ಯೋಗ ಧಾರ್ಮಿಕ ಚಟುವಟಿಕೆಯಲ್ಲ: ಪ್ರಧಾನಿ

ಯೋಗ ಧಾರ್ಮಿಕ ಚಟುವಟಿಕೆಯಲ್ಲ, ಇದನ್ನು ಯಾವುದೇ ವಿವಾದದಡಿ ಎಳೆತರುವುದು ಸರಿಯಲ್ಲ ಎಂದು ಪ್ರಧಾನಿ ಮೋದಿ ಹೇಳಿದ್ದಾರೆ.

ಎರಡನೇ ಅಂತರಾಷ್ಟ್ರೀಯ ದಿನಾಚರಣೆ ಪ್ರಯುಕ್ತ ಪ್ರಧಾನಿ ಚಂದೀಗಡದಲ್ಲಿ ಯೋಗಾಭ್ಯಾಸ ಮಾಡಿ ಮಾತನ್ನಾಡುತ್ತಿದ್ದ ಪ್ರಧಾನಿ ಯೋಗ ಧಾರ್ಮಿಕ ಆಚರಣೆ ಎಂಬ ಭಾವನೆಯನ್ನು ದೂರವಾಗಿಸಲು ಪ್ರಯತ್ನಿಸಿದರು. ಯೋಗ ನಾಸ್ತಿಕರಿಗೂ ಮತ್ತು ಆಸ್ತಿಕರಿಗಾಗಿಯೂ ಅವಶ್ಯವಾದದ್ದು ಎಂದು ಅವರು ಅಭಿಪ್ರಾಯ ಪಟ್ಟರು. 

ಕೆಲವರು ಯೋಗವನ್ನು ಅರ್ಥ ಮಾಡಿಕೊಳ್ಳಲು ವಿಫಲರಾಗಿದ್ದಾರೆ. ಇದನ್ನು ಬದುಕಿನ ಭಾಗವಾಗಿ ಅಳವಡಿಸಿಕೊಳ್ಳಿ ಎಂದು ತಮ್ಮ ಜತೆ ಯೋಗ ಪ್ರದರ್ಶನದಲ್ಲಿ ಪಾಲ್ಗೊಂಡ 30,000 ಜನರಲ್ಲಿ ಅವರು ಮನವಿ ಮಾಡಿಕೊಂಡಿದ್ದಾರೆ. 

ಯೋಗಕ್ಕೆ ಯಾವುದೇ ಭೇದ-ಭಾವವಿಲ್ಲ. ಬಡವರು ಶ್ರೀಮಂತರು ಯೋಗ ಮಾಡುತ್ತಾರೆ. ಸಂಪೂರ್ಣ ಜಗತ್ತು ತನ್ನದೇ ರೀತಿಯಲ್ಲಿ ಯೋಗಕ್ಕೆ ಶರಣಾಗಿದೆ. ಇದು ಪರಲೋಕದ ವಿಜ್ಞಾನವಲ್ಲ, ಇಹಲೋಕದ ವಿಜ್ಞಾನ. ಇದು ತ್ಯಾಗದ ದಿನ. ತೆಗೆದುಕೊಳ್ಳುವ ದಿನವಲ್ಲ. ಆರೋಗ್ಯಕ್ಕೆ ಹಲವಾರು ದಿನಾಚರಣೆಗಳಿವೆ. ಆದರೆ ಯೋಗ ವಿಶ್ವದ ಸಾಮಾನ್ಯರ ದಿನಾಚರಣೆಯಾಗಿದೆ. ಒಂದೇ ವರ್ಷದಲ್ಲಿ ವಿಶ್ವದಲ್ಲಿ ವಿಶಿಷ್ಠ ಸ್ಥಾನಗಳಿಸಿದೆ. ಯೋಗ ದಿನದ ಮುಂದಾಳತ್ವವನ್ನು ಭಾರತ ವಹಿಸಿರುವುದು ಹೆಮ್ಮೆಯ ಸಂಗತಿಯಾಗಿದೆ. ಈ ಶುಭ ಗಳಿಗೆಯಲ್ಲಿ ಸಂಪೂರ್ಣ ದೇಶದ ಜನತೆ ಒಂದಾಗಿದ್ದೇವೆ. ಸಕಲ ರೋಗಕ್ಕೂ ದಿವ್ಯ ಜೌಷಧವಾದ ಯೋಗಕ್ಕೆ ಮುಂದಿನ ದಿನಗಳಲ್ಲಿ ಮತ್ತಷ್ಟು ಉತ್ತೇಜನ ಕಲ್ಪಿಸಲಾಗುವುದು. ಮುಂದಿನ ವರ್ಷದಿಂದ ಅಂತರಾಷ್ಟ್ರೀಯ ಮತ್ತು ರಾಷ್ಟ್ರ ಮಟ್ಟದಲ್ಲಿ ಯೋಗ ಸಾಧಕರನ್ನು ಗುರುತಿಸಿ ಪ್ರಶಸ್ತಿ ಪ್ರದಾನ ಮಾಡಲಾಗುವುದು. ಅಂತಾರಾಷ್ಟ್ರೀಯ ಮಟ್ಟದಲ್ಲಿ ಹಾಗೂ ರಾಷ್ಟ್ರೀಯ ಮಟ್ಟದಲ್ಲಿ ತಲಾ ಒಬ್ಬರು ಯೋಗಸಾಧಕರಿಗೆ ಪ್ರಶಸ್ತಿ ನೀಡಲಾಗುತ್ತದೆ. ಭಾರತದಲ್ಲಿ ಮಧುಮೇಹದಿಂದ ಬಳಲುವವರ ಸಂಖ್ಯೆ ಹೆಚ್ಚುತ್ತಿದ್ದು ಯೋಗವೇ ಅದಕ್ಕೆ ಅತ್ಯುತ್ತಮ ಔಷಧವಾಗಿದೆ ಎಂದು ಪ್ರಧಾನಿ ಹೇಳಿದರು.

ಪಂಜಾಬ್ ಮುಖ್ಯಮಂತ್ರಿ ಪ್ರಕಾಶ್ ಸಿಂಗ್ ಬಾದಲ್, ಹರಿಯಾಣಾ ಮುಖ್ಯಮಂತ್ರಿ ಮನೋಹರ್ ಲಾಲ್ ಖಟ್ಟರ್ ಪ್ರಧಾನಿಗೆ ಸಾಥ್ ನೀಡಿದರು. ವಿವಿಧ ಗಣ್ಯರು ಸೇರಿದಂತೆ 30 ಸಾವಿರ ಜನರ ಜತೆ ಪ್ರಧಾನಿ ಯೋಗಾಭ್ಯಾಸ ಮಾಡಿದರು.

ತಾಜಾ ಸುದ್ದಿಗಳನ್ನು ಓದಲು ಮೊಬೈಲ್ ಆ್ಯಪ್ ಡೌನ್‍ಲೋಡ್ ಮಾಡಿಕೊಳ್ಳಿ 

< >

ತಾಜಾ ಸುದ್ದಿಗಳನ್ನು ಓದಲು ಮೊಬೈಲ್ ಆಪ್ ಡೌನ್‍ಲೋಡ್ ಮಾಡಿಕೊಳ್ಳಿ 

< >

< >< >