ತುಂಬ ದೀನ ಪರಿಸ್ಥಿತಿಯಲ್ಲಿರುವ ಅವರು ಊರುಗೋಲಿನ ಸಹಾಯದೊಂದಿಗೆ ಓಡಾಡುತ್ತ ವಿಮೆ ಹಣ ಪಡೆಯಲು ಪ್ರಯತ್ನಿಸುತ್ತಿದ್ದಾರೆ. ಆದರೆ ಅವರದನ್ನು ಪಡೆಯಲು ವಿಫಲವಾಗಿದ್ದಾರೆ.
ಜಾರ್ಖಂಡ್‌ನಲ್ಲಿ ನಡೆದ 2005ರ ಅಸೆಂಬ್ಲಿ ಚುನಾವಣೆ ಸಮಯದಲ್ಲಿ, ಬಸ್ ಚಾಲಕ ಪ್ರೇಮದಾನ್ ಕೆರ್‌ಕಟ್ಟಾ ಮತಗಟ್ಟೆಯಿಂದ ಸಿಬ್ಬಂದಿಗಳನ್ನು ಕರೆದುಕೊಂಡು ಹಿಂತಿರುಗುತ್ತಿದ್ದರು. ಅವರು ಕೊಲೈಬಿರಾ ಘಾಟ್ನ್ನು ದಾಟುತ್ತಿದ್ದಾಗ ಅವರನ್ನು ಗುರಿಯಾಗಿಸಿದ ನಕ್ಸಲರ ಗುಂಪು ಬಸ್ ಮೇಲೆ ಯದ್ವಾತದ್ವಾ ಗುಂಡು ಹಾರಿಸ ತೊಡಗಿತು.
ಪ್ರೇಮದಾನ್ ಕಾಲಿಗೆ ಒಂದು ಗುಂಡು ತಗುಲಿ ಅವರು ಗಂಭೀರವಾಗಿ ಗಾಯಗೊಂಡರು. ಆದಾಗ್ಯೂ, ಬಸ್ ನಿಲ್ಲಿಸದೇ ವೇಗವನ್ನು ತೀವೃಗೊಳಿಸಿದ ಅವರು ಒಂದು ಕಾಲಿನಿಂದ ರಕ್ತ ಸುರಿಯುತ್ತಿದ್ದರೂ, ಇನ್ನೊಂದು ಕಾಲಿನಿಂದ ವೇಗವರ್ಧಕ ಮತ್ತು ಬ್ರೇಕ್ಸ್‌ನ್ನು ನಿರ್ವಹಿಸಿದರು. 5 ಕಿಲೋಮೀಟರ್ ಬಸ್ ಓಡಿಸಿ ಎಲ್ಲರನ್ನೂ ಅಪಾಯದಿಂದ ಪಾರು ಮಾಡಿಸಿದರು ಎಂದು ದಿನಪತ್ರಿಕೆಯೊಂದರಲ್ಲಿ ವರದಿಯಾಗಿದೆ.
ತನ್ನ ನೋವನ್ನು ಲೆಕ್ಕಿಸದೇ 50 ಜನರ ಪ್ರಾಣವನ್ನು ಉಳಿಸಿದ ಆತನ ಶೌರ್ಯವನ್ನು 9 ವರ್ಷಗಳಾದರೂ ಗುರುತಿಸಿಲ್ಲ. ಅವನಿಗೆ ನೀಡುತ್ತೇವೆ ಎಂದಿದ್ದ 5 ಲಕ್ಷ ರೂ ಜೀವವಿಮೆಯನ್ನು ಕೂಡ ಆತ ಪಡೆದಿಲ್ಲ. ಅದಕ್ಕಾಗಿ ಆತ ಪದೇ ಪದೇ ಸರಕಾರಿ ಕಛೇರಿಗೆ ಅಲೆದಿದ್ದಾನೆ.
ಈಗ ಪ್ರೇಮದಾನ್ ತನ್ನ ಬದುಕಿನ ನಿರ್ವಹಣೆಗಾಗಿ ಮತ್ತು ಮಕ್ಕಳನ್ನು ಓದಿಸುವುದಕ್ಕಾಗಿ ಫಾರ್ಮ್ ಒಂದರಲ್ಲಿ ಕೆಲಸ ಮಾಡುತ್ತಿದ್ದಾನೆ.
" ಸರ್ಕಾರ ನನಗೆ ಮಾಡಿದ್ದ ಭರವಸೆಗಳನ್ನು ಪೂರೈಸದಿದ್ದರೂ ಕೂಡ, ಅವರ ನಿರುತ್ಸಾಹ ನನ್ನನ್ನು ದೇಶದ ಸೇವೆ ಮಾಡಲು ತಡೆಯಲು ಸಾಧ್ಯವಿಲ್ಲ" ಎಂದು ಅವರು ಹೇಳಿದ್ದಾರೆ.