ಭಾರತ ವಿರುದ್ಧ ನಿನ್ನೆ ನಡೆದ ಚಾಂಪಿಯನ್ಸ್ ಟ್ರೋಫಿ ಹಾಕಿ ಟೂರ್ನಿಯ ಸೆಮಿಫೈನಲ್ನಲ್ಲಿ ಗೆಲುವು ದಾಖಲಿಸಿದ ಪಾಕಿಸ್ತಾನಿ ಆಟಗಾರರು ಕ್ರೀಡಾಸ್ಫೂರ್ತಿಯನ್ನೇ ಮರೆತು ಮೈದಾನದಲ್ಲಿಯೇ ಅಸಭ್ಯತೆಯನ್ನು ತೋರಿದ್ದಾರೆ...
ಸಾಂಪ್ರದಾಯಿಕ ಎದುರಾಳಿಗಳಾದ ಭಾರತ ಹಾಗೂ ಪಾಕ್ ನಡುವಿನ ಪಂದ್ಯ ತೀವೃ ಹಣಾಹಣಿಯಿಂದ ಕೂಡಿತ್ತು. 4-3 ಗೋಲುಗಳಿಂದ ಭಾರತೀಯ ತಂಡವನ್ನು ಮಣಿಸುವ ಮೂಲಕ ಏಷ್ಯನ್ ಗೇಮ್ಸ್ ನಲ್ಲಾದ ಸೋಲಿಗೆ ಪಾಕಿಸ್ತಾನೀಯರು ಸೇಡು ತೀರಿಸಿಕೊಂಡರು.
ಆದರೆ ಟೀಮ್ ಇಂಡಿಯಾವನ್ನು ಮಣಿಸಿದ ಸಂಭ್ರಮವನ್ನು ಪಾಕ್ ಆಟಗಾರರು ತುಂಬಾ ಕೆಟ್ಟರೀತಿಯಲ್ಲಿ ಆಚರಿಸಿದ್ದು ಮಾತ್ರ ಭಾರತೀಯರನ್ನು ಆಕ್ರೋಶಗೊಳ್ಳುವಂತೆ ಮಾಡಿತು. ಕೆಲ ಆಟಗಾರರು ಮಾಧ್ಯಮಗಳ ಮುಂದೆ ಹೋಗಿ ಮಧ್ಯದ ಬೆರಳನ್ನು ತೋರಿಸಿದರು. ಶರ್ಟ್‌ಗಳನ್ನು ಗಳನ್ನು ಬಿಚ್ಚಿ ಕುಣಿದಾಡಿದರು. ಅಸಹ್ಯ ಮಾತುಗಳನ್ನಾಡಿದರು.
ತಂಡದ ಬಹುತೇಕ ಎಲ್ಲಾ ಆಟಗಾರರು ಒಂದಲ್ಲೊಂದು ರೀತಿಯಲ್ಲಿ ದುರ್ನಡತೆ ತೋರಿ ಕ್ರೀಡೆಯ ಘನತೆಗೆ ಕಪ್ಪುಚುಕ್ಕಿಯನ್ನಿಟ್ಟರು.
ತಮ್ಮ ತಂಡದ ಆಟಗಾರರ ದುರ್ನಡತೆಯ ಬಗ್ಗೆ ಖೇದ ವ್ಯಕ್ತಪಡಿಸಿದ ಪಾಕ್ ಕೋಚ್ ಶಹನಾಜ್ ಶೇಕ್, ಎಲ್ಲರೂ ಯುವ ಆಟಗಾರರಾಗಿದ್ದು, ತಪ್ಪನ್ನು ಮಾಡಿದ್ದಾರೆ ಎಂದು ಕ್ಷಮೆ ಯಾಚಿಸಿದ್ದಾರೆ.
ಪಾಕ್ ಆಟಗಾರರ ಈ ನಡತೆಯನ್ನು ಭಾರತ ತೀವೃವಾಗಿ ಖಂಡಿಸಿದೆ. ಇನ್ನು ಮುಂದೆ ಪಾಕ್ ಜತೆ ಪಂದ್ಯವನ್ನಾಡುವುದಿಲ್ಲ ಎಂದು ಭಾರತ ಹಾಕಿ ಫೆಡರೇಷನ್ ಹೇಳಿದೆ. ಇಂಟರ್‌ನ್ಯಾಶನಲ್ ಹಾಕಿ ಫೆಡರೇಷನ್ ಈ ಕುರಿತು ಯಾವುದೇ ಕ್ರಮಗಳನ್ನು ಕೈಗೊಂಡಿಲ್ಲ. ಇದು ಗೆಲುವಿನ ಆಚರಣೆಯ ಸಂಭ್ರಮ ಎಂದಷ್ಟೇ ಹೇಳಿ ಅದು ಸುಮ್ಮನಾಗಿದೆ.