ದಪ್ಪಗಾಗಬೇಕೆ? ಹಾಗಾದರೆ ಇಲ್ಲಿ ಕೇಳಿ!

IFM

ತೆಳ್ಳಗಾಗುವುದು ಹೇಗೆ ಕಷ್ಟವೋ ಹಾಗೆಯೇ ದಪ್ಪಗಾಗುವುದೂ ಕೂಡಾ. ಬಹಳಷ್ಟು ಮಂದಿ ದಪ್ಪಗಾಗಬೇಕು ಎಂದು ಏನೆಲ್ಲಾ ಸರ್ಕಸ್ ಮಾಡಿದರೂ ದಪ್ಪಗಾಗಲು ಸಾಧ್ಯವಾಗುವುದಿಲ್ಲ ಎಂದು ಅಲವತ್ತುಕೊಳ್ಳುತ್ತಾರೆ. ಮನಸ್ಸು ಮಾಡಿದರೆ ಖಂಡಿತ ದಪ್ಪಗಾಗಲು ಸಾಧ್ಯವಿದೆ. ಆದರೆ ದಪ್ಪಗಾಗಲು ಯಾವುದೇ ಶಾರ್ಟ್‌ಕಟ್ ಮಾರ್ಗಗಳಿಲ್ಲ ಎಂಬುದನ್ನು ಮೊದಲು ನೆನಪಿಟ್ಟುಕೊಳ್ಳಬೇಕು. ಅಷ್ಟೇ ಅಲ್ಲ, ಅಷ್ಟೇ ಕಾಳಜಿ ಹಾಗೂ ತಾಳ್ಮೆಯೂ ಬೇಕು.

ಸರಿಯಾಗಿ ತಿನ್ನಿ: ದಪ್ಪಗಾಗುವವರು ಮೊದಲು ಗಮನ ಹರಿಸಬೇಕಾಗಿದ್ದು ತಿನ್ನುವುದರ ಮೇಲೆ. ದಿನವೂ ಆರೋಗ್ಯಕರ ಆಹಾರವನ್ನೇ ಸೇವಿಸಿ. ದಿನಕ್ಕೆ ಮೂರು ಪರಿಪೂರ್ಣ ಊಟ ಹಾಗೂ ಮೂರು ಉಪಹಾರದ ಮೂಲಕ ಹೊಟ್ಟೆ ತುಂಬಿಸಿಕೊಳ್ಳಬೇಕು. ಆದರೆ ಊಟ ಹಾಗೂ ಇನ್ನೊಂದು ಉಪಹಾರ (ತಿಂಡಿ)ಯ ನಡುವೆ ಮೂರು ಗಂಟೆಗಳ ಅಂತರವಿರುವಂತೆ ನೋಡಿಕೊಳ್ಳಿ. ಆಗ ನೀವು ತಿಂದ ಆಹಾರ ಸಂಪೂರ್ಣ ಕರಗಲು ಅವಕಾಶ ನೀಡಿದಂತಾಗುತ್ತದೆ. ಆದರೆ 5-6 ಗಂಟೆಗಳ ಕಾಲ ಆಹಾರವೇ ಇಲ್ಲದೆ ಖಾಲಿ ಹೊಟ್ಟೆಯಲ್ಲಿ ಇರಬೇಡಿ.

ವ್ಯಾಯಾಮ ಮಾಡಿ: ಪ್ರತಿದಿನವೂ ವ್ಯಾಯಾಮ ಮಾಡಿ. ತೆಳ್ಳಗಾಗಲು ಹೇಗೆ ವ್ಯಾಯಾಮ ಮುಖ್ಯವೋ ಹಾಗೆಯೇ ದಪ್ಪಗಾಗಲು ಕೂಡಾ. ತೆಳ್ಳಗಿರುವವರು ಯಾವಾಗಲೂ ವ್ಯಾಯಾಮ ಅವರಿಗೆ ಒಳ್ಳೆಯದಲ್ಲ ಎಂದು ತಿಳಿದಿರುತ್ತಾರೆ. ಆದರೆ ಇದು ಶುದ್ಧ ಸುಳ್ಳು. ಬರೀ ತಿನ್ನುತ್ತಾ ಕೂತರೆ ಖಂಡಿತಾ ಸಾಲದು. ನೀವು ದಪ್ಪಗಾಗಬೇಕು, ಆದರೆ ಬೊಜ್ಜು ಬರಬಾರದು ಎಂಬ ಆಸೆ ನಿಮಗಿದ್ದರೆ ಖಂಡಿತಾ ವ್ಯಾಯಾಮ ಮಾಡಿ. ಆದರೆ, ತೂಕ ಹೆಚ್ಚಿಸಿಕೊಳ್ಳುವ ವ್ಯಾಯಾಮ, ತೂಕ ಕಳೆದುಕೊಳ್ಳುವ ವ್ಯಾಯಾಮ ಎಂದು ಎರಡು ವರ್ಗೀಕರಣವಿದೆ. ನೀವು ಮಾಡಿಕೊಳ್ಳಬೇಕಾದ್ದು ತೂಕ ಹೆಚ್ಚಿಸಿಕೊಳ್ಳುವ ವ್ಯಾಯಾಮ. ಅದಕ್ಕಾಗಿ ತಜ್ಞರನ್ನು ಸಂಪರ್ಕಿಸಿ. ಅಥವಾ ವ್ಯಾಯಾಮ ಶಾಲೆಗಳನ್ನು ಸಂಪರ್ಕಿಸಿ.

IFM

ಪ್ರೊಟೀನ್ ಯುಕ್ತ ಆಹಾರ: ನೀವು ವ್ಯಾಯಾಮ ಮಾಡುವಾಗ ನಿಮ್ಮ ದೇಹದಲ್ಲಿ ಸಾಕಷ್ಟು ಅಮೈನೋ ಆಸಿಡ್ ಇರಬೇಕು. ಇಲ್ಲವಾದರೆ ಮೂಳೆಗಳಿಗೆ ಪೆಟ್ಟಾಗುವ ಸಂಭವವಿದೆ. ಅಮೈನೋ ಆಸಿಡ್ ನಿಮ್ಮ ದೇಹದಲ್ಲಿ ಸಂಗ್ರಹವಾಗಬೇಕೆಂದರೆ ನೀವು ಉತ್ತಮ ಪ್ರೋಟೀನ್ ಯುಕ್ತ ಆಹಾರ ಪ್ರತಿನಿತ್ಯ ಸೇವಿಸಬೇಕು.

ದೇಹದಲ್ಲಿ ಉತ್ತಮ ಮಾಂಸಖಂಡಗಳು ವೃದ್ಧಿಯಾಗಬೇಕೆಂದರೆ ಪ್ರೋಟೀನ್ ಯುಕ್ತ ಆಹಾರ ಮುಖ್ಯ. ನೀವು ನಿಮ್ಮ ದೇಹಕ್ಕೆ ಅಗತ್ಯವಾದಷ್ಟು ಪ್ರೊಟೀನ್‌ಯುಕ್ತ ಆಹಾರ ಸೇವಿಸದಿದ್ದರೆ ನೀವು ವ್ಯಾಯಾಮ ಮಾಡಿದರೂ ಪ್ರಯೋಜನವಾಗುವುದಿಲ್ಲ. ಹಾಗಾಗಿ ನಿಮ್ಮ ದೇಹಕ್ಕೆ ಎಷ್ಟು ಪ್ರೊಟೀನ್ ಬೇಕು ಎಂಬುದನ್ನು ನೀವೇ ಲೆಕ್ಕಾಚಾರ ಹಾಕಿಗೊಳ್ಳಬೇಕು. ನೀವು ಪ್ರತಿದಿನ 2.2 ಗ್ರಾಂ/ಕೆಜಿ ಪ್ರೊಟೀನ್ ಸೇವಿಸಬೇಕು. ಅರ್ಥಾತ್, ನೀವು 50 ಕೆಜಿ ತೂಕವಿದ್ದರೆ, ನೀವು ಸೇವಿಸಬೇಕಾದ ಪ್ರೊಟೀನ್ ಕಂಡುಹಿಡಿಯಲು 2.2 ಗ್ರಾಂ ಜತೆಗೆ ನಿಮ್ಮ ತೂಕದಿಂದ ಗುಣಿಸಬೇಕು. ( ಉದಾ- 50x2.2=111) ಹಾಗಾಗಿ 50 ಕೆಜಿ ತೂಕವಿದ್ದವರು ಪ್ರತಿದಿನ ಸೇವಿಸಬೇಕಾದ ಪ್ರೊಟೀನ್ ಪ್ರಮಾಣ 111ಗ್ರಾಂ. ಮೀನು, ಡೈರಿ ಉತ್ಪನ್ನಗಳು (ಕಡಿಮೆ ಕೊಬ್ಬು ಇರುವ ಪದಾರ್ಥಗಳು), ಮಾಂಸ, ರೋಸ್ಟ್ ಮಾಡದ ನಟ್ಸ್ (ಗೋಡಂಬಿ, ಬಾದಾಮಿ, ಪಿಸ್ತಾ, ವಾಲ್ನಟ್) ಚೀನಿಕಾಯಿ ಬೀಜ, ಕುಂಬಳಕಾಯಿ ಬೀಜ, ಯೂರ್ಯಕಾಂತಿ ಬೀಜ ಇತ್ಯಾದಿಗಳೆಲ್ಲವುಗಳಲ್ಲಿ ಪ್ರೊಟೀನ್ ಇರುತ್ತದೆ.

ಹಾಲು ತುಂಬ ಪ್ರೊಟೀನ್ ಹೊಂದಿರುವ ಆಹಾರ. ಹಾಲು ಕುಡಿದ ಮೇಲೆ ಅದು ದೇಹಕ್ಕೆ ಬೇಕಾದ ಸೂಕ್ತ ಅಮೈನೋ ಆಸಿಡ್ ಅಂಶವನ್ನೂ ನೀಡುತ್ತದೆ. ಹಾಗಾಗಿ ಹಾಲು ತುಂಬಾ ಉತ್ತಮ. ಆದರೆ, ಹಾಲಿನಲ್ಲಿ ತುಪ್ಪ ಮಿಕ್ಸ್ ಮಾಡಿ ಕುಡಿಯುವುದು ಒಳ್ಳೆಯದಲ್ಲ.

PR

ಜಂಕ್ ಫುಡ್ ಬೇಡ: ದಪ್ಪಗಾಗುವುದು ಎಂದರೆ ಜಂಕ್ ಫುಡ್ ತಿಂದು ಕೊಬ್ಬು ಬೆಳೆಸಿಕೊಳ್ಳುವುದಂತೂ ಖಂಡಿತ ಅಲ್ಲ. ದಪ್ಪಗಾಗಲು ಫಾಸ್ಟ್ ಫುಡ್, ಜಂಕ್ ಫುಡ್ ಮೊರೆ ಹೋಗಿ ಶಾರ್ಟ್ ಕಟ್ ಮೂಲಕ ದಪ್ಪಗಾಗುವುದು ಆರೋಗ್ಯಕರವಲ್ಲ. ಪೋಷಕಾಂಶಯುಕ್ತ ಹೆಚ್ಚು ಕ್ಯಾಲೊರಿಯಿರುವ ಆರೋಗ್ಯಕರ ಆಹಾರವನ್ನೇ ಸೇವಿಸಿದರೆ ಉತ್ತಮ. ಹೆಚ್ಚು ಪ್ರೋಟೀನ್ ಇರುವ ಆಹಾರ, ಹೆಚ್ಚು ಕಾರ್ಬೋಹೈಡ್ರೇಟ್ ಇರುವ ಹಾಗೂ ಆರೋಗ್ಯಕರ ಕೊಬ್ಬು ಮಾತ್ರ ಸೇವಿಸಬಹುದು.

ಆರೋಗ್ಯಕರ ಕೊಬ್ಬು: ಬಹಳಷ್ಟು ಜನ ತುಪ್ಪ ಹಾಗೂ ಬೆಣ್ಣೆ ತಿಂದರೆ ಬೇಗ ದಪ್ಪಗಾಗುತ್ತಾರೆ ಎಂದು ತಿಳಿದಿರುತ್ತಾರೆ. ಆದರೆ ಇದು ಖಂಡಿತ ತಪ್ಪು. ತುಪ್ಪ ಅಥವಾ ಬೆಣ್ಣೆ ಆರೋಗ್ಯಕ್ಕೆ ಹಿತಕರವಾದ ಕೊಬ್ಬಲ್ಲ. ಇದು ಬೊಜ್ಜು ಬೆಳೆಸುತ್ತದೆ. ಹಾಗಾಗಿ ಇದರ ಹೆಚ್ಚು ಸೇವನೆ ಒಳ್ಳೆಯದೂ ಅಲ್ಲ. ಆಲಿವ್ ಎಣ್ಣೆ, ಸನ್‌ಫ್ಲವರ್ ಎಣ್ಣೆ, ಕ್ಯಾನೋಲಾ, ಲಿನ್ಸೀಡ್ ಎಣ್ಣೆಗಳು ಆಹಾರದಲ್ಲಿ ಬಳಕೆ ಆರೋಗ್ಯಕರ.

ಇನ್ನೂ ಕೆಲವರು ಬೀರ್ ಕುಡಿದರೆ ದಪ್ಪಗಾಗಬಹುದು ಎಂದು ಬೀರ್ ಕುಡಿಯುವ ಶಾರ್ಟ್ ಕಟ್ ಮಾರ್ಗವನ್ನು ಹಿಡಿಯುತ್ತಾರೆ. ಇದೂ ಕೂಡಾ ಖಂಡಿತ ತಪ್ಪು. ಅದು ನಿಮ್ಮನ್ನು ದಪ್ಪಗಾಗಿಸಿವುದಿಲ್ಲ, ಬದಲಾಗಿ ಹೆಚ್ಚು ಕೊಬ್ಬು ತುಂಬುವಂತೆ ಮಾಡಿ ಅನಾರೋಗ್ಯಕರ ದಪ್ಪವನ್ನು ನಿಮಗೆ ನೀಡುತ್ತದೆ.

ಮಾತ್ರೆ ಬೇಡ: ಪ್ರೊಟೀನ್ ನಿಮ್ಮ ಆಹಾರದಿಂದಲೇ ಬರುವಂತಿದ್ದರೆ ಆರೋಗ್ಯಕ್ಕೆ ಒಳ್ಳೆಯದು. ಪ್ರೊಟೀನ್ ಮಾತ್ರೆಗಳು ಆರೋಗ್ಯಕ್ಕೆ ಹಿತಕಾರಿಯಲ್ಲ. ಪ್ರೋಟೀನ್ ಮಾತ್ರೆಗಳು, ಅಥವಾ ಇನ್ನಾವುದೇ ಅಂಗಡಿಗಳಲ್ಲಿ ಸಿಗುವ ದಪ್ಪಗಾಗುವ ಸೂತ್ರಗಳಿಗೆ ಕಟ್ಟುಬಿದ್ದು ಮನೆಗೆ ಒಯ್ದು ಪ್ರಯೋಗ ಮಾಡಬೇಡಿ. ಅದರ ಬದಲು ವೈದ್ಯರನ್ನು ಸಂಪರ್ಕಿಸಿ, ಸಲಹೆ ಪಡೆಯಿರಿ.

ಬೆಳಿಗ್ಗೆ ಬಾಳೆಹಣ್ಣು ಹಾಗೂ ಹಾಲು ಕುಡಿಯಿರಿ. ಅಥವಾ ಬಾಳೆಹಣ್ಣಿನ ಮಿಲ್ಕ್ ಶೇಕ್ ಮಾಡಿ ಕುಡಿಯಿರಿ. ಉಪಹಾರದ ಜತೆಗೆ ಹೋಲ್‌ಗ್ರೈನ್ ಟೋಸ್ಟ್, ಹಣ್ಣುಗಳು, ನಟ್ಸ್ (ಪಿಸ್ತಾ, ವಾಲ್ನಟ್, ಗೋಡಂಬಿ ಇತ್ಯಾದಿ) ತಿನ್ನಬಹುದು.

ಮಧ್ಯಾಹ್ನ ಊಟದ ಜತೆ, ರೋಟಿ, ಚಪಾತಿ, ಹೋಲ್‌ಗ್ರೈನ್ ಬ್ರೆಡ್, ಹಸಿ ತರಕಾರಿಗಳು, ಪನೀರ್, ದಾಲ್, ರಾಜ್ಮಾ ಮತ್ತಿತರ ಆಹಾರಗಳನ್ನೂ ತೆಗೆದುಕೊಳ್ಳಬಹುದು. ಊಟದ ನಂತರ ಸಂಜೆ, ಹಣ್ಣುಗಳು, ಸ್ಯಾಂಡ್‌ವಿಚ್, ಮೊಸರು, ಚೀಸ್, ಸಲಾಡ್ ತೆಗೆದುಕೊಳ್ಳಬಹುದು. ಎಣ್ಣೆಯಲ್ಲಿ ಕರಿದ ತಿಂಡಿಗಳಾದ ಸಮೋಸಾ, ಪಕೋಡಾ ಬಜ್ಜಿ, ಬೋಂಡಾಗಳು ಒಳ್ಳೆಯದಲ್ಲ.