ಗ್ರಾಂಡ್ ಸ್ಲಾಮ್ ಡಬಲ್ಸ್ ಮಾಜಿ ಚಾಂಪಿಯನ್ ಬಾಬ್ ಹೆವಿಟ್ ಅವರಿಗೆ ಅತ್ಯಾಚಾರ ಮತ್ತು ಅಪ್ರಾಪ್ತ ವಯಸ್ಕರ ಮೇಲೆ ಲೈಂಗಿಕ ದೌರ್ಜನ್ಯ ನಡೆಸಿದ ಆರೋಪದ ಮೇಲೆ ದಕ್ಷಿಣ ಆಫ್ರಿಕಾ ಕೋರ್ಟ್ 6 ವರ್ಷಗಳ ಜೈಲು ಶಿಕ್ಷೆ ವಿಧಿಸಿದೆ.
ಆಸ್ಟ್ರೇಲಿಯಾದಲ್ಲಿ ಜನಿಸಿದ 75 ವರ್ಷ ವಯಸ್ಸಿನ ಹೆವಿಟ್ ದಕ್ಷಿಣ ಆಫ್ರಿಕಾದಲ್ಲಿ 1980 ಮತ್ತು 1990ರ ದಶಕದಲ್ಲಿ ಮಕ್ಕಳಿಗೆ ಟೆನ್ನಿಸ್ ಕೋಚಿಂಗ್ ನೀಡುತ್ತಿದ್ದ ಸಂದರ್ಭದಲ್ಲಿ ಮೂವರು ಅಪ್ರಾಪ್ತ ವಯಸ್ಕ ಬಾಲಕಿಯರ ಮೇಲೆ ಲೈಂಗಿಕ ದೌರ್ಜನ್ಯ ನಡೆಸಿದ್ದಾರೆಂದು ಆರೋಪಿಸಲಾಗಿದೆ.
ಶಿಕ್ಷೆ ವಿಧಿಸುವುದಕ್ಕೆ ಮುಂಚೆ ಹೆವಿಟ್ ತಮ್ಮ ಅನಾರೋಗ್ಯದ ಸ್ಥಿತಿಯನ್ನು ಗಮನಕ್ಕೆ ತೆಗೆದುಕೊಳ್ಳಬೇಕೆಂದು ಕೋರ್ಟ್‌ಗೆ ಮನವಿ ಮಾಡಿದರು.ತಮ್ಮನ್ನು ಜೈಲಿಗೆ ಹಾಕಿದರೆ ಹಲ್ಲೆ ಮಾಡುವುದಾಗಿ ಅಜ್ಞಾತ ಕರೆಗಳು ಎಚ್ಚರಿಸಿರುವುದಾಗಿ ಹೆವಿಟ್ ಹೇಳಿದ್ದಾರೆ.
ತಾವು 2010ರಲ್ಲಿ ಸ್ಟ್ರೋಕ್ ಮತ್ತು 2011ರಲ್ಲಿ ಹೃದಯಾಘಾತಕ್ಕೆ ಒಳಗಾಗಿರುವುದಾಗಿ ಹೆವಿಟ್ ಕೋರ್ಟ್‌ಗೆ ತಿಳಿಸಿದರು. ಹೆವಿಟ್ 1960 ಮತ್ತು 1970ರ ದಶಕಗಳಲ್ಲಿ 9 ಗ್ರಾಂಡ್ ಸ್ಲಾಮ್ ಡಬಲ್ಸ್‌ಗಳನ್ನು ಮತ್ತು 6 ಗ್ರಾಂಡ್ ಸ್ಲಾಮ್ ಮಿಶ್ರಿತ ಡಬಲ್ಸ್ ಪ್ರಶಸ್ತಿಗಳನ್ನು ಗೆದ್ದಿದ್ದಾರೆ.
