ಕೊಲ್ಲಂ: ಮದುವೆಯಾದ ರಾತ್ರಿಯಿಂದಲೇ ಗಂಡು ಮಗುವಿಗಾಗಿ ಅತ್ತೆ ಮಾವನಿಂದ ಕಿರುಕುಳ ಶುರುವಾಗಿತ್ತು ಎಂದು ಕೇರಳದ ಯುವತಿಯೊಬ್ಬಳು ದೂರು ನೀಡಿದ್ದಾಳೆ.
ಕೇರಳದ ಕೊಲ್ಲಂನಲ್ಲಿ ಈ ಘಟನೆ ನಡೆದಿದ್ದು ಈ ಸಂಬಂಧ ಹೈಕೋರ್ಟ್ ಗೆ ದೂರು ಸಲ್ಲಿಸಿದ್ದಾಳೆ. ವೈವಾಹಿಕ ಅಂಕಣದ ಮೂಲಕ ಪರಿಚಯವಾದ ಹುಡುಗನನ್ನು ಯುವತಿ 2012 ರಲ್ಲಿ ಮದುವೆಯಾಗಿದ್ದಳು. ಮದುವೆಯಾದ ದಿನ ರಾತ್ರಿಯೇ ಗಂಡು ಮಗು ಪಡೆಯಲು ಏನು ಮಾಡಬೇಕು ಎಂದು ಅತ್ತೆ ಉಪದೇಶ ಶುರು ಮಾಡಿದ್ದಳಂತೆ!
ಅಷ್ಟೇ ಅಲ್ಲ, ಗಂಡ-ಹೆಂಡತಿ ಸಂಬಂಧದ ಕುರಿತಾದ ಪುಸ್ತಕವೊಂದನ್ನೂ ನೀಡಿದ್ದಳಂತೆ. 2014 ರಲ್ಲಿ ಈಕೆಗೆ ಮೊದಲ ಮಗುವಾಗಿತ್ತು. ಆದರೆ ಮಗು ಹೆಣ್ಣಾಗಿದ್ದರಿಂದ ಗಂಡನ ಮನೆಯವರು ಅಸಮಾಧಾನಗೊಂಡಿದ್ದರು. ಒಮ್ಮೆ ಮಾತ್ರ ಮಗುವನ್ನು ನೋಡಲು ಬಂದಿದ್ದರು. ಅದಾದ ಬಳಿಕ ಗಂಡ, ಅತ್ತೆ-ಮಾವ ನಿರ್ಲ್ಯಕ್ಷಿಸಲು ಶುರು ಮಾಡಿದರು.
ಇದಾದ ಬಳಿಕ ಗಂಡನ ಮನೆಯವರು ನನ್ನನ್ನು ಮತ್ತು ಮಗಳನ್ನು ಕುಟುಂಬದಿಂದಲೇ ದೂರವಿಟ್ಟಿದ್ದಾರೆ. ಈಗ ನನ್ನ ಮಗಳು ತವರಿನವರ ಆಶ್ರಯದಲ್ಲಿ ಬೆಳೆಯುತ್ತಿದ್ದಾಳೆ. ಈ ಮೂಲಕ ಗಂಡನ ಮನೆಯವರು ಮಾನಸಿಕ ಕಿರುಕುಳ ನೀಡಿದ್ದಾರೆ. ನ್ಯಾಯ ಕೊಡಿಸಿ ಎಂದು ಮಹಿಳೆ ಹೈಕೋರ್ಟ್ ಗೆ ಮನವಿ ಸಲ್ಲಿಸಿದ್ದಾಳೆ.