲೇ 33 ವರ್ಷಗಳೇ ಕಳೆದಿವೆ. ಇಷ್ಟು ವರ್ಷಗಳ ಕಾಲ ಯಾವುದೇ ಸಮಾರಂಭ ಆಗಿರಲಿ ರೇಖಾ ಮತ್ತು ಜಯಾ ಬಚ್ಚನ್ ಒಟ್ಟಿಗೆ ಅನೇಕ ಕಾರ್ಯಕ್ರಮಗಳಲ್ಲಿ ಭಾಗವಹಿಸಿದರೂ ಒಬ್ಬರನ್ನೊಬ್ಬರು ನೋಡುವುದಕ್ಕೇ ಹೋಗದೆ ತಮ್ಮ ಪಾಡಿಗೆ ತಾವು ಇರುತ್ತಿದ್ದರು.

ಈ ಮೂವರ ನಡುವೆ ಇದ್ದ ಶೀತಲ ಮೌನಕ್ಕೆ ಈಗ ತೆರೆ ಬಿದ್ದಿದೆ. ಅದೂ ಸಂಕ್ರಾಂತಿ ಹಬ್ಬದಂದು ಅನೇಕ ವರ್ಷಗಳ ವೈಮನಸ್ಯ ದೂರವಾದಂತೆ ಕಾಣುತ್ತಿದೆ.

ಇತ್ತೀಚೆಗೆ ನಡೆದ ಅವಾರ್ಡ್ ಕಾರ್ಯಕ್ರಮ ಒಂದರಲ್ಲಿ ರೇಖಾಳನ್ನು ಕಂಡೊಡನೆ ಅಮಿತಾಬ್ ಬಚ್ಚನ್ ಕೈಜೋಡಿಸಿ ನಮಸ್ತೆ ಹೇಳಿದರಂತೆ. ಆಗ ರೇಖಾ ಸಹ ನಮಸ್ಕಾರ ಹೇಳಿದರಂತೆ. ಅದೇ ರೀತಿ ಜಯಾ ಮತ್ತು ರೇಖ ಒಬ್ಬರನ್ನೊಬ್ಬರು ಹಿಡಿದುಕೊಂಡು ನಗುತ್ತಾ ಮಾತನಾಡಿ ಎಲ್ಲರ ಗಮನ ಸೆಳೆದರಂತೆ! ಈ ದೃಶ್ಯಗಳು ಅಲ್ಲಿದ್ದ ಕ್ಯಾಮರಾಗಳಿಗೆ ಆಹಾರವಾಗಿದ್ದು ಸುಳ್ಳಲ್ಲ. ಇದ್ದಕ್ಕಿದ್ದ ಹಾಗೆ ಈ ರೀತಿ ಬದಲಾವಣೆಗೆ ಕಾರಣವೇನು ಎಂಬುದು ಸದ್ಯಕ್ಕೆ ಬಿಟೌನ್ ಮಂದಿಯ ತಲೆ ಕೆಡುವಂತೆ ಮಾಡಿದೆ.