ಹೈದರಾಬಾದ್: ಬ್ಯಾಡ್ಮಿಂಟನ್ ಕೋಚಿಂಗ್ ಗಾಗಿ ಬೆಂಗಳೂರು-ಹೈದರಾಬಾದ್ ನಡುವೆ ಓಡಾಡಿ ಬಹುಶಃ ಸೈನಾ ನೆಹ್ವಾಲ್ ಗೂ ಸುಸ್ತಾಗಿರಬೇಕು. ಅದಕ್ಕೆ ಅವರು ಮತ್ತೆ ಹಳೇ ಗುರುವಿನ ಪಾದ ಹಿಡಿದಿದ್ದಾರೆ. ಇದರ ಬಗ್ಗೆ ಅವರೇ ಫೇಸ್ ಬುಕ್ ನಲ್ಲಿ ಸ್ಪಷ್ಟನೆಯನ್ನೂ ನೀಡಿದ್ದಾರೆ.
2014 ರಲ್ಲಿ ಕೋಚ್ ಗೋಪಿಚಂದ್ ಜತೆ ಮುನಿಸುಕೊಂಡು ವಿಮಲ್ ಕುಮಾರ್ ಗೂಡು ಸೇರಿಕೊಂಡಿದ್ದ ಸೈನಾ ಫಾರ್ಮ್ ಮರಳಿ ಪಡೆಯಲು ಹಳೇ ಗುರುವಿನ ಅಕಾಡೆಮಿ ಸೇರಿದ್ದಾರೆ. ಈ ಬಗ್ಗೆ ಬಂದ ಸುದ್ದಿಗಳಿಗೆ ಫೇಸ್ ಬುಕ್ ನಲ್ಲಿ ಸ್ಪಷ್ಟನೆ ನೀಡಿದ್ದಾರೆ.
‘ನಾನು ಮತ್ತೆ ಗೋಪಿಚಂದ್ ಅಕಾಡೆಮಿಗೆ ನನ್ನ ತರಬೇತಿ ಶಿಫ್ಟ್ ಮಾಡುತ್ತಿದ್ದೇನೆ. ಈ ಬಗ್ಗೆ ಗೋಪಿಚಂದ್ ಜತೆ ಚರ್ಚಿಸಿದ್ದು, ಅವರೂ ನನಗೆ ಸಹಾಯ ಮಾಡಲು ಒಪ್ಪಿಕೊಂಡಿದ್ದಾರೆ. ಸದ್ಯದ ಪರಿಸ್ಥಿತಿಯಲ್ಲಿ ನಾನು ನನ್ನ ಗುರಿ ಸಾಧಿಸಲು ಗೋಪಿಚಂದ್ ಮಾತ್ರ ಸಹಾಯ ಮಾಡಬಲ್ಲರು. ಇಷ್ಟು ದಿನ ನನಗೆ ತರಬೇತಿ ನೀಡಿದ ವಿಮಲ್ ಕುಮಾರ್ ಗೆ ಧನ್ಯವಾದಗಳು. ಇದೀಗ ಮತ್ತೆ ತವರಿಗೆ ವಾಪಸಾಗುತ್ತಿರುವುದಕ್ಕೆ ಸಂತಸವಾಗುತ್ತಿದೆ. ನನ್ನನ್ನು ಹೀಗೇ ಬೆಂಬಲಿಸುತ್ತಿರಿ’ ಎಂದು ಸೈನಾ ಬರೆದುಕೊಂಡಿದ್ದಾರೆ.