ಆಸ್ಟ್ರೇಲಿಯಾದ ಬೆರ್ನಾರ್ಡ್ ತೊಮಿಕ್‌ರೆದುರು ನೇರ ಸೆಟ್‍‌ಗಳ ಅಂತರದಿಂದ ಸುದರ್ವಾ ಸೀತಾರಾಮ್ ಪರಾಜಯ ಹೊಂದುವ ಮೂಲಕ ವಿಂಬಲ್ಡನ್ ಜೂನಿಯರ್ ಚಾಂಪಿಯನ್‌ಶಿಪ್‌ನಲ್ಲಿ ಭಾರತದ ಸವಾಲು ಅಂತ್ಯಗೊಂಡಿದೆ.
ಶ್ರೇಯಾಂಕರಹಿತ ಭಾರತೀಯ ಆಟಗಾರ ಎರಡನೇ ಸುತ್ತಿನ ಪಂದ್ಯದಲ್ಲಿ 2-6, 2-6ರಿಂದ ಕೇವಲ 42 ನಿಮಿಷಗಳಲ್ಲಿ ಎದುರಾಳಿಗೆ ಶರಣಾದರು.
ಭಾರತೀಯ ಆಟಗಾರ ಯಾವುದೇ ರೀತಿಯಲ್ಲೂ ಎದುರಾಳಿ ಆಟಗಾರನಿಗೆ ಸಮಾನ ಎಂಬಂತೆ ಆಟವನ್ನು ತೋರಿಸಲೇ ಇಲ್ಲ. ಆರಂಭಿಕ ಸೆಟ್‌ನಲ್ಲಿ ಎರಡು ಬಾರಿ ಹಾಗೂ ಕೊನೆಯ ಸೆಟ್‌ನಲ್ಲಿ ಮೂರು ಬಾರಿ ಬ್ರೇಕ್ ಮಾಡುವ ಮೂಲಕ ಸೀತಾರಾಮ್‌ರನ್ನು ಅವರು ಸೋಲಿನಂಚಿಗೆ ತಳ್ಳಿದರು.
ಸೀತಾರಾಮ್ ನಾಲ್ಕು ಡಬಲ್ ಫಾಲ್ಟ್‌ಗಳನ್ನೆಸಗಿದರೆ ಎದುರಾಳಿ ಕಳೆದ ವರ್ಷದ ಆಸ್ಟ್ರೇಲಿಯನ್ ಓಪನ್ ಜೂನಿಯರ್ ಚಾಂಪಿಯನ್ ತಪ್ಪುಗಳನ್ನೆಸಗದೆ ಅದ್ಭುತ ಆಟ ಪ್ರದರ್ಶಿಸಿದ್ದಾರೆ.
ಬಾಲಕರ ಸಿಂಗಲ್ಸ್ ವಿಭಾಗದ ಆರಂಭಿಕ ಸುತ್ತಿನಲ್ಲಿ ಸೀತಾರಾಮ್ ಈಜಿಪ್ಟ್‌ನ ಕರೀಮ್ ಮೊಹಮ್ಮದ್ ಮಾಮೌನ್‌ರನ್ನು 6-3, 4-6, 6-2ರಿಂದ ಸೋಲಿಸಿದ್ದರು.
ಸೀತಾರಾಮ್ ಎರಡನೇ ಸುತ್ತಿನ ಪಂದ್ಯದಲ್ಲಿ ಒಂದೇ ಒಂದು ಬ್ರೇಕ್ ಮಾಡಿದ್ದೆಂದರೆ ಎರಡನೇ ಸೆಟ್‌ನಲ್ಲಿ. ಈ ವರ್ಷದ ಆಸ್ಟ್ರೇಲಿಯನ್ ಓಪನ್ ಚಾಂಪಿಯನ್ ಯೂಕಿ ಭಾಂಬ್ರಿ ಐಟಿಎಫ್ ಫ್ಯೂಚರ್ಸ್ ಟೂರ್ನಮೆಂಟ್‌ಗಳತ್ತ ರ‌್ಯಾಂಕಿಂಗ್ ಹೆಚ್ಚಿಸಿಕೊಳ್ಳುವ ಸಲುವಾಗಿ ಗಮನ ಹರಿಸುತ್ತಿರುವ ಕಾರಣ ಭಾರತದ ಪರವಾಗಿ ಅವರು ಜೂನಿಯರ್ ವಿಭಾಗದಲ್ಲಿ ಆಡದೇ ಇದ್ದದ್ದು ಹಿನ್ನಡೆ ಎಂದೇ ಭಾವಿಸಲಾಗಿದೆ.
