ವಿಶ್ವ ಚೆಸ್ ಚಾಂಪಿಯನ್ ಗೆದ್ದ ವಿಶ್ವದ ಎರಡನೇ ಅತಿ ಕಿರಿಯ ಆಟಗಾರ

PTI

ವಿಶ್ವ ಚೆಸ್ ಚಾಂಪಿಯನ್ ಗೆದ್ದ ವಿಶ್ವದ ಎರಡನೇ ಅತಿ ಕಿರಿಯ ಆಟಗಾರ ನಾರ್ವೆಯ ಮ್ಯಾಗ್ನಸ್ ಕಾರ್ಲ್‌ಸನ್ ಟ್ರೋಫಿಯೊಂದಿಗೆ ಸಂಭ್ರಮಿಸಿದ್ದಾರೆ.

ತಮಿಳುನಾಡಿನ ಮುಖ್ಯಮಂತ್ರಿ ಜೆ. ಜಯಲಲಿತಾ ಅವರು ಸೋಮವಾರ ಚೆನ್ನೈನಲ್ಲಿ ಕಾರ್ಲ್‌ಸನ್ ಅವರಿಗೆ ಗೋಲ್ಡ್ ಕಪ್ ಮತ್ತು 9.9 ಕೋಟಿ ರೂಪಾಯಿ ನಗದು ಬಹುಮಾನ ನೀಡಿ ಸನ್ಮಾನಿಸಿದರು. ಇದೇ ವೇಳೆ ಅವರು, ಅಲೀವ್ ಎಲೆಗಳಿಂದ ಮಾಡಿದ ಗಾರ್ಲೆಂಡ್ ಅನ್ನೂ ನಾರ್ವೆ ಆಟಗಾರನಿಗೆ ನೀಡಿ ಗೌರವಿಸಿದರು.

ಇದರ ಹೊರತಾಗಿ ರನ್ನರ್ ಅಪ್ ಪ್ರಶಸ್ತಿಗೆ ಭಾಜನರಾದ ಭಾರತದ ವಿಶ್ವನಾಥನ್ ಅವರಿಗೂ 6.03 ಕೋಟಿ ರೂಪಾಯಿ ಚೆಕ್ ವಿತರಿಸಿ ಸನ್ಮಾನಿಸಲಾಯಿತು.

ಈ ಸಂದರ್ಭದಲ್ಲಿ ಉಪಸ್ಥಿತರಿದ್ದ ಫೀಡೆ ಅಧ್ಯಕ್ಷ ಕಿರ್ಸನ್ ಇಲಿಯುಮ್‌ಜಿನೊ ಅವರು ಕಾರ್ಲ್‌ಸನ್ ಮತ್ತು ಆನಂದ್ ಕೊರಳಿಗೆ ಕ್ರಮವಾಗಿ ಚಿನ್ನ ಮತ್ತು ಬೆಳ್ಳಿ ಪದಕಗಳ ಹಾರ ಹಾಕಿ ಅಭಿನಂದಿಸಿದರು.

ಚೆನ್ನೈನಲ್ಲಿಯೇ ನಡೆದ ಒಟ್ಟು 12 ಪಂದ್ಯಗಳ ವಿಶ್ವ ಚೆಸ್ ಚಾಂಪಿಯನ್‌ಶಿಪ್‌ನ ಪೈಪೋಟಿಯಲ್ಲಿ 22ರ ಮ್ಯಾಗ್ನಸ್ ಕಾರ್ಲ್‌ಸನ್ ಅವರು 10 ಪಂದ್ಯಗಳಲ್ಲಿಯೇ 6.5-3.5 ಅಂಕಗಳ ಅಂತರದಲ್ಲಿ ಸ್ಥಳೀಯ ಆಟಗಾರ 43ರ ಆನಂದ್‌ಗೆ ಸೋಲುಣಿಸಿ ಪ್ರಶಸ್ತಿಗೆ ಭಾಜನರಾಗಿದ್ದರು. ಐದು ಬಾರಿಯ ಹಾಗೂ ಹಾಲಿ ಚಾಂಪಿಯನ್ ಆನಂದ್ ಅವರು, ಈ ಬಾರಿ ಒಂದೂ ಪಂದ್ಯ ಗೆದ್ದುಕೊಳ್ಳಲಾಗದೇ ಇನ್ನೂ ಎರಡು ಪಂದ್ಯಗಳು ಉಳಿದಿರುವಂತೆ ಸೋಲನುಭವಿಸಿದರು.