ಶ್ರೀ ಕಾಮೇಶ್ವರೀ ಸ್ತುತಿ ಇಂದು ತಪ್ಪದೇ ಪಠಿಸಿ

ಕಾಮೇಶ್ವರೀ ದೇವಿಯ ಕೃಪೆಯಿಂದ ವೈವಾಹಿಕ ಜೀವನದಲ್ಲಾಗುವ ಮನಸ್ತಾಪಗಳು ಮತ್ತು ಅಡಚಣೆಗಳು ದೂರವಾಗಿ, ದಂಪತಿಗಳ ನಡುವೆ ಪ್ರೀತಿ, ಸಾಮರಸ್ಯ ಹಾಗೂ ಸೌಹಾರ್ದತೆ ಹೆಚ್ಚಬೇಕೆಂದರೆ ಶ್ರೀ ಕಾಮೇಶ್ವರೀ ಸ್ತುತಿಯನ್ನು ಪಠಿಸಿ.

ಯುಧಿಷ್ಠಿರ ಉವಾಚ |
ನಮಸ್ತೇ ಪರಮೇಶಾನಿ ಬ್ರಹ್ಮರೂಪೇ ಸನಾತನಿ |
ಸುರಾಸುರಜಗದ್ವಂದ್ಯೇ ಕಾಮೇಶ್ವರಿ ನಮೋಽಸ್ತು ತೇ || ೧ ||

ನ ತೇ ಪ್ರಭಾವಂ ಜಾನಂತಿ ಬ್ರಹ್ಮಾದ್ಯಾಸ್ತ್ರಿದಶೇಶ್ವರಾಃ |
ಪ್ರಸೀದ ಜಗತಾಮಾದ್ಯೇ ಕಾಮೇಶ್ವರಿ ನಮೋಽಸ್ತು ತೇ || ೨ ||

ಅನಾದಿಪರಮಾ ವಿದ್ಯಾ ದೇಹಿನಾಂ ದೇಹಧಾರಿಣೀ |
ತ್ವಮೇವಾಸಿ ಜಗದ್ವಂದ್ಯೇ ಕಾಮೇಶ್ವರಿ ನಮೋಽಸ್ತು ತೇ || ೩ ||

ತ್ವಂ ಬೀಜಂ ಸರ್ವಭೂತಾನಾಂ ತ್ವಂ ಬುದ್ಧಿಶ್ಚೇತನಾ ಧೃತಿಃ |
ತ್ವಂ ಪ್ರಬೋಧಶ್ಚ ನಿದ್ರಾ ಚ ಕಾಮೇಶ್ವರಿ ನಮೋಽಸ್ತು ತೇ || ೪ ||

ತ್ವಾಮಾರಾಧ್ಯ ಮಹೇಶೋಽಪಿ ಕೃತಕೃತ್ಯಂ ಹಿ ಮನ್ಯತೇ |
ಆತ್ಮಾನಂ ಪರಮಾತ್ಮಾಽಪಿ ಕಾಮೇಶ್ವರಿ ನಮೋಽಸ್ತು ತೇ || ೫ ||

ದುರ್ವೃತ್ತವೃತ್ತಸಂಹರ್ತ್ರಿ ಪಾಪಪುಣ್ಯಫಲಪ್ರದೇ |
ಲೋಕಾನಾಂ ತಾಪಸಂಹರ್ತ್ರಿ ಕಾಮೇಶ್ವರಿ ನಮೋಽಸ್ತು ತೇ || ೬ ||

ತ್ವಮೇಕಾ ಸರ್ವಲೋಕಾನಾಂ ಸೃಷ್ಟಿಸ್ಥಿತ್ಯಂತಕಾರಿಣೀ |
ಕರಾಳವದನೇ ಕಾಳಿ ಕಾಮೇಶ್ವರಿ ನಮೋಽಸ್ತು ತೇ || ೭ ||

ಪ್ರಪನ್ನಾರ್ತಿಹರೇ ಮಾತಃ ಸುಪ್ರಸನ್ನಮುಖಾಂಬುಜೇ |
ಪ್ರಸೀದ ಪರಮೇ ಪೂರ್ಣೇ ಕಾಮೇಶ್ವರಿ ನಮೋಽಸ್ತು ತೇ || ೮ ||

ತ್ವಾಮಾಶ್ರಯಂತಿ ಯೇ ಭಕ್ತ್ಯಾ ಯಾಂತಿ ಚಾಶ್ರಯತಾಂ ತು ತೇ |
ಜಗತಾಂ ತ್ರಿಜಗದ್ಧಾತ್ರಿ ಕಾಮೇಶ್ವರಿ ನಮೋಽಸ್ತು ತೇ || ೯ ||

ಶುದ್ಧಜ್ಞಾನಮಯೇ ಪೂರ್ಣೇ ಪ್ರಕೃತಿಃ ಸೃಷ್ಟಿಭಾವಿನೀ |
ತ್ವಮೇವ ಮಾತರ್ವಿಶ್ವೇಶಿ ಕಾಮೇಶ್ವರಿ ನಮೋಽಸ್ತು ತೇ || ೧೦ ||

ಇತಿ ಶ್ರೀಮಹಾಭಾಗವತೇ ಮಹಾಪುರಾಣೇ ಯುಧಿಷ್ಠಿರಕೃತ ಶ್ರೀ ಕಾಮೇಶ್ವರೀ ಸ್ತುತಿಃ |