ದ. ಆಫ್ರಿಕಾ ಸರಣಿಯಲ್ಲಿ ಸಚಿನ್ ಪಾತ್ರ ಮಹತ್ವದಲ್ಲ: ಧೋನಿ

ಮುಂಬರುವ ದಕ್ಷಿಣ ಆಫ್ರಿಕಾ ವಿರುದ್ಧದ ಮೂರು ಪಂದ್ಯಗಳ ಟೆಸ್ಟ್ ಸರಣಿಯಲ್ಲಿ ಮಾಸ್ಟರ್ ಬ್ಲಾಸ್ಟರ್ ಸಚಿನ್ ತೆಂಡೂಲ್ಕರ್ ಪಾತ್ರ ಮಹತ್ವದಲ್ಲ ಎಂದು ನಾಯಕ ಮಹೇಂದ್ರ ಸಿಂಗ್ ಧೋನಿ ಅಭಿಪ್ರಾಯಪಟ್ಟಿದ್ದಾರೆ.

ಮೊದಲ ಟೆಸ್ಟ್ ಸೆಂಚುರಿಯನ್‌ನಲ್ಲಿ ಗುರುವಾರ ಆರಂಭವಾಗಲಿದೆ. ಆದರೆ ಬಹುತೇಕ ಎಲ್ಲಾ ಮಾಧ್ಯಮಗಳು 50ನೇ ಟೆಸ್ಟ್ ಶತಕ ಎದರು ನೋಡುತ್ತಿರುವ ಸಚಿನ್ ತೆಂಡೂಲ್ಕರ್ ಮತ್ತು ದಕ್ಷಿಣ ಆಫ್ರಿಕಾ ವೇಗಿ ಡೇಲ್ ಸ್ಟೈನ್ ಅವರನ್ನು ಹೈಲೆಟ್ ಮಾಡುತ್ತಿದ್ದು, ಇವರಿಬ್ಬರ ನಡುವಣ ಸೆಣಸಾಟಕ್ಕೆ ಹೆಚ್ಚಿನ ಮಹತ್ವ ನೀಡುತ್ತಿದೆ.

ಕ್ಷಣ ಕ್ಷಣದ ತಾಜಾ ಸುದ್ದಿಗಳಿಗೆ, ವಿಶೇಷ ಸುದ್ದಿಗಳಿಗೆ ನಿಮ್ಮ ವೆಬ್‌ದುನಿಯಾಕ್ಕೆ ಭೇಟಿ ಕೊಡಿ

ಆದರೆ ಮಾಧ್ಯಮ ವಿಶ್ಲೇಷಣೆಯನ್ನು ತಳ್ಳಿಹಾಕಿರುವ ನಾಯಕ ಧೋನಿ, ಇದು ಎರಡು ಅಗ್ರ ತಂಡಗಳ ನಡುವಣ ಹೋರಾಟವಾಗಿದೆ. ಹಾಗೆಯೇ ಭಾರತ ಅಗ್ರವಾಗಿ ಹೊರಹೊಮ್ಮಬೇಕಾದಲ್ಲಿ ತಂಡವಾಗಿ ಪ್ರದರ್ಶನ ನೀಡಬೇಕಾಗಿದೆ ಎಂದವರು ಹೇಳಿದರು.

ಕ್ರಿಕೆಟ್ ಎಂಬುದು ವೈಯಕ್ತಿಯ ಆಟಕ್ಕಿಂತ ತಂಡದ ಸಾಧನೆ ಮಹತ್ವದ್ದಾಗಿದೆ. ಸರಣಿಗೆ ಹೇಗೆ ಸಜ್ಜರಾಗಬೇಕು ಎಂಬುದಕ್ಕೆ ನಾವು ಹೆಚ್ಚಿನ ಪ್ರಾಧಾನ್ಯತೆ ನೀಡುತ್ತಿದ್ದೇವೆ ಎಂದು 29ರ ಹರೆಯದ ಧೋನಿ ನುಡಿದರು.

ನಮ್ಮ ತಂಡ ಎಷ್ಟು ಪ್ರತಿಭೆಯನ್ನು ಹೊಂದಿದೆ ಎಂಬುದು ನನಗೆ ತಿಳಿದಿದೆ. ಅತ್ಯುತ್ತಮವಾಗಿ ಸಿದ್ಧರಾಗುವ ಮೂಲಕ ಯೋಜನೆಯನ್ನು ಕಾರ್ಯಗತ ಮಾಡುವುದರತ್ತ ಗಮನ ಹರಿಸುತ್ತಿದ್ದೇವೆ ಎಂದವರು ಹೇಳಿದರು.

ದಕ್ಷಿಣ ಆಫ್ರಿಕಾ ಕೋಚ್ ಕೋರಿ ವಾನ್ ಜೀಲ್ ಕೂಡಾ ಭಾರತೀಯ ನಾಯಕನಿಗೆ ಬೆಂಬಲ ಸೂಚಿಸಿದರು. ಭಾರತದ್ದು ಅತ್ಯುತ್ತಮ ತಂಡ. ನೀವು ಎದುರಾಳಿಗಳ ಬಗ್ಗೆ ಮಾತನಾಡುವಾಗ ವೈಯಕ್ತಿಕ ಆಟಗಾರರನ್ನು ಪರಿಗಣಿಸುವಂತಿಲ್ಲ ಎಂದವರು ಹೇಳಿದರು.

ಅದೇ ಹೊತ್ತಿಗೆ ದಕ್ಷಿಣ ಆಫ್ರಿಕಾದ ಬೌನ್ಸಿ ವಿಕೆಟ್ ಬಗ್ಗೆ ಮಾತನಾಡಿರುವ ಧೋನಿ, ವೇಗಿಗಳು ಉತ್ತಮ ದಾಳಿ ಸಂಘಟಿಸಬಲ್ಲರು ಎಂದು ಆತ್ಮವಿಶ್ವಾಸ ವ್ಯಕ್ತಪಡಿಸಿದರು.

ಚುಟುಕು ಅಥವಾ ಟೆಸ್ಟ್ ಕ್ರಿಕೆಟೇ ಆಗಿರಬಹುದು; ತಂಡದ ಬಹುತೇಕ ಕ್ರಿಕೆಟಿಗರು ಇಲ್ಲಿ ಆಡಿದ ಅನುಭವ ಹೊಂದಿದ್ದಾರೆ. ವಿಕೆಟನ್ನು ಪರೀಶೀಲಿಸಿದ ನಂತರ ಹೇಗೆ ಆಡಬೇಕೆಂದು ನಿರ್ಧರಿಸಲಿದ್ದೇವೆ ಎಂದಿದ್ದಾರೆ.

ಪಿಚ್ ನೆರವು ಇಲ್ಲದ ಹೊರತಾಗಿಯೂ ಭಾರತೀಯ ಬೌಲರುಗಳು ತವರಿನ ಹಾಗೆಯೇ ವಿದೇಶದಲ್ಲಿಯೂ ಅತ್ಯುತ್ತಮ ಪ್ರದರ್ಶನ ನೀಡಿದ್ದಾರೆ ಎಂದವರು ಸೇರಿಸಿದರು.

ಹಾಗೆಯೇ ಹಿಂದಿನ ಅಂಕಿ ಅಂಶಗಳನ್ನು ನಾಯಕ ಧೋನಿ ಬದಿಗೊತ್ತಿದ್ದರು. ಸರಣಿಯು ಇತಿಹಾಸಕ್ಕೆ ಸೀಮಿತವಲ್ಲ. ನಾವಿಲ್ಲಿ ನೀಡಿದ ಪ್ರದರ್ಶನದ ಮೇಲೆ ಫಲಿತಾಂಶ ನಿರ್ಧಾರವಾಗುತ್ತದೆ ಎಂದವರು ಹೇಳಿದರು. ದಕ್ಷಿಣ ಆಫ್ರಿಕಾದಲ್ಲಿ ಭಾರತ ಆಡಿರುವ ಒಟ್ಟು 12 ಪಂದ್ಯಗಳಲ್ಲಿ ಕೇವಲ ಒಂದರಲ್ಲಷ್ಟೇ ಗೆದ್ದುಕೊಂಡಿದೆ. ಹೀಗಾಗಿ ಮಹಿ ಪಡೆ ದಕ್ಷಿಣ ಆಫ್ರಿಕಾ ನೆಲದಲ್ಲಿ ಐತಿಹಾಸಿಕ ಸರಣಿ ಜಯವನ್ನು ಎದುರು ನೋಡುತ್ತಿದೆ.