PV Sindhu: ನಮಗಾಗಿ ಎಷ್ಟೊಂದು ಮಾಡಿದ್ದೀರಿ, ಇಟ್ಸ್ ಓಕೆ ಚಾಂಪಿಯನ್: ಬೇಸರದ ನಡುವೆಯೂ ಪಿವಿ ಸಿಂಧುಗೆ ಸಾಂತ್ವನ

ಪ್ಯಾರಿಸ್: ಈ ಬಾರಿಯೂ ಒಲಿಂಪಿಕ್ಸ್ ನಲ್ಲಿ ಭಾರತಕ್ಕೆ ಪದಕ ಗೆದ್ದುಕೊಡುತ್ತಾರೆ ಎಂದು ಭರವಸೆ ಮೂಡಿಸಿದ್ದ ಪಿವಿ ಸಿಂಧು ಮಹಿಳೆಯರ ಸಿಂಗಲ್ಸ್ ನಲ್ಲಿ ಪ್ರಿ ಕ್ವಾರ್ಟರ್ ಫೈನಲ್ ನಲ್ಲಿ ಸೋಲುವುದರೊಂದಿಗೆ ಕೋಟ್ಯಾಂತರ ಭಾರತೀಯರ ಕನಸು ಭಗ್ನವಾಗಿದೆ.

ಆದರೆ ಪಿವಿ ಸಿಂಧು ಸೋತಿರುವುದು ಬೇಸರ ತಂದರೂ ಅಭಿಮಾನಿಗಳು ಆಕೆಯನ್ನು ಸಂತೈಸಿದ್ದಾರೆ. ಪಿವಿ ಸಿಂಧು ಈಗಾಗಲೇ ಎರಡು ಒಲಿಂಪಿಕ್ಸ್ ಪದಕ ಗೆದ್ದಿದ್ದಾರೆ. ಆದರೆ ಪ್ರಿ ಕ್ವಾರ್ಟರ್ ಫೈನಲ್ ನಲ್ಲಿ ಚೀನಾದ ಬಿಂಗ್ ಜಿಯಾವೊ ವಿರುದ್ಧ 19-21, 14-21 ಅಂತರದಿಂದ ಸೋತರು.

ಇದರೊಂದಿಗೆ ಪಿವಿ ಸಿಂಧು ಪದಕದ ಕನಸು ಕಮರಿದೆ. ಅಭಿಮಾನಿಗಳೂ ಇದರಿಂದ ಬೇಸರಗೊಂಡಿದ್ದಾರೆ. ಪಂದ್ಯದ ಬಳಿಕ ಮಾತನಾಡಿದ್ದ ಪಿವಿ ಸಿಂಧು, ಒಬ್ಬರು ಸೋಲಬೇಕು, ಇನ್ನೊಬ್ಬರು ಗೆಲ್ಲಬೇಕು. ಬಹುಶಃ ಈವತ್ತು ಸೋಲು ನನ್ನ ಪಾಲಾಗಿತ್ತು ಎಂದು ಮಾರ್ಮಿಕವಾಗಿ ಹೇಳಿದ್ದಾರೆ. ಆದರೆ ಅವರ ಈ ಮಾತಿನಲ್ಲೂ ಪದಕ ಗೆಲ್ಲಲು ಸಾಧ್ಯವಾಗಲಿಲ್ಲವಲ್ಲ ಎಂಬ ಬೇಸರವಿತ್ತು.

ಸಿಂಧು ಮಾತು ಕೇಳಿಸಿಕೊಂಡ ಅಭಿಮಾನಿಗಳು, ಏನೇ ಆದರೂ ನಿಮ್ಮ ಸಾಧನೆ ಬಗ್ಗೆ ನಮಗೆ ಹೆಮ್ಮೆಯಿದೆ. ನಮ್ಮ ದೇಶಕ್ಕಾಗಿ ಈಗಾಗಲೇ ಎರಡು ಒಲಿಂಪಿಕ್ಸ್ ಪದಕ ಗೆದ್ದಿದ್ದೀರಿ. ಪರವಾಗಿಲ್ಲ ಚಾಂಪಿಯನ್, ನೀವು ನಮ್ಮ ಹೆಮ್ಮೆ ಎಂದು ಸಮಾಧಾನಿಸಿದ್ದಾರೆ. ಕಳೆದ ಒಂದು ದಶಕದಿಂದ ದೇಶದ ಕೀರ್ತಿ ಪತಾಕೆ ಹಾರಿಸಿದ್ದೀರಿ. ನಿಮ್ಮ ಸನಿಹವೂ ಬರಲು ಬೇರೆಯವರಿಗೆ ಕಷ್ಟ. ಬೇಸರಗೊಳ್ಳಬೇಡಿ, ಸಿಂಧು ನಿಮ್ಮ ಜೊತೆ ನಾವಿದ್ದೇವೆ ಎಂದು ಬೆನ್ನುತಟ್ಟಿದ್ದಾರೆ.