ನರೇಂದ್ರ ಮೋದಿ ಅವರು ಏಕಾಏಕಿ ಜಾರಿಗೆ ತಂದಿರುವ ನೋಟು ನಿಷೇಧಕ್ಕೆ ವಿರೋಧ ಪಕ್ಷಗಳಿಂದಷ್ಟೇ ಅಲ್ಲದೆ ಪಕ್ಷದೊಳಗಿನಿಂದ ಸಹ ಅಪಸ್ವರಗಳು ಕೇಳಿಬರುತ್ತಿವೆ. ಅದಕ್ಕೊಂದು ಉದಾಹರಣೆ ಎಂಬಂತೆ ಬಿಜೆಪಿ ಶಾಸಕ ಭವಾನಿ ಸಿಂಗ್ ರಾಜಾವತ್, ಪ್ರಧಾನಿ ಮೋದಿ ಅವರ ಈ ನಡೆಯನ್ನು ಟೀಕಿಸುವ ಮೂಲಕ ವಿವಾದವನ್ನು ಮೈಗೆಳೆದುಕೊಂಡಿದ್ದಾರೆ.
ಮೋದಿ ಅವರು ನೋಟು ನಿಷೇಧ ಮಾಡುವುದಕ್ಕೂ ಮುನ್ನವೇ ಕೈಗಾರಿಕೋದ್ಯಮಿಗಳಾದ ಅದಾನಿ ಮತ್ತು ಅಂಬಾನಿಗೆ ಈ ಮಾಹಿತಿ ನೀಡಲಾಗಿತ್ತು ಎಂದು ಅವರು ತಮ್ಮ ಪಕ್ಷದ ವಿರುದ್ಧವೇ ಆರೋಪಿಸಿದ್ದಾರೆ.
ಅಷ್ಟೇ ಅಲ್ಲದೆ ಈ ನೋಟುಗಳನ್ನು ಮುಟ್ಟಿದಾಗ ನಕಲಿ ಎನ್ನಿಸುತ್ತದೆ ಎನ್ನುವುದರ ಮೂಲಕ ನೋಟಿನ ಗುಣಮಟ್ಟದ ಬಗ್ಗೆ ಸಹ ಅವರು ಪ್ರಶ್ನೆ ಎತ್ತಿದ್ದರು.
ಈ ವಿಡಿಯೋ ಸುದ್ದಿ ವಾಹಿನಿಗಳಲ್ಲಿ ಬಿತ್ತರಗೊಳ್ಳುತ್ತಿದ್ದಂತೆ ಕೋಟಾ ಶಾಸಕ ಭವಾನಿ ಸಿಂಗ್, ತಾವು ಹಾಗೆ ಹೇಳಿಯೇ ಇಲ್ಲ ಎಂದು ನುಣುಚಿಕೊಳ್ಳಲು ಪ್ರಯತ್ನಿಸುತ್ತಿದ್ದಾರೆ.
